Read koho I Yal Yau 17 Bible Online

I Yal Yau 17 - koho bible

I Yal Yau 17

¹Tơnơ̆ mơ tŭ Dabit neh ơm lơngap lơngai tòm gơlang khai dê rau, khai đơs mơ cau gơnoar hwơr Nathan lah: “Do, añ ơm tòm dô nơm gơlang bơt mơ chi pơnàng tòm tŭ Đài Bơta Ho Bal Yàng Jehôwa dê ơm hơđơm dô nơm sàl.”

²Nathan ho wơl mơ Dabit lah: “Lơh tĕ bơta lơi Bơtau neh gơs tòm nùs tồr, bơh Yàng Tom Trồ ơm bal mơ bơtau.”

³Tòm mang hơ̆, Yàng Tom Trồ đơs mơ Nathan lah:

⁴“Lòt tĕ yal mơ cau duh broă Añ la Dabit lah: Yàng Jehôwa đơs be do: ‘Mê ò di la cau rơp bơt bơtào Añ in dô nơm hìu ơm.’

⁵Añ neh ò ơm tòm dô nơm hìu bơh ngai Añ neh cèng Israel lik klàs bơh Ejiptơ jơl tus di ngai do. Añ neh ơm bơh di sàl do tus hơ sàl ne, tòm hìu duh khoai ing bơh tiah do tus hơ tiah ne

⁶Tiah lơi Añ lik lòt bal mơ jơh ală cau Israel, gơs tŭ lơi Añ neh đơs mơ dô nă cau lơi tòm ală cau at bồ bol khai dê la cau Añ neh sồr ê gàr làng bol Añ jê lah: ‘Ñchi bơh tài mê ò bơt Añ in dô nơm hìu mơ chi pơnàng, sơl ơ?’

⁷Gen tŭ do, yal tĕ cau duh broă Añ in la Dabit lah: Yàng Jehôwa Gơnap Gơnoar Rlau Jơh đơs lah: ‘Añ neh tă mê bơh di ƀlàng ñhơt, bơh di mpồl belàt nàng gơlik gơs cau at bồ hơđang làng bol Añ jê la Israel.

⁸Añ neh ơm bal mơ mê tiah lơi mê lòt, mơ Añ neh tơnroh jơh ală cau sò tơm mê dê bơh di đap mê. Tŭ do Añ rơp lơh sơnđan mê dê gơlik gơs kung be sơnđan ală cau dờng màng rlau jơh tòm plai ù.

⁹Mơ Añ rơp rcang sir dô bă tiah ơm làng bol Israel Añ in. Mơ Añ rơp tam bol khai nàng bol khai rgơi ơm tòm dô nơm tiah tòm bol khai dê mơ ò gơs tŭ lơi kong dơrcul tai. Ală làng bol iơh bơsak rơp ò rồn bơklơn bol khai tai kung be bol khai neh lơh bơh tŭ sơnròp bồ dà

¹⁰bơh di tŭ Añ neh pồ bơtào ală cau at bồ hơđang làng bol Israel Añ jê, mơ Añ rơp lơh alah jơh ală cau sò tơm bol mê dê. Rlau mơ hơ̆ Añ yal bol mê in lah Yàng Jehôwa rơp bơt bơtào dô nơm hìu mê in:

¹¹Tòm tŭ ală ngai mê dê neh jơh rau mơ mê rơp rê bal mơ ală ồng pàng mê dê, Añ rơp bơtào tơngguh kòn mê nàng pơrdòn sơbàn mê, dô nă tòm ală kòn klau tòm mê dê, mơ Añ rơp bơt bơtào kơ̆ lơgar khai dê.

¹²Khai la cau rơp bơt bơtào dô nơm hìu Añ in, mơ Añ rơp bơt kơ̆ sơbàn khai dê gam sùm sùm.

¹³Añ rơp lơh gơs bèp khai dê, mơ khai rơp gơs kòn klau Añ jê. Añ rơp ò tŭ lơi tă tơlik bơta kòñ gơboh kơ̆ dơn Añ jê bơh di khai, kung be Añ neh tă tơlik bơh di cau neh at bồ lài mơ mê.

¹⁴Añ rơp bơtào khai hơđang hìu Añ jê mơ hơđang lơgar Añ jê gam sùm sùm; sơbàn khai dê rơp geh bơt bơtào kơ̆ gam sùm ò lồi.’”

