Read koho I Yal Yau 5 Bible Online

I Yal Yau 5 - koho bible

I Yal Yau 5

¹Do la ală kòn klau Ruben dê. (Khai la kòn klau tơnhoa, mơya tài bơh khai neh lơh ƀơ̆ ƀơl cơnòng bic bèp khai dê gen gơnoar kòn tơnhoa khai dê neh ai ală kòn klau Jôsep la kòn Israel dê, behơ̆ tàng khai ò geh cih tòm sră cih sơnđan jơi bơtiàn jat be gơnoar kòn klau tơnhoa;

²bulah Juda neh gơlik gơs dờng màng digùl ală oh mi khai mơ dô nă cau at bồ neh tus bơh di khai, mơya gơnoar kòn tơnhoa neh gơrê hơ Jôsep.)

³Ală kòn klau Ruben, kòn tơnhoa Israel dê la: Hanôk, Pallu, Hesrôn, mơ Karmi.

⁴Ală kòn klau Jôel dê la: Semaya, kòn klau Semaya la Gok, kòn klau Gok la Simei, kòn klau Simei la Mika,

⁵kòn klau Mika la Reaya, kòn klau Reaya la Baal,

⁶kòn klau Baal la Beera, la cau mơ bơtau Tilglat Pilneser lơgar Asiri neh kup cèng lơh dĭ; khai la cau at bồ ală cau Ruben dê.

⁷Mơ ală cau jơi bơtiàn hìu nhă khai dê tòm tŭ geh cih sơnđan tòm sră cih sơnđan jơi bơtiàn ală rài bol khai dê la: Jiel cau at bồ, mơ Sacari,

⁸mơ Bela kòn klau Asa, sau Sema, se Jôel la cau ơm tòm Arôer, ngài tus hơ Nebô mơ Baal Meôn.

⁹Khai kung ơm đah mattơngai lik, ngài tus di nhàr ƀlàng ngềt ngơt đah do hiòng Ơphrat, tài bơh mpồl phan poan jơng bol khai dê neh gơbơtơl oă tòm lơgar Galaat.

¹⁰Mơ tòm ală ngai Sol dê bol khai tòmlơh mơ cau Hagrit; cau Hagrit neh dùh tòm tê bol khai mơ bol khai ơm tòm ală sàl cau Hagrit dê tòm làm jơh kơnhwàl đah mattơngai lik Galaat dê.

¹¹Ală cau Gat neh ơm di gah bol khai tòm Basan, jơl tus Salekah:

¹²Jôel cau at bồ, Sapham cau dơ̆ bàr; Janai mơ Saphat tòm Basan.

¹³Jơi bơtiàn bol khai dê, jat hìu nhă la: Mikael, Mesullam, Seba, Jôrai, Jakan, Jia mơ Eber, jơh ală la poh nă.

¹⁴Hơ̆ la ală kòn klau Abihail dê. Abihail kòn klau Huri, Huri kòn klau Jarôa, Jarôa kòn klau Galaat, Galaat kòn klau Jaria, Jaria kòn klau Mikael, Mikael kòn klau Jesisai, Jesisai kòn klau Jado, Jado kòn klau Bus;

¹⁵Ahi la kòn klau Apdiel, Apdiel la kòn klau Guni, la cau at bồ hìu nhă bol khai dê.

¹⁶Bol khai ơm tòm Galaat, tòm Basan mơ tòm ală ƀòn dờng gơ dê, mơ tòm jơh ală tiah gơs ƀlàng ñhơt Sarôn dê tus di tiah nhàr gơ dê.

¹⁷Jơh ală cau do neh geh cih sơnđan tòm sră cih sơnđan jơi bơtiàn dê, tòm ală rài at bồ Jôtham bơtau Juda mơ Jerôbôam bơtau Israel dê.

¹⁸Ală cau Ruben, ală cau Gat, mơ nggùl jơi bơtiàn Manase gơs ală cau pràn kơldang tòm bơta tòmlơh, la ală cau at khèl mơ đào, mơ pañ àtak, chài rgơi tòm bơta tòmlơh, gơs poan jơt poan rbô poh rhiang prau jơt nă cau klau rcang sir nàng tòmlơh.

¹⁹Bol khai tòmlơh mơ cau Hagrit, Jetur, Naphis mơ Nôdap.

²⁰Mơ tòm tŭ bol khai geh dòp bơta dong kòl nàng tòmdră mơ ală cau sò tơm, bol khai hòi dan mơ Yàng Tom Trồ tòm bơta tòmlơh; gen Kơnràñ jào cau Hagrit bal mơ mpồl lòt bal mơ bol hơ̆ tòm tê bol khai dê, mơ Kơnràñ ai bol khai in bơta pha lin, tài bơh bol khai dòn kơnòm di Kơnràñ.

²¹Bol khai kup ală phan poan jơng cau Hagrit dê: la pram jơt rbô làkđa, bàr rhiang pram jơt rbô belàt mơ bàr rbô ơseh alàng. Bol khai kung kup cèng dô rhiang rbô nă cau Hagrit,

²²mơ oă ngan cau kong tơnchơt tài bơh bơta tòmlơh hơ̆ la bơta tòmlơh Yàng Tom Trồ dê. Mơ bol khai ơm tòm ù tiah hơ̆ jơl tus di tŭ kong kup cèng lơh dĭ.

²³Ntum khà nggùl jơi bơtiàn Manase ơm kis tòm lơgar la oă ngan; bơh Basan tus hơ Baal Hermôn, Senir, mơ mơnơm Hermôn.

²⁴Do la ală cau at bồ hìu nhă bol khai dê: Epher, Isi, Eliel, Ajriel, Jeremi, Hôdabia mơ Jadiel la ală cau ling khin cha tòmlơh, cau tiơng pơnro, mơ cau at bồ ală hìu nhă bol khai dê.

²⁵Mơya bol khai ò dòn song mơ Yàng Tom Trồ ồng pàng bol khai dê, duh khoai ală yàng rùp ràk ală làng bol tòm lơgar mơ Yàng Tom Trồ neh tơnroh bơh di đap bol khai.

²⁶Behơ̆ Yàng Tom Trồ Israel dê chồl bơtrut hwềng nùs Phul bơtau Asiri (hơ̆ la Tilglat Pilneser bơtau Asiri), khai kup cèng pơrdô ală cau Ruben, cau Gat, mơ nggùl jơi bơtiàn Manase mơ cèng tus Hala, Habor, Hara mơ hiòng Gôjan jơl tus di ngai do.