Read koho I Yal Yau 13 Bible Online

I Yal Yau 13 - koho bible

I Yal Yau 13

¹Dabit bơyai mơ ală cau kwang ling at bồ rbô nă mơ rhiang nă cau, bal mơ jơh ală cau lam bồ.

²Dabit đơs mơ jơh dô mpồl Israel pơjum bal lah: “Dilah bơta do lơh niam nùs bol mê, mơ dilah bơta do la nùs kòñ Jehôwa Yàng Tom Trồ bol he dê, bol he sồr jà tĕ jơh ală oh mi bol he dê la cau gam wơl tòm lơgar Israel, mơ kung jà tĕ ală cau gơnoar ơn phan duh khoai mơ cau Lebi la cau ơm bal mơ bol khai tòm ală ƀòn dờng tiah gơs ƀlàng ñhơt, nàng bol khai tus dô bă bal mơ bol he.

³Gen bol he cèng brê wơl tĕ Đài Bơta Ho bal Yàng Tom Trồ bol he dê, bơh bol he ò hòi lùp wèt hơ gơtòm rài Sol dê.”

⁴Jơh dô mpồl jơnum dô nùs bal lơh bơta hơ̆, tài bơh bơta hơ̆ niam nùs jơh làng bol dê.

⁵Behơ̆, Dabit pơjum jơh cau Israel, bơh Hiòng Sihor tòm Ejiptơ tus di Lebô Hamat nàng cèng brê wơl Đài Bơta Ho Bal Yàng Tom Trồ dê bơh Kiriat Jearim.

⁶Dabit bal mơ jơh Israel lòt bal tus hơ Baala tòm Juda (Kiriat Jearim) bơh hơ̆, cèng brê Đài Bơta Ho Bal Yàng Tom Trồ, Yàng Jehôwa dê la Bơtau ơm nggui digùl ceruƀim, la Đài geh tơmoh jat sơnđan Kơnràñ.

⁷Bol khai pơdiang Đài Bơta Ho Bal Yàng Tom Trồ dê hơđang dô nơm rơndeh kơnrồ pa bơh di hìu Abinadap, gơs Uja mơ Ahiô at rơndeh kơnrồ.

⁸Dabit bal mơ jơh ală cau Israel jơh nùs jơh pràn tòmya di đap Yàng Tom Trồ, ngui ală bơta đơs chò bal mơ ală kơñi pĕ, kơñi rơs, ală sơnggơr dềt, tur cing mơ uh kơlwòk.

⁹Tòm tŭ bol khai tus di làn jă kòi Kidôn dê, gen Uja pò tê đơng Đài Bơta Ho Bal, tài bơh ală kơnrồ gơcồt jơng lơh ơwañ gơ.

¹⁰Bơta gơjrañ dờng Yàng Jehôwa dê gơhào mơ Uja, mơ Kơnràñ tơnchơt Uja tài bơh khai ơn tê hơđang Đài Bơta Ho Bal. Behơ̆ khai chơt tềng hơ̆ di đap Yàng Tom Trồ.

¹¹Dabit gơjrañ tài bơh Yàng Jehôwa đùh bơta gơjrañ dờng Yàng Jehôwa dê tòmdră mơ Uja, mơ tiah hơ̆ geh sơnđan la Peres Uja tus di ngai do.

¹²Tòm ngai hơ̆, Dabit rngòt di Yàng Tom Trồ mơ đơs lah: “Mbe añ rgơi cèng Đài Bơta Ho Bal Yàng Tom Trồ dê tus nàng añ in sền gàr taih?”

¹³Behơ̆ Dabit ò cèng Đài Bơta Ho Bal tus tòm Ƀòn Dờng Dabit. Mơya khai cèng gơ tus hơ hìu Ôbet Edôm, cau Gat dê.

¹⁴Đài Bơta Ho Bal Yàng Tom Trồ dê ơm wơl tòm hìu nhă Ôbet Edôm, tòm hìu khai dê tòm pe kơnhai, mơ Yàng Jehôwa ai lơngai hơđang ală cau tòm hìu khai dê mơ hơđang jơh ală phan khai gơs.