Read koho I Yal Yau 29 Bible Online

I Yal Yau 29 - koho bible

I Yal Yau 29

¹Bơtau Dabit đơs mơ jơh mpồl jơnum làng bol lah: “Salômôn kòn klau añ la cau mơ Yàng Tom Trồ neh sac rwah la gam kơnòm mơ ò git làm, mơ broă lơh do la dờng, tài bơh hìu duh khoai rơp ò di la kòn mơnus in mơya Jehôwa Yàng Tom Trồ in.

²Behơ̆ añ neh rcang ơn hìu duh khoai Yàng Tom Trồ in, rlau mơ bơta añ rgơi lơh, màh nàng lơh ală phan mơ màh, priă nàng lơh ală phan mơ priă, kòng nàng lơh ală phan mơ kòng, lòs nàng lơh ală phan mơ lòs, mơ chi nàng lơh ală phan mơ chi, bal mơ lŭ kĕ pơrhê nàng bơka, ală lŭ gơs tơl dà krơi is, mơ tơl ală bơta lŭ niam mơ lŭ màng tơlir, jơh ală phan hơ̆ neh gơs tơngkah tơngkañ.

³Rlau mơ hơ̆, bơtơl mơ jơh ală bơta añ neh rcang hìu sàng goh in, añ neh prap lòi màh mơ priă tòm añ jê, mơ tài bơh phan añ ơn hìu Yàng Tom Trồ añ jê, añ ơn gơ hìu Yàng Tom Trồ añ in:

⁴pe rbô talơng màh Ôphir mơ poh rbô talơng priă goh ngan nàng ƀềp ală dơrñang hìu duh khoai,

⁵nàng lơh sir ală broă bơh ală cau chài tŏ tiar, màh nàng lơh ală phan mơ màh, priă nàng lơh ală phan mơ priă. Gen ñcau gơs nùs kòñ ơn is să tòm Yàng Jehôwa in tòm ngai do taih?”

⁶Gen ală cau at bồ hìu nhă, ală cau kwang at bồ ală jơi bơtiàn Israel, ală cau kwang at bồ dô rbô nă mơ ală cau kwang at bồ dô rhiang nă, mơ ală cau kwang gơs broă tòm at bồ broă lơh bơtau dê, bol khai jat nùs kòñ bol khai dê ơn phan Yàng in.

⁷Bol khai ơn tòm broă hìu Yàng Tom Trồ dê pram rbô talơng mơ jơt rbô darik màh, jơt rbô talơng priă, jơt phàm rbô talơng kòng mơ dô rhiang rbô talơng lòs.

⁸Cau lơi gơs ală lŭ màng gen ai gơtơmut tòm đam jàr hìu duh khoai Yàng Jehôwa dê, tòm bơta sền gàr Jehiel cau Gersôn.

⁹Behơ̆ làng bol hòn chò bơh ală cau kwang hơ̆ niam nùs ơn phan bol khai dê, bơh bol khai jơh nùs mơ khat gơboh ơn Yàng Jehôwa in. Bơtau Dabit kung hòn chò dờng ngan.

¹⁰Dabit jòng ro Yàng Jehôwa di đap jơh mpồl làng bol, mơ đơs lah: “Jòng ro Kơnràñ, ơ Yàng Jehôwa la Yàng Tom Trồ Israel ồng pàng bol hi dê gam sùm sùm mơ ò lồi.

¹¹Ơ Yàng Jehôwa, bơta dờng màng, gơnap gơnoar, gơklŏ, bơta pha lin mơ bơta ryŭ ryơm, Kơnràñ dê, bơh jơh ală bơta hơđang trồ mơ tòm ù gơrê bal mơ Kơnràñ. Ơ Yàng Jehôwa, lơgar gơrê bal mơ Kơnràñ; Kơnràñ geh yò tơngguh gơs bơtau at bồ hơđang rlau jơh;

¹²Bơta pas sơm mơ bơta jòng màng tus bơh Kơnràñ; Kơnràñ la Bơtau at bồ jơh ală phan. Tòm tê Kơnràñ dê gơs bơta pràn kơldang mơ gơnap gơnoar; mơ hơ̆ la tòm tê Yàng dê lơh gơlik dờng mơ ai pràn kơldang jơh ală cau in.

¹³Mơ tŭ do ơ Yàng Tom Trồ bol hi dê, bol hi ưnngài Kơnràñ mơ jòng ro sơnđan gơklŏ Kơnràñ dê.

¹⁴Mơya añ la ñcau, mơ làng bol añ jê la ñcau, mơ bol hi rgơi ơn Yàng in dô bă khat gơboh behơ̆ taih? Jơh ală phan tus bơh Kơnràñ, mơ bol hi ơn Yàng in ală phan neh gơrê mơ Kơnràñ.

