Read koho I Yal Yau 15 Bible Online

I Yal Yau 15 - koho bible

I Yal Yau 15

¹Dabit neh bơt bơtào ală hìu să tòm khai in tòm Ƀòn Dờng Dabit, mơ khai rcang dô bă tiah nàng ơn Đài Bơta Ho Bal Yàng Tom Trồ dê mơ bơtào dô nơm sàl gơ in.

²Gen Dabit ò ai gơnoar sồr cau lơi rlau mơ cau Lebi nàng tùng Đài Yàng Tom Trồ dê, tài bơh Yàng Jehôwa neh sac rwah bol khai nàng tùng Đài Yàng Jehôwa dê mơ duh broă di đap Kơnràñ gam sùm sùm.

³Dabit hòi pơjum jơh Israel tòm Jerusalem nàng cèng Đài Yàng Jehôwa dê, tus di tiah mơ khai neh rcang sir gơ in.

⁴Gen Dabit hòi pơjum bal ală kòn sau Arôn mơ ală cau Lebi:

⁵Bơh di ală kòn sau Kôhat: Uriel la cau at bồ mơ dô rhiang bàr jơt nă cau gơp bơtiàn khai dê:

⁶bơh di ală kòn klau Merari: Asaia la cau at bồ mơ dô rhiang bàr jơt nă cau gơp bơtiàn khai dê;

⁷bơh di ală kòn klau Gersôn: Jôel cau at bồ mơ dô rhiang pe jơt nă cau gơp bơtiàn khai dê;

⁸bơh di ală kòn klau Elijaphan: Semaya cau at bồ mơ bàr rhiang nă cau gơp bơtiàn khai dê;

⁹bơh di ală kòn sau Hebrôn: Eliel cau at bồ mơ phàm jơt nă cau gơp bơtiàn;

¹⁰bơh di ală kòn klau Ujiel: Amminadap cau at bồ mơ dô rhiang jơt bàr nă cau gơp bơtiàn khai dê.

¹¹Gen Dabit hòi pơjum ală cau gơnoar ơn phan duh khoai Jadôk mơ Abiatha; mơ ală cau Lebi la Uriel, Asaja, Jôel, Semaya, Eliel mơ Amminadap.

¹²Dabit đơs mơ bol khai lah: “Bol mê la cau at bồ ală hìu nhă cau Lebi dê, lơh sàng goh tĕ să tòm bol mê mơ ală cau oh mi Lebi bol mê dê, nàng bol mê cèng Đài Jehôwa Yàng Tom Trồ Israel dê, tus di tiah mơ añ neh rcang sir gơ in.

¹³Tài bơh bol mê ò cèng gơ tus tòm dơ̆ sơnròp, gen tàng Jehôwa Yàng Tom Trồ bol he dê neh gơhào gơjrañ di bol he, tài bơh bol he ò sền gàr gơ dô bă di pal.”

¹⁴Behơ̆ ală cau gơnoar ơn phan duh khoai mơ ală cau Lebi lơh sàng goh să tòm bol khai, nàng tùng Đài Jehôwa Yàng Tom Trồ Israel dê.

¹⁵Mơ ală cau Lebi ai mơng tùng Đài Yàng Tom Trồ dê hơđang pơnì bol khai, jat be jơnau Yàng Jehôwa neh sồr Môise.

¹⁶Dabit kung sồr ală cau at bồ cau Lebi sac rwah ală oh mi bol khai dê gơs cau đơs chò nàng đơs chò ală bơta đơs chò chò hòp, bal mơ ntas ală kơñi pĕ, kơñi rơs mơ cing dềt.

¹⁷Behơ̆ ală cau Lebi sac rwah Haman kòn klau Jôel; bơh di ală oh mi khai dê, Asap kòn klau Berekia; mơ bơh di ală oh mi bol khai dê la cau Merari, Ethan kòn klau Kusaja;

¹⁸bal mơ bol khai gơs ală oh mi bol khai dê jat tap sèng: Sacari, Jaasiel, Semiramôt, Jehiel, Unni, Eliap, Benayah, Maaseya, Mattithia, Eliphelehu, Mitneya, Ôbet Edôm mơ Jeiel la ală cau kơp gàr mpồng.

¹⁹Ală cau đơs chò, chài ngui ală bơta kơñi la Heman, Asap mơ Ethan tur ală cing dềt mơ kòng;

²⁰Sacari, Ajiel, Semiramôt, Jehiel, Unni, Eliap, Maaseya mơ Benayah gen pĕ kơñi jat gùng Alamôt,

²¹mơ Marrithia, Eliphelehu, Mitneja, Ôbet Edôm, Jeiel mơ Ajajia gen ngui ală kơñi rơs jat tềl kơñi Seminit,

²²Kenaya cau at bồ ală cau Lebi at bồ bơta đơs chò, hơ̆ la broă tòm khai dê tài bơh khai gơs bơta chài rgơi lơh broă hơ̆.

²³Berekia mơ Elkana la ală cau kơp gàr mpồng Đài Bơta Ho Bal in.

²⁴Sebania, Jôsaphat, Nethanel, Amasai, Sacari, Benayah mơ Eliejer la ală cau gơnoar ơn phan duh khoai gen uh ală kơlwòk di đap Đài Bơta Ho Bal Yàng Tom Trồ dê. Ôbet Edôm mơ Jehia kung la ală cau kơp gàr mpồng Đài Bơta Ho Bal in.

²⁵Behơ̆ Dabit mơ ală cau kwang kra Israel dê mơ ală cau at bồ ală mpồl dô rbô nă lòt cèng Đài Ho Bal Yàng Jehôwa bơh di hìu Ôbet Edôm dô bă chò hòp.

²⁶Tài bơh Yàng Tom Trồ neh dong kòl ală cau Lebi tùng Đài Ho Bal Yàng Jehôwa dê, poh nơm kơnrồ dam mơ poh nơm be dam neh geh lơh gơs phan ơn.

²⁷Dabit neh soh dô nơm ào jrùh mơ bài che dơmài lơbơn, jơh ală cau Lebi tùng Đài Ho Bal kung soh behơ̆ bal mơ ală cau đơs chò mơ Kenania la cau lam bồ ală mpồl đơs chò sơl. Dabit kung soh dô nơm ephot mơ bài che dơmài.

²⁸Behơ̆, jơh Israel neh cèng Đài Ho Bal Yàng Jehôwa dê, bal mơ ală jơnau driau dờng hòn chò bal mơ ntas cau uh ngke be dam mơ ală kơlwòk, tur cing dềt pĕ mơ rơs ală kơñi.

²⁹Tòm tŭ Đài Ho Bal Yàng Jehôwa dê tus tòm ƀòn dờng Dabit, Mikal kòn ùr Sol dê sền bơh mpồng dềt. Mơ tòm tŭ khai neh gŏ bơtau Dabit tòmya hòn chò gen khai sền òsơp di Dabit tòm nùs khai dê.