Read koho I Yal Yau 16 Bible Online

I Yal Yau 16 - koho bible

I Yal Yau 16

¹Bol khai cèng Đài Ho Bal Yàng Tom Trồ dê mơ ơn gơtòm sàl mơ Dabit neh bơtào gơ in, mơ bol khai ơn ală phan ơn chu pơrguc mơ phan ơn bơta ring lơngai.

²Tơnơ̆ mơ tŭ Dabit neh sir ơn ală phan ơn chu pơrguc mơ ală phan ơn bơta ring lơngai, khai ai sơnđan Yàng Jehôwa mơ ai lơngai làng bol in.

³Gen khai ai kòp nă cau klau mơ cau ùr Israel in dô nơm piang lă, mơ dô pet poac, mơ dô nơm ƀañ plai ño.

⁴Bơtau pồ bơtào cau ƀà tòm ală cau Lebi nàng duh broă di đap Đài Bơta Ho Bal Yàng Jehôwa dê, nàng hòi dan, ưnngài mơ jòng ro Yàng Jehôwa la Yàng Tom Trồ Israel dê.

⁵Asap la cau lam bồ, Sacari cau lam bồ oh, gen tus di Jeiel, Semiramôt, Jehiel, Mattithia, Eliap, Benayah, Ôbet Edôm mơ Jeiel. Bol khai pĕ mơ rơs ală kơñi mơ che, Asap tur ală cing dềt,

⁶Benayah mơ Jahasiel la ală cau gơnoar ơn phan duh khoai òs uh kơlwòk di đap Đài Ho Bal Yàng Tom Trồ dê.

⁷Tòm ngai hơ̆ Dabit jào Asap bal mơ ală cau lơh broă in bal mơ khai bơta đơs crih ưnngài Yàng Jehôwa be do:

⁸Ưnngài tĕ Yàng Jehôwa, hòi dan tĕ di sơnđan Kơnràñ; Yal tĕ jơh ală làng bol in git broă Kơnràñ neh lơh.

⁹Đơs chò tĕ Kơnràñ in, đơs chò jòng ro Kơnràñ; Yal tĕ jơh tơl nă cau in bơh jơh ală broă crih crài krơi is Kơnràñ dê.

¹⁰Gơklŏ sơnđan sàng goh Kơnràñ dê; Lòi tĕ nùs ală cau jòi jat Yàng Jehôwa geh hòn chò.

¹¹Tơnggòr sền tĕ di Yàng Jehôwa mơ bơta pràn kơldang Kơnràñ dê; Sùm sùm jòi jat tĕ muh mat Kơnràñ dê.

¹²Kah tĕ ală bơta krơi mơ Kơnràñ neh lơh, ală bơta crih crài, mơ ală bơta cahrña mơ Kơnràñ neh yal tơlik,

¹³Ơ ală kòn sau Israel cau duh broă Kơnràñ dê, Ơ ală kòn klau Jakôp la ală cau Kơnràñ neh sac rwah.

¹⁴Kơnràñ la Jehôwa Yàng Tom Trồ bol he dê bơta cahrña Kơnràñ dê ơm làm jơh plai ù.

¹⁵Kơnràñ kah wơl bơta ho bal Kơnràñ dê gam sùm sùm, jơnau gơnoar sồr Kơnràñ dê tus di dô rbô rài,

¹⁶Bơta ho bal mơ Kơnràñ neh lơh mơ Abraham, jơnau Kơnràñ srat să ho bal mơ Isak.

¹⁷Kơnràñ lơh nền jơnau hơ̆ mơ Jakôp kung be dô jơnau gơnoar sồr, mơ Israel kung be dô bơta ho bal gam sùm sùm.

¹⁸Đơs lah: “Añ rơp ai lơgar Kanaan mê in lơh gơs dô pơnah phan jơtài mơ mê rơp pơrdòn.”

¹⁹Tòm tŭ ntum khà bol khai dê mìng la dô êt lơm, ngan la êt lơm, mơ la cau crih mat tòm lơgar hơ̆,

²⁰Bol khai lòt nrah nring bơh lơgar do tus hơ lơgar ne, bơh làng bol do tus hơ làng bol ndai.

²¹Kơnràñ ò ai cau lơi rồn bơklơn bol khai; tài bơh bol khai Kơnràñ lah pơrhơng ală cau bơtau;

²²“Bañ ƀư di ală cau geh bong mơñà Añ jê, bañ lơh iơh di ală cau gơnoar hwơr Añ jê.”

²³Ơ jơh plai ù, đơs chò tĕ Yàng Jehôwa in; kòp ngai bơto yal tĕ bơta dong klàs Kơnràñ dê.

²⁴Yal tơlik tĕ bơta gơklŏ Kơnràñ dê digùl ală lơgar, ală broă crih crài Kơnràñ dê digùl jơh ală làng bol.

