Read koho I Yal Yau 20 Bible Online

I Yal Yau 20 - koho bible

I Yal Yau 20

¹Tòm kơnhai bơkào chi che, tòm tŭ ală cau bơtau lik lòt tòmlơh, Jôap lam ală mpồl ling lik lòt. Khai tơnroh lơgar cau Ammôn dê mơ lòt tus hơ Rapba mơ gơrwàng gơ, mơya Dabit ơm wơl tòm Jerusalem. Jôap brồ lơh Rapba mơ tơnroh gơ.

²Dabit tă ai sơgơn bơtau bơh di bồ rùp yàng Milkom dê, gơ kơnjơ̆ dô talơng màh mơ geh bơka mơ ală lŭ màng, mơ gơ geh tơndau di bồ Dabit dê. Khai geh oă phan tòmpìt ai bơh di ƀòn dờng,

³mơ tă cèng làng bol neh ơm tềng hơ̆, kup sồr bol khai lơh broă mơ rơnđòt òt chi, mơ sùng mơ jơlèng. Dabit lơh behơ̆ mơ jơh tơl nă cau Ammôn. Gen Dabit mơ jơh dô mpồl ling khai dê rê wơl hơ jerusalem.

⁴Kung tòm tŭ hơ̆ gơlik bơta tòmlơh mơ cau Philistin tòm Gejer. Tòm tŭ hơ̆ Sipbekai cau Husa tơnchơt Sippai, la dô nă tòm ală kòn sau cau Repha; mơ at bồ cau Philistin.

⁵Tòm dô bơta tòmlơh ndai mơ cau Philistin, Elhanan kòn klau Jair tơnchơt Lami la oh Gôliat cau Gat, la cau gơs dô nơm tà gơs ngkơr kung be jrong cau tàñ ồi dê.

⁶Tòm dô bơta tòmlơh ndai tai neh gơlik gơs tòm Gat, tềng hơ̆ gơs dô nă cau dờng jơnhoa ngan gơs prau nơm kòn tê tòm kòp nơm mpàng tê, mơ prau nơm kòn jơng tòm kòp nơm mpàng jơng, jơh ală la bàr jơt poan nơm. Khai kung la kòn sau Rapha dê.

⁷Tòm tŭ khai bơtat bơtròh Israel gen Jônathan kòn klau Simea, oh klau Dabit dê tơnchơt khai.

⁸Hơ̆ la ală kòn sau Rapha dê tòm Gat, mơ bol khai kòl tơnchơt bơh tê Dabit mơ ală cau Dabit dê.