Read koho I Yal Yau 21 Bible Online

I Yal Yau 21 - koho bible

I Yal Yau 21

¹Satan ntào tòmdră mơ Israel, mơ chồl nùs Dabit kòp khà làng bol Israel.

²Behơ̆ Dabit đơs mơ Jôap mơ ală cau kwang at bồ ling lah: “Lòt tĕ mơ kòp khà cau Israel bơh Beerseba tus hơ Dan, nàng añ rgơi git khà bol khai dê.”

³Mơya Jôap đơs lah: “Dan Yàng Jehôwa bơtơl dô rhiang dơ̆ rlau tai. Ơ cau tòm añ jê la bơtau, ò di bol khai la ală cau duh broă cau tòm añ jê la bơtau ò ơ? Ñchi bơh tài cau tòm añ jê kòñ sồr lơh bơta hơ̆ taih? Ñchi bơh tài pal cèng bơta tìs glài hơđang Israel taih?”

⁴Mơya jơnau đơs cau bơtau dê pha rlau mơ jơnau Jôap dê; behơ̆ Jôap lik lòt làm jơh Israel mơ rê wơl hơ Jerusalem.

⁵Jôap yal wơl ntum khà làng bol Dabit in: Tòm jơh Israel gơs dô tơlak sa mơ dô rhiang rbô nă cau rgơi at đào, mơ tòm Juda gơs poan rhiang poh jơt rbô nă cau at đào.

⁶Mơya Jôap ò kòp cau Lebi mơ cau Benjamin tòm khà hơ̆, tài bơh gơnoar sồr cau bơtau dê pal cù kìr gơwèt mơ khai.

⁷Mơya Yàng Tom Trồ ò niam nùs bơh gơnoar sồr hơ̆, mơ Yàng lơh glài Israel.

⁸Dabit đơs mơ Yàng Tom Trồ lah: “Añ neh tìs glài dờng ngan tòm bơta do. Mơya tŭ do añ hòi dan mơ Yàng, dan tă sang bơta tồi glài do bơh di cau duh broă Kơnràñ dê. Bơh añ neh lơh tùl gơla ngan.”

⁹Yàng Jehôwa đơs mơ Gat la cau gơnoar git lài Dabit dê lah:

¹⁰“Lòt tĕ đơs mơ Dabit lah: Yàng Jehôwa đơs be do: ‘Pe bơta Añ ơn mê in, sac rwah tĕ dô bơta nàng Añ lơh bơta hơ̆ mê in.’”

¹¹Behơ̆ Gat lòt tus hơ Dabit mơ đơs lah: “Yàng Jehôwa đơs be do: ‘Mê sac rwah tĕ:

¹²pe nam jơgloh rung, hala pe kơnhai phà tơnroh bơh ală cau sò tơm mê dê, tòm tŭ cau sò tơm at đào ting bàn mê, hala pe ngai kong đào Yàng Tom Trồ dê, hơ̆ la kòp jê pluh plàng tòm lơgar, gơs cau gơnrơh Yàng Jehôwa dê tơnroh làm bă tiah tòm Israel.’ Behơ̆ tŭ do, lơh nền tĕ bơta ho wơl nàng añ ho wơl mơ bơtau neh sồr añ.”

¹³Dabit đơs mơ Gat lah: “Añ ơm tòm bơta bòl glar dờng ngan. Dan lòi añ dùh tòm tê Yàng Jehôwa dê, bơh bơta nđàc sơngit Kơnràñ dê la dờng ngan; mơya dan bañ lòi añ dùh tòm tê kòn mơnus dê.”

¹⁴Behơ̆ Yàng Jehôwa đùh bơta pluh plàng hơđang Israel, mơ poh jơt rbô nă cau klau Israel gơpừ chơt.

¹⁵Mơ Yàng Tom Trồ sồr dô nă cau gơnrơh tus tơnroh Jerusalem; mơya tòm tŭ cau gơnrơh tơnroh gơ, gen Yàng Jehôwa gŏ bơta hơ̆ mơ tơmù nùs bơh bơta rung rài, Kơnràñ đơs mơ cau gơnrơh ơm tơnroh lah: “Tơl rau! Dơh tĕ tê mê dê.” Cau gơnrơh ơm ntào di làn jă kòi Arauna la cau Jebusit.

