Read koho I Yal Yau 24 Bible Online

I Yal Yau 24 - koho bible

I Yal Yau 24

¹Ală kòn sau Arôn geh cah ală bơnòr be do: Ală kòn klau Arôn dê la Nadap, Abihu, Eleajar mơ Ithamar.

²Mơya Nadap mơ Abihu neh chơt lài mơ bèp bol khai dê, mơ bol khai ò gơs kòn klau; behơ̆ Eleajar mơ Ithamar gơlik gơs cau gơnoar ơn phan duh khoai.

³Bal mơ Jadôk la dô nă tòm ală kòn klau Eleajar dê mơ Ahimelek la dô nă tòm ală kòn klau Ithamar dê, gen Dabit bơtào bol khai jat be broă neh lơh nền bol khai in duh broă.

⁴Bơh di tŭ khà cau at bồ jòi bàn digùl ală kòn sau Eleajar gal rlau mơ khà cau at bồ digùl cau Ithamar, mơ bol khai geh rơndap hơđơm jơt prau nă cau lam bồ tòm hìu nhă bơh di kòn sau Eleajar dê, mơ phàm nă tòm ală kòn klau Ithamar.

⁵Bol khai bơtào bol hơ̆ bơh bơta tă khà, bơh gơs ală cau kwang duh broă tòm tiah sàng goh mơ ală cau kwang duh broă Yàng Tom Trồ dê digùl bàr đah kòn sau Eleajar mơ Ithamar dê.

⁶Semaya cau gơnoar cih kòn klau Nethanel cau Lebi, cih sơnđan bol khai dê di đap cau bơtau mơ ală cau kwang la Jadôk cau gơnoar ơn phan duh khoai, Ahimelek kòn klau Abiatha mơ ală cau lam bồ hìu nhă ală cau gơnoar ơn phan duh khoai mơ ală cau Lebi, dô hìu nhă jơi bơtiàn neh geh sac rwah Eleajar in, mơ dô hìu nhă sac rwah Ithamar in.

⁷Tă khà dơ̆ sơnròp di Jehôyarip, khà dơ̆ bàr di Jedaja,

⁸khà dơ̆ pe di Harim, khà dơ̆ poan di Seôrim,

⁹khà dơ̆ pram di Malkija, khà dơ̆ prau di Mijamin,

¹⁰khà dơ̆ poh di Hakkôs, khà dơ̆ phàm di Abija,

¹¹khà dơ̆ sin di Jesua, khà dơ̆ jơt di Sekania,

¹²khà dơ̆ jơt dùl di dê Eliasip, khà dơ̆ jơt bàr di Jakim,

¹³khà dơ̆ jơt pe di Huppa, khà dơ̆ jơt poan di Jesebeap,

¹⁴khà dơ̆ jơt pram di Bilgah, khà dơ̆ jơt prau di Immer,

¹⁵khà dơ̆ jơt poh di Hejir, khà dơ̆ jơt phàm di Happijes,

¹⁶khà dơ̆ jơt sin di Pethahia, khà dơ̆ bàr jơt di Jeheskel,

¹⁷khà dơ̆ bàr jơt dùl di Jakin, khà dơ̆ bàr jơt bàr di Gamul,

¹⁸khà dơ̆ bàr jơt pe di Delaja, khà dơ̆ bàr jơt poan di Maajiah.

¹⁹Ală cau hơ̆ bol khai neh bơtào nàng duh broă tòm tŭ bol khai mut tòm hìu Yàng Jehôwa dê, jat be ală bơta sồr lam neh bơtào bol khai in bơh Arôn ồng pàng bol khai dê, jat jơnau Jehôwa Yàng Tom Trồ Israel dê neh sồr khai.

²⁰Mơ pơnah gam wơl tòm ală kòn klau cau Lebi dê: Tòm ală kòn klau Amram, Subael; bơh di ală kòn klau Subael gơs Jedeya.

²¹Đah Rehabia: Tòm ală kòn klau Rehabia, Issia la cau lam bồ.

²²Bơh di cau Isharit gơs Selômôt; bơh di ală kòn klau Selômôt gơs Jahat.

²³Ală kòn klau Hebrôn dê la: Jeria kòn tơnhoa, Amaria dơ̆ bàr, Jahasiel dơ̆ pe, mơ Jekameam dơ̆ poan.

²⁴Kòn klau Usjiel la Mika; bơh di ală kòn klau Mika gơs Samir.

²⁵Oh Mika la Issia; bơh di ală kòn klau Issia gơs Sacari.

²⁶Ală kòn klau Merari la Mali mơ Musi. Kòn klau Jaajia la Benô.

²⁷Ală kòn klau Merari bơh di Jaajia gơs Benô, Sôham, Jakur mơ Ibri.

²⁸Bơh di Mali gơs Eleajar, khai ò gơs kòn klau.

²⁹Bơh di Kis, ală kòn klau Kis la Jerameel.

³⁰Mơ ală kòn klau Musi dê la Mali, Eder mơ Jerimôt. Hơ̆ la ală cau Lebi jat hìu nhă bol khai dê.

³¹Bol khai kung tă khà, tòm toh kung be ală oh mi bol khai dê la ală kòn sau Arôn neh lơh, di đap bơtau Dabit mơ Jadôk, Ahimelek, mơ ală cau at bồ hìu nhă ală cau gơnoar ơn phan duh khoai dê mơ ală cau Lebi dê. Cau at bồ hìu nhă kung be ală hìu nhă ală cau oh put kung geh tă khà.