Read koho I Yal Yau 4 Bible Online

I Yal Yau 4 - koho bible

I Yal Yau 4

¹Ală kòn klau Juda la: Peres, Hesrôn, Karmi, Hur, mơ Sôbal.

²Reaya kòn klau Sôbal la bèp Jahat, mơ Jahat la bèp Ahumai mơ Lahat. Hơ̆ la ală hìu nhă mpồl Jôrathit.

³Do la ală kòn klau Etam dê: Jejreel, Isma mơ Itbas; mơ sơnđan ruh bol khai la Hajelelpôni,

⁴mơ Penuel la bèp Gedôr, mơ Ejer la bèp Husa. Hơ̆ la ală kòn klau Hur dê, kòn tơnhoa Ephrat la bèp Betlehem dê.

⁵Asur bèp Tekôa gơs bàr nă bau ùr la Hela mơ Naara;

⁶Naara deh khai in Ahujam, Hepher, Temeni mơ Haahastari. Hơ̆ la ală kòn klau Naara.

⁷Ală kòn klau Hela la: Jeret, Ijar, mơ Ethnan.

⁸Kôs la bèp Anup, Jôbeba, mơ ală hìu nhă Aharhel kòn klau Harum dê.

⁹Jabes geh sền dờng màng rlau mơ ală oh mi khai, mơ mè khai neh tơmoh sơnđan khai la Jabes, mơ đơs lah: “Tài bơh añ neh deh khai tòm bơta bòl glar.”

¹⁰Jabes hòi dan mơ Yàng Tom Trồ Israel dê, mơ đơs lah: “Ơ Yàng, dan ai lơngai añ in, mơ pò ơnàng nhàr sre brê añ jê, dan tê Kơnràñ ơm bal mơ añ, mơ dan Kơnràñ sền gàr añ klàs bơh di bơta jê sồt lơh añ in bòl glar.” Mơ Yàng Tom Trồ ai khai in bơta khai hòi dan.

¹¹Kelup oh Suha la bèp Mehir, Mehir la bèp Estôn.

¹²Estôn la bèp Betrapha, Pasea, mơ Tehinna la bèp Irnahas dê. Hơ̆ la ală cau klau Reka.

¹³Ală kòn klau Kenas la: Ôtniel mơ Seraia; mơ ală kòn klau Ôtniel la: Hathat mơ Meônôthai.

¹⁴Meônôthai la bèp Ôpra; mơ Seraia la bèp Jôap la bèp Geharasim dê, tài bơh hơ̆ bol khai geh sơnđan la cau chài lơh broă mơ tê ală phan ngui.

¹⁵Ală kòn klau Kalep, sau Jephune dê la: Iru, Ela, mơ Naam; mơ kòn klau Ela la Kenas.

¹⁶Ală kòn klau Jehallelel la: Jip, Jipha, Tiria, mơ Ajarel.

¹⁷Ală kòn klau Ejra dê la: Jether, Meret, Epher mơ Jalôn. Hơ̆ la ală kòn klau Bithia la kòn ùr Pharaôn mơ Meret neh bau mơ bun deh Miriam, Sammai, mơ Isba la bèp Estemoa dê.

¹⁸Mơ bau ùr cau Jude khai dê deh Jeret la bèp Gedôr, Heber la bèp Sôkô, mơ Jekuthiel la bèp Janoa dê. Do la ală kòn Bithia kòn ùr Pharaôn dê, mơ Meret neh bau.

¹⁹Ală kòn klau bau Hôdiah dê, oh ùr Naham, la bèp Keilah cau Germit, mơ Estemoa cau Maakathit.

²⁰Ală kòn klau Simôn la: Ammôn, Rinna, Benhanan, mơ Tilôn. Ală kòn klau Isi la Jôhet mơ Benjôhet.