¹⁶Dabit tơnggòr sền mơ gŏ cau gơnrơh Yàng Jehôwa dê ntào digùl trồ mơ tiah, gơs dô nơm đào neh tă bơh di sơmprồm at tòm tê pò hơđang Jerusalem. Gen Dabit mơ ală cau kwang kra neh soh ƀào kiat tơmbic să blup mat tòm ù.

¹⁷Dabit đơs mơ Yàng Tom Trồ lah: “Ơ Jehôwa Yàng Tom Trồ añ jê, hơ̆ ò di la añ neh ai gơnoar sồr kòp khà làng bol ò ơ? Añ la cau neh tìs glài mơ neh lơh tìs. Mơya mpồl belàt do, ñchi bơta bol khai neh lơh taih? Añ hòi dan, lòi tê Yàng tòmdră mơ añ mơ tòmdră mơ hìu nhă añ, mơya bañ lòi làng bol Kơnràñ kong bơta pluh plàng.”

¹⁸Gen cau gơnrơh Yàng Jehôwa dê ai jơnau sồr Gat yal Dabit in pal lòt mơ bơt dô nơm cơnòng duh khoai Yàng Jehôwa in tòm làn jă kòi Arauna cau Jebusit dê.

¹⁹Behơ̆ Dabit guh jat be jơnau Gat neh nting sồr, hơ̆ la jơnau khai neh đơs ai sơnđan Yàng Jehôwa.

²⁰Arauna wơlke mơ gŏ cau gơnrơh; mơ poan nă kòn klau khai dê ơm mơ khai dô pồn să bol khai dê, Arauna kư̆ ơm pơrjòt kòi mi.

²¹Tòm tŭ Dabit tus rềp, mơ tòm tŭ Arauna tơnggòr sền mơ gŏ khai, gen Arauna lik bơh làn jă kòi mơ tơmbic să blup mat tòm ù di đap Dabit.

²²Dabit đơs mơ Arauna lah: “Dan ai añ in tiah tòm làn jă kòi mê dê nàng añ bơt dô nơm cơnòng duh khoai Yàng Jehôwa in tềng hơ̆, dan tac tĕ añ in mơ khà priă di pal wil tơl, nàng bơta pluh plàng pleh bơh di làng bol.”

²³Arauna đơs mơ Dabit lah: “Dan bơtau ai tĕ gơ; dan bơtau la cau tòm añ jê lơh bơta lơi niam nùs bơtau. Do, añ rơp ơn ală kơnrồ nàng lơh gơs phan ơn chu pơrguc, ơn ală phan ngui pơrjă kòi lơh gơs lòng, mơ ơn kòi mi lơh gơs phan ơn mơ kòi mbo. Añ rơp ơn jơh ală phan do.”

²⁴Mơya bơtau Dabit đơs lah: “Ò di ò, añ lơh nền la pal tơm jat khà priă di pal wil tơl. Añ rơp ò ai phan mê dê mơ ơn Yàng in, hala ơn dô nơm phan ơn chu pơrguc mơ añ ò pal tơm dô êt lơi.”

²⁵Behơ̆ Dabit tơm Arauna in prau rhiang sieklơ màh nàng blơi tiah hơ̆.

²⁶Dabit bơt dô nơm cơnòng duh khoai tềng hơ̆ Yàng Jehôwa in mơ ơn ală phan ơn chu pơrguc mơ ală phan ơn ring lơngai. Khai hòi dan mơ Yàng Jehôwa mơ Yàng Jehôwa ho wơl khai in, ai ồs bơh đang trồ mù hơđang cơnòng duh khoai ơn phan chu pơrguc.

²⁷Gen Yàng Jehôwa đơs mơ cau gơnrơh, mơ cau gơnrơh srồm đào khai dê tòm sơmprồm gơ dê.

²⁸Tòm tŭ hơ̆, tŭ Dabit gŏ Yàng Jehôwa neh ho wơl khai in di làn jă kòi Arauna cau Jebusit dê, gen Dabit ơn ală phan ơn pơdơng tềng hơ̆.

²⁹Hìu ing duh khoai Yàng Jehôwa dê mơ Môise neh lơh tòm ƀlàng bràs, mơ cơnòng ơn phan duh khoai chu pơrguc tòm tŭ hơ̆ ơm di tiah jơnhoa Gabaôn dê.

³⁰Mơya Dabit ò rgơi lòt tus di tiah hơ̆ nàng hòi lùp Yàng Tom Trồ, tài bơh khai rngòt di đào cau gơnrơh Yàng Jehôwa dê.