Read koho I Yal Yau 26 Bible Online

I Yal Yau 26 - koho bible

I Yal Yau 26

¹Ală mpồl cau kơp gàr mpồng: Bơh di cau Kôra: Meselemia kòn klau Kôre, dô nă tòm ală kòn klau Asap dê.

²Meselemia gơs ală kòn klau la Sacari kòn tơnhoa, Jediael kòn dơ̆ bàr, Jebadia kòn dơ̆ pe, Jatniel kòn dơ̆ poan,

³Elam kòn dơ̆ pram, Jehôhanan kòn dơ̆ prau, mơ Eliehôenai kòn dơ̆ poh.

⁴Ôbet Edôm kung gơs ală kòn klau la Semayah kòn tơnhoa, Jehôjabat dơ̆ bàr, Jôa kòn dơ̆ pe, Sakar kòn dơ̆ poan, Nethanel kòn dơ̆ pram,

⁵Ammiel kòn dơ̆ prau, Isakar kòn dơ̆ poh, mơ Peullethai kòn dơ̆ phàm; bơh Yàng Tom Trồ neh ai lơngai Ôbet Edôm in.

⁶Semaya kòn klau khai dê kung gơs ală kòn klau neh deh la ală cau gơs gơnoar tòm hìu nhă bèp bol khai dê tài bơh bol khai la ală cau chài rgơi ngan.

⁷Ală kòn klau Semaya dê la Ôtni, Rephael, Ôbet mơ Eljabat; cau gơp bơtiàn khai dê la Elihu mơ Semakia kung la ală cau chài rgơi ngan.

⁸Jơh ală cau do la kòn sau Ôbet Edôm dê, bol khai mơ ală kòn klau mơ ală gơp bơtiàn bol khai dê la ală cau chài rgơi gơs bơta pràn kơldang nàng lơh broă, jơh ală kòn sau Ôbet Edôm dê la prau jơt bàr nă.

⁹Meselemia gơs ală kòn klau mơ gơp bơtiàn la cau chài rgơi, jơh tơl nă la jơt phàm nă.

¹⁰Hôsa cau Merari gơs ală kòn klau la Simri kòn tơnhoa (bulah khai ò di la kòn tơnhoa, bèp khai bơtào gơs cau lam bồ),

¹¹Hilkia kòn dơ̆ bàr, Tabalia dơ̆ pe mơ Sacari dơ̆ poan. Jơh ală kòn klau mơ gơp bơtiàn Hôsa dê la jơt pe nă.

¹²Ală mpồl cau kơp gàr mpồng do jat tòm toh be ală cau at bồ bol khai dê, be ală cau gơp bơtiàn bol khai dê neh lơh, duh broă tòm hìu Yàng Jehôwa dê.

¹³Ală khà neh tă kòp nă cau kơp gàr mpồng in jat be hìu nhă bol khai dê, cau kra mơ cau pơnu kung ndròm bal.

¹⁴Khà neh tă mpồng đah mattơngai lik in di Selemia. Lồc behơ̆, ală khà neh tă kòn klau Sacari in, dô nă cau bơyai broă git kơrhia, mơ khà neh tă khai dê di hơ mpồng đah đang.

¹⁵Khà neh tă mpồng đah đơm in di di Ôbet Edôm, mơ khà neh tă hìu prap phan in di ală kòn klau khai dê.

¹⁶Khà neh tă mpồng đah mattơngai mut di gùng hơđang di Suppim mơ Hôsa. Mpồl cau kơp gàr do mơ mpồl cau kơp gàr ne la ndròm bal.

¹⁷Gơs prau nă cau Lebi tòm dô ngai di đah mattơngai lik, poan nă tòm dô ngai di đah đang, poan nă tòm dô ngai di đah đơm, mơ bàr nă dô dơ̆ di hìu prap phan.

