Read koho I Yal Yau 18 Bible Online

I Yal Yau 18 - koho bible

I Yal Yau 18

¹Tơnơ̆ mơ hơ̆, Dabit tòmlơh pha rlau cau Philistin mơ at bồ bol khai, khai tòmpìt ai Gat mơ ală ƀòn dềt gùt dar gơ bơh di gơnoar at bồ cau Philistin dê.

²Dabit kung tòmlơh pha rlau cau Môap, mơ bol khai kong duh broă khai mơ dap dia khai in.

³Rlau mơ hơ̆, Dabit tòmlơh mơ Hadadejer bơtau Jôba dê tus di Hamat, tòm tŭ khai bơtào kơ̆ gơnoar at bồ khai dê rò gah hiòng Ơphrat.

⁴Dabit kup dô rbô nơm ală rơndeh lòs tòmlơh khai dê, poh rbô cau ling at rơndeh lòs tòmlơh mơ bàr jơt rbô cau ling lòt jơng. Khai koh kơjòn jơh ală ơseh, lòi mìng dô rhiang nơm ơseh hwài rơndeh lòs tòmlơh lơm.

⁵Tòm tŭ ală cau Aram ơm tòm Damas lòt tus nàng dong Hadadejer bơtau Jôba, Dabit tơnchơt bàr jơt bàr rbô nă tòm bol khai.

⁶Khai ơn ală cau ling kơp gàr tòm Aram gơrê bal mơ Damas, mơ cau Aram gơlik gơs cau kong duh broă mơ dap dia khai in. Yàng Jehôwa ai Dabit in bơta pha lin rlau tòm làm bă tiah khai lòt tus.

⁷Dabit tă ală khèl màh ală cau kwang ling Hadadejer dê mơ cèng gơ hơ Jerusalem.

⁸Bơh Tiphat mơ bơh Kun ƀòn dờng Hadadejer, Dabit neh ai oă ngan kòng, mơ tơnơ̆ hơ̆ Salômôn neh ngui nàng lơh gơs thau dà, ală jrong hìu mơ ală phan ngui ndai mơ kòng.

⁹Tòm tŭ Tôu, bơtau Hamat dê, kơno la Dabit neh tòmlơh pha mơ jơh dô mpồl ling Hadadejer bơtau Jôbap dê,

¹⁰gen khai sồr kòn klau khai dê la Hadôram lòt tus hơ Dabit nàng còp să khai mơ jòng ro khai bơh bơta tòmlơh pha mơ Hadadejer la bơtau neh tòmlơh mơ Tôu. Hadôram cèng tơl jơh ală phan ngui mơ màh mơ kòng.

¹¹Bơtau Dabit ơn jơh ală phan ngui hơ̆ Yàng Jehôwa in kung be khai neh ơn priă mơ màh mơ khai neh tă ai bơh di ală lơgar Edôm mơ Môap, Ammôn mơ Philistin, mơ Amalek.

¹²Abisai kòn klau Jeruja tơnchơt jơt phàm rbô nă cau Edôm tòm Thòng Boh.

¹³Khai ơn ală cau ling kơp gàr tòm Edôm, mơ jơh ală cau Edôm gơlik gơs cau duh broă Dabit. Yàng Jehôwa ai Dabit in bơta pha lin rlau tòm làm jơh ală tiah khai lòt tus.

¹⁴Dabit at bồ hơđang jơh Israel, lơh bơta song ring mơ song ngan jơh làng bol khai in.

¹⁵Jôap kòn klau Jeruja la cau kwang at bồ jơh mpồl ling, Jehôsaphat kòn klau Ahilut la cau kwang cih sră yal broă,

¹⁶Jadôk kòn klau Ahitup mơ Ahimelek kòn klau Abiatha la ală cau gơnoar ơn phan duh khoai; Sapsa la cau gơnoar cih;

¹⁷Benayah kòn klau Jehôyada at bồ cau Kerethit mơ cau Phelethit; mơ ală kòn klau Dabit gơs cau kwang at bồ ơm dong broă di gah bơtau.