²¹Ală kòn klau Sela kòn klau Juda dê la: Er bèp Leka, Laada bèp Maresa, mơ ală hìu nhă cau tàñ bài che dơmài ơm tòm Bet Asbea;

²²mơ Jôkim, mơ ală cau tòm Kôjeba, mơ Jôas, mơ Sara neh at bồ tòm Môap mơya neh rê wơl hơ Lehem (ală sră cih yal yau do la bơh rài yau).

²³Hơ̆ la ală cau chài mòn gri mơ ù mơ la cau ơm tòm Netaim mơ Gederah; bol khai ơm tềng hơ̆ bal mơ cau bơtau mơ duh broă khai.

²⁴Ală kòn klau Simeôn dê la: Nemuel, Jamin, Jarip, Jera, Sol;

²⁵Sol tơnggơs Sallum, Sallum tơnggơs Mipsam, Mipsam tơnggơs Misma.

²⁶Ală kòn klau Misma la: Misma tơnggơs Hammuel, Hammuel tơnggơs Sakkur, Sakkur tơnggơs Simei.

²⁷Simei gơs jơt prau nă kòn klau mơ prau nă kòn ùr; mơya ală oh mi khai ò gơs oă kòn sau, jơh ală hìu nhă bol khai dê kung ò gơbơtơl oă be ală cau Jude.

²⁸Bol khai kis tòm Beerseba, Môlada, Hasarsual,

²⁹Bilha, Esem, Tôlat,

³⁰Bethuel, Horma, Jiklak,

³¹Bet Markabôt, Hajarsusim, Betbiri, mơ Saaraim. Hơ̆ la ală ƀòn dờng jơl tus di tŭ Dabit gơs bơtau.

³²Mơ ală ƀòn dềt bol khai dê la: Etam, Ain, Rimmôn, Tôchen mơ Asan, pram ƀòn dờng,

³³bal mơ jơh ală ƀòn dềt bol khai dê ơm gùt dar ală ƀòn dờng hơ̆ ngài tus di Baal. Hơ̆ la ală tiah jơnum ƀòn bol khai dê. Mơ bol khai prap gàr sră cih sơnđan jơi bơtiàn hìu nhă bol khai dê.

³⁴Amajiah tơnggơs Mesôbap, Jamlek, Jôsa,

³⁵Jôel, Jehu kòn Jôsibia sau Seraia, se Asiel,

³⁶Eliôenai, Jaakôba, Asia, Adiel, Jesimiel, Benayah,

³⁷Jija kòn Siphi, sau Allôn, se Jedaia, set Simri, Simri la kòn Semayah,

³⁸ală cau geh kòp jat sơnđan do la ală cau at bồ ală hìu nhă bol khai dê, mơ ală mpồl bol khai dê gơbơtơl oă ngan.

³⁹Bol khai lòt tus hơ tiah mut tòm Gedôr ơm đah mattơngai lik thòng dê nàng jòi ƀlàng ñhơt ală mpồl phan poan jơng bol khai in.

⁴⁰Tềng hơ̆ bol khai jòi bàn ƀlàng ñhơt tơlir niam, mơ ù tiah dờng ơnàng ngan, ngềt ngơt mơ ring lơngai, bơh ală cau neh ơm tềng hơ̆ gơrê bal mơ Cam.

⁴¹Ală cau hơ̆ neh geh cih sơnđan mat tòm sră, neh tus tòm rài bơtau Ejekia lơgar Jude dê, mơ brồ lơh ală sàl ơm bol khai dê mơ cau Meunim ơm tềng hơ̆ mơ tơnroh jơh bol khai jơl tus di ngai do, mơ ơm tòm ù tiah bol khai dê, tài bơh tềng hơ̆ gơs ƀlàng ñhơt ală mpồl phan poan jơng bol khai in.

⁴²Mơ gơs cau tòm bol khai la pram rhiang nă cau Simeôn guh hơ mơnơm Seir, gơs ală cau lam bồ bol khai dê la Pelatia, Nearia, Rephaya, mơ Ujiel la ală kòn klau Isi;

⁴³Bol khai tơnroh ală cau Amalek neh dô klàs gam wơl mơ bol khai ơm tềng hơ̆ jơl tus di ngai do.