¹⁸Đah pơnah ƀlàng hìu đah mattơngai mut gơs poan nă tòm gùng mơ bàr nă tòm ƀlàng gơ dê.

¹⁹Hơ̆ la ală mpồl cau kơp gàr mpồng la ală kòn sau Kôra mơ Merari dê.

²⁰Ală oh mi cau Lebi bol khai dê gơs broă tòm sền gàr ală đam jàr hìu Yàng Tom Trồ dê mơ ală đam jàr prap ală phan neh ơn is Yàng in.

²¹Ală kòn sau Ladan la cau mpồl Gersôn mơ la ală cau tòm at bồ hìu nhă gơrê bal mơ Ladan cau Gersôn, la Jehieli,

²²ală kòn klau Jehieli, Jetham mơ oh khai la Jôel. Bol khai gơs broă sền gàr ală đam jàr tòm hìu duh khoai Yàng Jehôwa dê,

²³Bơh di cau Amram, cau Ishar, cau Hebrôn mơ cau Usjiel gơs

²⁴Subael, dô nă kòn sau Gersôn kòn klau Môise, la dô nă cau kwang gơs broă sền gàr ală đam jàr.

²⁵Ală gơp bơtiàn khai dê tòm mpồl Eliejer gơs Rehabia kòn klau Eliejer, Jesaya kòn klau Rehabia, Jôram kòn klau Jesaya, Jikri kòn klau Jôram, mơ Selômit kòn klau Jikri.

²⁶Selômit mơ ală gơp bơtiàn khai dê gơs broă tòm sền gàr jơh ală đam jàr prap gàr ală phan neh ơn is bơh bơtau Dabit, bơh ală cau tòm at bồ ală hìu nhă la ală cau kwang at bồ oă rbô nă mơ ală cau kwang at bồ oă rhiang nă, mơ bơh ală cau kwang at bồ mpồl ling neh geh ơn is.

²⁷Gơs phan ƀà bơh di ală phan tòmpìt ai tòm tŭ tòmlơh bol khai ơn tòm bơta rcang bơt wơl hìu duh khoai Yàng Jehôwa dê.

²⁸Mơ jơh ală phan neh ơn bơh Samuel cau gơnoar hwơr, bơh Sol kòn klau Kis, Apner kòn klau Ner mơ Jôap kòn klau Jeruya, mơ jơh ală phan ndai neh ơn gen geh sền gàr bơh Selômit mơ ală cau gơp bơtiàn khai dê.

²⁹Bơh di cau Ishar gen gơs Kônenia mơ ală kòn klau khai dê neh geh jào ală broă ngài bơh di hìu duh khoai, hơ̆ la gơs kwang at bồ mơ kwang cahrña hơđang Israel.

³⁰Bơh di cau Hebrôn gen gơs Hasabia mơ ală cau gơp bơtiàn khai dê la dô rbô poh rhiang cau chài rgơi, gơs broă gơwèt hơ cau Israel đah mattơngai mut hiòng Jordan, bơh jơh ală broă Yàng Jehôwa dê mơ bơh bơta duh broă cau bơtau.

³¹Ai pơnah đah cau Hebrôn dê gen Jeria la cau at bồ bol khai jat sră cih sơnđan ală hìu nhă bol khai dê. Tòm nam jơt poan rài at bồ Dabit dê, cau jòi sơwì tòm ală sră cih sơnđan, mơ jòi bàn ală cau chài rgơi tòm mpồl cau Hebrôn tòm Jaser bal mơ Galaat.

³²Jeria gơs bàr rbô poh rhiang cau gơp bơtiàn la cau chài rgơi mơ la cau at bồ hìu nhă, mơ Dabit jào bol khai in broă tòm hơđang cau Ruben, cau Gat mơ nggùl jơi bơtiàn cau Manase bơh jơh ală bơta gơwèt hơ Yàng Tom Trồ mơ bơh ală broă gơwèt hơ cau bơtau.