Read koho I Yal Yau 27 Bible Online

I Yal Yau 27 - koho bible

I Yal Yau 27

¹Do la sră cih cau Israel dê bơh ală cau at bồ hìu nhă, ală cau kwang at bồ dô rbô nă mơ ală cau kwang at bồ dô rhiang nă, mơ ală cau kwang at bồ bol khai dê la ală cau duh broă cau bơtau tòm jơh ală broă gơwèt hơ ală mpồl tus mơ lòt lơh broă kòp kơnhai tòm jơh dô nam. Kòp mpồl gơs bàr jơt poan rbô nă.

²Cau kwang at bồ mpồl ling dơ̆ dùl tòm kơnhai dùl la Jasôbeam kòn klau Japdiel. Gơs bàr jơt poan rbô cau tòm mpồl khai dê.

³Khai la kòn sau Peres dê, mơ la cau kwang at bồ jơh ală cau kwang ling gơs broă tòm tòm kơnhai dơ̆ dùl.

⁴Cau kwang at bồ mpồl ling kơnhai bàr la Dôdai cau Ahô; Miklôt la cau at bồ mpồl khai dê. Gơs bàr jơt poan rbô cau tòm mpồl khai dê.

⁵Cau kwang at bồ mpồl ling dơ̆ pe duh broă tòm kơnhai dơ̆ pe la Benayah kòn klau Jehôyada cau gơnoar ơn phan duh khoai. Khai la cau at bồ mơ gơs bàr jơt poan rbô cau tòm mpồl khai dê.

⁶Do la Benayah cau gơs gơnoar pràn digùl mpồl Pe Jơt nă mơ at bồ khà dùl mpồl hơ̆. Ammijabat kòn klau khai dê kung la cau at bồ mpồl ling do dê.

⁷Cau kwang at bồ mpồl ling dơ̆ poan duh broă tòm kơnhai poan la Asael oh Jôap dê, Jebadia kòn klau khai dê tơnơ̆ ala khai. Gơs bàr jơt poan rbô nă cau tòm mpồl khai dê.

⁸Cau kwang at bồ mpồl ling dơ̆ pram duh broă tòm kơnhai pram la Samhut cau Isra. Gơs bàr jơt poan rbô cau tòm mpồl khai dê.

⁹Cau kwang at bồ mpồl ling dơ̆ prau duh broă tòm kơnhai prau la Ira kòn klau Ikkes cau Tekôa. Gơs bàr jơt poan rbô cau tòm mpồl khai dê.

¹⁰Cau kwang at bồ mpồl ling dơ̆ poh duh broă tòm kơnhai poh la Heles cau Pelôn, la cau Epraim. Gơs bàr jơt poan rbô cau tòm mpồl khai dê.

¹¹Cau kwang at bồ mpồl ling dơ̆ phàm duh broă tòm kơnhai phàm la Sipbekai cau Husa, la cau Jerah.

¹²Cau kwang at bồ mpồl ling dơ̆ sin duh broă tòm kơnhai sin la Abiejer cau Anatôt, la cau Benjamin. Gơs bàr jơt poan rbô cau tòm mpồl khai dê.

¹³Cau kwang at bồ mpồl ling dơ̆ jơt duh broă tòm kơnhai jơt la Maharai cau Netôphat, la cau Serah. Gơs bàr jơt poan rbô cau tòm mpồl khai dê.

¹⁴Cau kwang at bồ mpồl ling dơ̆ dơ̆ jơt dùl duh broă tòm kơnhai jơt dùl la Benayah, cau Phirathôn, la cau Epraim. Gơs bàr jơt poan rbô cau tòm mpồl khai dê.

¹⁵Cau kwang at bồ mpồl ling dơ̆ jơt bàr duh broă tòm kơnhai jơt bàr la Heldai cau Netôphat, bơh di hìu nhă Ôtniel. Gơs bàr jơt poan rbô cau tòm mpồl khai dê.

¹⁶Do la ală cau kwang at bồ hơđang ală jơi bơtiàn Israel dê: Eliejer kòn klau Jikri at bồ cau Ruben; Sephatia kòn klau Maaka at bồ cau Simeôn;

¹⁷Hasabia kòn klau Kemuel at bồ cau Lebi: Jadôk at bồ cau Arôn;

¹⁸Elihu, dô nă oh mi Dabit dê, at bồ Juda; Ômri kòn klau Mikael at bồ Issaka;

¹⁹Ismaya kòn klau Ôbadia at bồ Jebulun; Jerimôt kòn klau Ajriel at bồ Neptali;

²⁰Hôsea kòn klau Ajajia at bồ Epraim; Jôel kòn klau Pedaia at bồ nggùl jơi bơtiàn Manase;

²¹Ikdô kòn klau Sacari at bồ nggùl jơi bơtiàn Manase tòm Galaat; Jaasiel kòn klau Apner at bồ Benjamin;

²²Ajarel kòn klau Jerôham at bồ Dan. Hơ̆ la ală cau kwang at bồ ală jơi bơtiàn Israel dê.

²³Dabit ò cih khà ală cau klau gơs bàr jơt sơnam hala dềt rlau, tài bơh Yàng Jehôwa neh ho lơh ntum khà cau Israel gơlik gơs gal ngan kung be ală sơmañ hơđang trồ.

²⁴Jôap kòn klau Jeruya rơp sơntòm kòp khà ală cau klau mơya òhềt kòp sir. Bơta gơjrañ dờng neh tus hơđang Israel tài bơh bơta kòp khà do, mơ ntum khà neh ò cih tòm sră yal broă kòp nam bơtau Dabit dê.

²⁵Asmabet kòn klau Adiel gơs broă tòm hơđang ală đam jàr bơtau dê. Jônathan kòn klau Ujia gơs broă tòm hơđang ală đam jàr tòm ală kơnhwàl, ală ƀòn dờng, ală ƀòn dềt mơ ală theng kơp gàr.

²⁶Ejri kòn klau Kelup gơs broă tòm at bồ ală cau lơh broă tòm ƀlàng sre nàng tùc tam tòm lơgar.

²⁷Simei cau Ramat gơs broă tòm gơwèt hơ ală suơn ño, Japdi cau Sip gơs broă tòm gơwèt hơ plai đo suơn ño dê nàng lơh gơs tơrnòm ño.

²⁸Baal Hanan cau Geder gơs broă tòm hơđang ală suơn ôlibe mơ suơn chi ƀal tòm Sephela. Jôas gơs broă tòm rcang prap mơñà.

²⁹Hơđang ală mpồl phan poan jơng sa ñhơt tòm Sarôn gơs Sitrai cau Sarôn. Hơđang ală mpồl phan poan jơng tòm ală thòng gơs Saphat kòn klau Adlai.

³⁰Hơđang ală làkđa gơs Ôbil cau Ismael. Hơđang ală alàng gơs Jedeja cau Merônôt.

³¹Hơđang ală mpồl belàt gơs Jajis cau Hagrit. Ală cau do la ală cau kwang sền gàr broă gơwèt hơ phan mơna bơtau Dabit dê.

³²Jônathan, kồñ Dabit, la dô nă cau jak chài mơ àng loh mơ la cau bơyai broă jak chài. Jehiel kòn klau Hakmôni kơlôi rcang bơh ală kòn klau Dabit dê.

³³Ahitôphel la cau cri bơyai broă bơtau dê. Husai cau Arkit la bơyô bơtau dê.

³⁴Jehôyada kòn klau Benayah mơ Abiatha pơrdòn Ahitôphel. Jôap la cau kwang at bồ mpồl ling cau bơtau dê.