²⁵Bơh Yàng Jehôwa la dờng mơ di pal geh jòng ro rlau jơh; Kơnràñ pal geh duh rngòt rlau mơ jơh ală yàng.

²⁶Bơh jơh ală yàng ală làng bol dê la ală rùp ràk, mơya Yàng Jehôwa neh lơh gơs ală tap trồ.

²⁷Bơta gơklŏ mơ bơta ryŭ ryơm ơm di đap Kơnràñ; bơta pràn kơldang mơ bơta hòn chò ơm tòm tiah ơm sùm Kơnràñ dê.

²⁸Ơ ală hìu nhă ală làng bol dê, ơn tĕ Yàng Jehôwa, Ơn tĕ Yàng Jehôwa in bơta gơklŏ mơ bơta pràn kơldang,

²⁹Ơn tĕ Yàng Jehôwa in bơta gơklŏ gơrê bal mơ sơnđan Kơnràñ. Cèng tĕ dô nơm phan ơn mơ lòt tus di đap Kơnràñ; Duh khoai tĕ Yàng Jehôwa tòm bơta gơklŏ bơta sàng goh Kơnràñ dê.

³⁰Ơ jơh plai ù, rơm să tĕ di đap Kơnràñ! Lơgar dunnia neh geh bơtào kơ̆, gơ ò rgơi geh tòmgơl.

³¹Lòi tĕ ală tap trồ hòn chò, lòi tĕ plai ù chò hòp; lòi tĕ bol gơ đơs digùl ală làng bol lah: “Yàng Jehôwa at bồ!”

³²Lòi tĕ dàlềng mơ jơh ală phan tòm gơ nggồr wơl; lòi tĕ ală ƀlàng sre mơ jơh ală phan tòm gơhòn chò!

³³Gen ală chi tòm dơr rơp đơs chò, hòn chò di đap Yàng Jehôwa, bơh Kơnràñ tus nàng cahrña plai ù.

³⁴Ưnngài tĕ Yàng Jehôwa bơh Kơnràñ la niam; Bơta kòñ gơboh Kơnràñ dê gam sùm sùm ò lồi.

³⁵Đơs tĕ: “Ơ Yàng Tom Trồ la Bơtau Dong klàs bol hi dê Dan dong klàs bol hi; Pơjum tơrgòm bol hi mơ dong tă bol hi bơh di ală làng bol, tồ bol hi rgơi ưnngài sơnđan sàng goh Kơnràñ dê, tồ bol hi rgơi jòng să tòm bơta jòng ro Kơnràñ dê.”

³⁶Pal jòng ro Yàng Jehôwa la Yàng Tom Trồ Israel dê, bơh sùm sùm tus di sùm sùm. Gen jơh làng bol đơs “Amen” mơ “Jòng ro Yàng Jehôwa.”

³⁷Dabit lòi Asap mơ ală cau lơh broă bal mơ khai di đap Đài Bơta Ho Bal Yàng Jehôwa dê nàng duh broă jat be òs tềng hơ̆ tòm ală bơta pal lơh kòp ngai.

³⁸Khai kung lòi Ôbet Edôm mơ prau jơt phàm nă cau lơh broă bal mơ khai nàng duh broă mơ bol khai. Ôbet Edôm kòn klau Jeduthun bal mơ Hôsa la ală cau kơp gàr mpồng.

³⁹Dabit lòi Jadôk cau gơnoar ơn phan duh khoai mơ ală cau gơnoar ơn phan duh khoai oh mi khai di đap hìu duh khoai Yàng Jehôwa di tiah jơnhoa tòm Gabaôn,

⁴⁰nàng ơn ală phan ơn chu pơrguc Yàng Jehôwa in hơđang cơnòng duh khoai ală phan chu pơrguc be òs drim mơ mho, jat be ală bơta neh cih tòm bơta boh lam Yàng Jehôwa dê neh ai gơnoar sồr làng bol Israel in.

⁴¹Bal mơ bol khai gen gơs Heman mơ Jeduthun mơ ală cau ndai tòm mpồl neh geh sac rwah mơ lơh nền jat sơnđan nàng ưnngài Yàng Jehôwa: “Bơh bơta kòñ gơboh kơ̆ dơn Kơnràñ dê gam sùm sùm.”

⁴²Heman mơ Jeduthun gơs broă tòm tòm bơta uh ală kơlwòk mơ tur cing dềt, mơ tòm bơta pĕ mơ rơs ală kơñi ndai jat ală bơta đơs chò sàng goh. Ală kòn klau Jeduthun dê geh sồr kơp gàr mpồng dờng.

⁴³Gen jơh làng bol lik rê hơ hìu tòm bol khai dê, mơ Dabit rê hìu nàng ai lơngai hìu nhă khai in.