¹⁵Nathan yal wơl mơ Dabit jơh ală jơnau tòm ală bơta gơtơnggŏ hơ̆.

¹⁶Gen Dabit mut mơ nggui di đap Yàng Jehôwa mơ đơs lah: “Ơ Yàng Jehôwa, añ la ñcau mơ hìu nhă añ la ñchi mơ Kơnràñ neh lam añ tus di ngai do?

¹⁷Ơ Yàng Tom Trồ, bơta do Kơnràñ gam sền la dềt rhền gen Kơnràñ kung neh đơs bơh ală ngai rơp tus hìu dĭ gơna Kơnràñ dê. Ơ Jehôwa Yàng Tom Trồ, Kơnràñ neh gơwèt mơ añ kung be dô nă cau tòm ală cau màng ryŭ.

¹⁸Ñchi jơnau Dabit rgơi đơs tai mơ Kơnràñ bơh bơta Kơnràñ neh yò tơngguh cau duh broă Kơnràñ dê. Yàng git cau duh broă Kơnràñ dê.

¹⁹Ơ Yàng Jehôwa, tài bơh cau duh broă Kơnràñ dê mơ jat nùs kòñ Kơnràñ dê, Kơnràñ neh lơh broă dờng do mơ yal tơlik jơh ală bơta dờng màng Kơnràñ dê.

²⁰Ơ Yàng Jehôwa, ò gơs yàng lơi ndai kung be Kơnràñ, mơ ò gơs Yàng Tom Trồ ndai rlau mơ Kơnràñ, tòm toh kung be bol hi neh kơno mơ tồr tòm bol hi dê.

²¹Mơ ò gơs làng bol lơi ndai be làng bol Israel Kơnràñ dê, la dô nơm làng bol hơđang ù gơs Yàng Tom Trồ lik lòt nàng dong tơwài gơlik gơs làng bol Kơnràñ dê, mơ lơh să tòm Kơnràñ in dô sơnđan dờng mơ pal rngòt tòm bơta ting bơtrơh ală làng bol bơh di đap làng bol Kơnràñ dê la làng bol mơ Kơnràñ neh dong tơwài bơh Ejiptơ?

²²Kơnràñ neh lơh làng bol Israel Kơnràñ in gơlik gơs làng bol gơrê is mơ Kơnràñ gam sùm sùm, mơ Kơnràñ, Ơ Yàng Jehôwa, Kơnràñ neh gơlik gơs Yàng Tom Trồ bol khai dê.

²³Mơ tŭ do, Ơ Yàng Jehôwa, dan jơnau Kơnràñ neh ho bơh cau duh broă Kơnràñ dê mơ bơh hìu khai dê geh bơtào kơ̆ gam sùm sùm. Dan lơh jat be jơnau Kơnràñ neh ho,

²⁴tồ gơ geh bơtào kơ̆ mơ nàng sơnđan Kơnràñ dê rơp gơlik gơs dờng gam sùm sùm. Gen cau rgơi đơs lah: ‘Yàng Tom Trồ Gơnap Gơnoar Rlau Jơh la Yàng Tom Trồ hơđang Israel la Yàng Tom Trồ Israel dê!’ Mơ hìu cau duh broă Kơnràñ dê la Dabit rơp geh bơtào kơ̆ di đap Kơnràñ.

²⁵Ơ Yàng Tom Trồ añ jê, Kơnràñ neh yal tơlik cau duh broă Kơnràñ in la Kơnràñ rơp bơt bơtào dô nơm hìu khai in. Behơ̆ sồng cau duh broă Kơnràñ dê rgơi geh gơnoar nàng hòi dan mơ Kơnràñ.

²⁶Ơ Yàng Jehôwa, Kơnràñ la Yàng Tom Trồ! Kơnràñ neh ho ală bơta niam do cau duh broă Kơnràñ in.

²⁷Tŭ do, Kơnràñ neh niam nùs ai lơngai hìu cau duh broă Kơnràñ dê, la hìu hơ̆ rơp pơnjat gam sùm sùm di đap mat Kơnràñ; Ơ Yàng Jehôwa, bơh Kơnràñ neh ai lơngai hìu hơ̆ in, mơ gơ rơp geh lơngai gam sùm sùm.”