Read koho I Yal Yau 19 Bible Online

I Yal Yau 19 - koho bible

I Yal Yau 19

¹Tơnơ̆ mơ ală bơta hơ̆, Nahas bơtau cau Ammôn dê neh chơt, mơ kòn klau khai dê pơrdòn sơbàn gơs bơtau.

²Dabit kơlôi lah: “Añ rơp yal tơlik bơta tòmklac đềt mềr gơwèt hơ Hanun kòn klau Nahas, tài bơh bèp khai neh yal tơlik bơta tòmklac đềt mềr gơwèt hơ añ.” Behơ̆ Dabit sồr dô mpồl cau kong sồr lòt tus nàng tòmpà bơta moat jrùng mơ Hanun bơh bơta chơt bèp khai dê. Tòm tŭ ală cau Dabit dê neh tus hơ Hanun tòm lơgar Ammôn nàng tòmpà bơta moat jrùng mơ khai,

³ală cau ryŭ ryơm Ammôn dê đơs mơ Hanun lah: “Bơtau kơlôi lah Dabit ki ngàm di bèp bơtau dê mơ neh sồr cau lòt tus hơ bơtau nàng tòmpà bơta moat jrùng sơl ơ? Ò di ală cau khai dê neh lòt tus hơ bơtau nàng sền sơwì mơ rwang còp lơgar nàng tơnroh gơ ò ơ?”

⁴Behơ̆ Hanun kup ală cau Dabit dê, koah sơnò tềp bol khai dê, koh ồi ào di bơnô bol khai dê mơ lòi bol khai rê.

⁵Tòm tŭ gơs cau lòt yal Dabit in bơh ală cau hơ̆, gen Dabit sồr cau kong sồr lòt tus hơ bol khai, bơh bol khai ƀàssìl ƀàsso ngan. Bơtau đơs lah: “Ơm wơl tĕ tòm Jerikô jơl tus di tŭ sơnò tềp hòn wơl gen sồng rê.”

⁶Tòm tŭ cau Ammôn đal git lah bol khai neh gơlik gơs kung be ƀô ồm tòm muh Dabit dê, Hanun mơ cau Ammôn pơyoa dô rbô talơng priă nàng ơpah rơndeh lòs tòmlơh mơ cau ling at rơndeh lòs tòmlơh bơh Mesôpôtami bơh Aram Maaka mơ Jôba.

⁷Bol khai ơpah pe jơt bàr rbô rơndeh lòs tòmlơh, bơtau Maaka bal mơ Maaka mpồl ling khai dê tus lơh sàl rềp di Madaba. Mơ ală cau Ammôn neh pơjum bal tòm ală ƀòn dờng bol khai dê neh rcang sir nàng tòmlơh.

⁸Tòm tŭ kơno behơ̆, Dabit sồr Jôap lik lòt bal mơ jơh dô mpồl ling khai dê.

⁹Cau Ammôn lik mơ rơndap mpồl ling tòmlơh di mpồng mut tòm ƀòn dờng bol khai dê, tòm tŭ ală cau bơtau neh tus gen bol khai ơm is tòm ƀlàng dờng lơgar dê.

¹⁰Jôap neh gŏ gơs mpồl ling sò tơm rcang sir tòmlơh di đap mơ đah ngkòi khai; behơ̆ khai sac rwah ală mpồl ling jak rlau jơh Israel nàng tòmdră mơ cau Aram.

¹¹Khai lòi ală mpồl ling gam wơl hơđơm gơnoar at bồ Abisai la oh khai dê nàng tòmdră mơ cau Ammôn.

¹²Jôap đơs lah: “Dilah cau Aram pràn kơldang rlau mơ añ, gen mê pal tus nàng dong kòl añ; mơya dilah cau Ammôn pràn kơldang rlau mơ mê, gen añ rơp tus dong kòl mê.

¹³Pràn kơldang mơ khin cha tòmlơh tĕ! Bơh làng bol mơ ƀòn dờng Yàng Tom Trồ bol he dê. Yàng Jehôwa rơp lơh bơta lơi niam di đap mat Kơnràñ.”

¹⁴Gen Jôap bal mơ ală mpồl ling bal mơ khai lòt tus hơđap nàng tòmlơh mơ cau Aram, mơ bol hơ̆ ntoat dô di đap khai.

¹⁵Tòm tŭ cau Ammôn gŏ ală cau Aram neh ntoat dô, bol khai kung ntoat dô bơh di đap Abisai oh khai mơ mut tòm dơlam ƀòn dờng. Behơ̆ Jôap rê wơl hơ Jerusalem.

¹⁶Tơnơ̆ mơ tŭ cau Aram gŏ bol khai neh kong cau Israel lơh alah, bol khai sồr ală cau kong sồr mơ geh Sôphat cau kwang at bồ mpồl ling Hadadejer dê cèng tus ală cau Aram bơh đah neh hiòng Ơphrat.

¹⁷Tòm tŭ Dabit neh geh cau yal bơh bơta hơ̆, khai pơjum tơrgòm jơh ală cau Israel mơ tiă hiòng Jordan; khai lòt tus hơđap tòmdră mơ bol khai, mơ rơndap mpồl ling tòmlơh tòm toh di đap bol khai. Dabit rơndap mpồl ling tòmlơh khai dê nàng tòmlơh mơ cau Aram, mơ bol khai tòmlơh mơ Dabit.

¹⁸Ală cau Aram ntoat dô di đap cau Israel, mơ Dabit tơnchơt poh rbô nă cau at rơndeh lòs tòmlơh bol khai dê mơ poan jơt rbô nă cau ling lòt jơng. Dabit kung tơnchơt Sôphat la cau kwang at bồ mpồl ling bol khai dê.

¹⁹Tòm tŭ ală làng bol hơđơm gơnoar at bồ Hadadejer dê gŏ bol khai neh kong cau Israel lơh alah, bol khai lơh gơtòmsòr mơ Dabit mơ kong duh broă khai. Behơ̆, cau Aram ò bài dong kòl cau Ammôn tai.