¹⁵Bol hi la cau làng bơdìh mơ cau ơm ing di đap mat Kơnràñ, kung be jơh ală ồng pàng bol hi dê. Ală ngai bol hi dê hơđang ù la kung be dô nơm mƀur, ò gơs bơta gơn kơnòm.

¹⁶Ơ Jehôwa Yàng Tom Trồ bol hi dê, jơh ală phan tơngkah tơngkañ do mơ bol hi neh rcang nàng bơt Yàng in dô nơm hìu bơh Sơnđan Sàng Goh Kơnràñ, jơh ală phan hơ̆ tus bơh di tê Kơnràñ dê, mơ jơh ală phan hơ̆ gơrê bal mơ Kơnràñ.

¹⁷Ơ Yàng Tom Trồ añ jê, añ git la Yàng sền sơwì nùs cau mơ niam nùs di bơta song ngan. Tòm bơta song ngan nùs añ jê, añ neh ơn dô bă khat gơboh jơh ală phan do. Mơ tŭ do añ neh sền gŏ làng bol Kơnràñ dê, la ală cau gơs mat tềng do hòn chò ơn Yàng in dô bă chò nùs.

¹⁸Ơ Jehôwa Yàng Tom Trồ ală ồng pàng bol hi dê la Abraham, Isak, mơ Israel! Dan Kơnràñ prap gàr bơta kơp kòñ mơ bơta kơlôi sơnơng tòm nùs làng bol Kơnràñ dê sùm sùm, mơ lơh nùs bol khai wèt song hơ Yàng.

¹⁹Mơ dan ai Salômôn kòn klau añ jê jơh nùs dòn bơr lơh jat ală jơnau gơnoar sồr, ală bơta sồr lam, mơ ală bơta lơh nền Kơnràñ dê, mơ lơh jơh ală bơta nàng bơt bơtào hìu duh khoai, bơh ală phan hơ̆ añ neh rcang sir.”

²⁰Gen Dabit đơs mơ jơh dô mpồl jơnum lah: “Jòng ro Jehôwa Yàng Tom Trồ bol mê dê.” Behơ̆ jơh tơl nă bol khai jòng ro Jehôwa Yàng Tom Trồ ală ồng pàng bol khai dê; bol khai kun bồ mơ tơmbic să di đap Yàng Jehôwa mơ bơtau.

²¹Ngai tơnơ̆ bol khai ơn ală phan ơn duh khoai mơ phan ơn chu pơrguc Yàng Jehôwa in, dô rbô nơm kơnrồ dam, dô rbô nơm be dam mơ dô rbô nơm belàt dam, bal mơ ală tơrnòm ơn rsìh, mơ ală phan ơn duh khoai tơngkah tơngkañ jơh Israel in.

²²Mơ bol khai sa mơ ñô di đap mat Yàng Jehôwa tòm ngai hơ̆ gơs bơta hòn chò dờng. Bol khai pồ bơtào Salômôn kòn klau Dabit gơs bơtau dơ̆ bàr; bol khai bong mơñà khai lơh gơs bơtau at bồ, mơ Jadôk gơs cau gơnoar ơn phan duh khoai.

²³Behơ̆, Salômôn nggui hơđang sơbàn bơh gơnoar Yàng Jehôwa dê neh bơtào, pơrdòn ala Dabit bèp khai dê. Khai geh bơtào tơngguh mơ jơh lơgar Israel dòn bơr khai.

²⁴Jơh ală kwang at bồ, ală cau kwang at bồ mpồl ling bal mơ jơh ală kòn klau bơtau Dabit dê kung ho rơp dòn duh bơtau Salômôn.

²⁵Yàng Jehôwa yò tơngguh Salômôn jơnhoa ngan di đap jơh Israel mơ ai khai in bơta ryŭ ryơm cau bơtau dê, mơ òhềt gơs bơtau lơi lài mơ khai tòm Israel neh geh behơ̆.

²⁶Dabit kòn klau Jesse at bồ hơđang jơh Israel be do.

²⁷Khai at bồ hơđang Israel tòm poan jơt nam, hơ̆ la poh nam tòm Hebrôn mơ pe jơt pe nam tòm Jerusalem.

²⁸Khai chơt tòm tŭ jòng sơnam ngan, wil tơl tòm rài kis, pas sơm, mơ geh dờng màng. Salômôn kòn klau khai pơrdòn at bồ sơbàn khai dê.

²⁹Bơh jơh ală broă bơtau Dabit dê, bơh sơnròp tus di lồi dut, gen geh cih tòm sră yal yau cau gơnoar hwơr Samuel dê, tòm sră yal yau cau gơnoar hwơr Nathan dê, mơ tòm sră yal yau cau gơnoar hwơr Gat dê,

³⁰bal mơ jơh ală bơta bơh rài at bồ mơ gơnoar pràn khai dê, bơh ală bơta neh gơlik gơs di khai, di Israel mơ di ală lơgar at bồ tòm plai ù.