Read koho II Yal Yau 1 Bible Online

II Yal Yau 1 - koho bible

II Yal Yau 1

¹Salômôn kòn klau Dabit neh bơtào kơ̆ să tòm khai hơđang lơgar khai dê, bơh Jehôwa Yàng Tom Trồ khai dê ơm bal mơ khai mơ lơh khai in gơlik dờng ryŭ rlau oă ngan.

²Gen Salômôn hòi pơjum jơh Israel, ală cau kwang at bồ dô rbô nă, ală cau kwang at bồ dô rhiang nă, ală cau kwang cahrña, ală cau at bồ tòm Israel, mơ ală cau tòm at bồ hìu nhă,

³gen Salômôn bal mơ jơh dô mpồl jơnum lòt tus hơ tiah jơnhoa tòm Gabaôn, bơh tềng hơ̆ neh gơs Sàl Tòm Mat Yàng Tom Trồ dê mơ Môise cau duh broă Yàng Jehôwa neh lơh gơs tòm ƀlàng ngềt ngơt.

⁴(Mơ Dabit neh cèng Đài Yàng Tom Trồ dê bơh di Kiriat Jearim tus hơ tiah khai neh rcang gơ in, bơh bơtau neh bơtào dô nơm sàl gơ in tòm Jerusalem.)

⁵Rlau mơ hơ̆, cơnòng duh khoai lơh mơ kòng mơ Bejalel kòn klau Uria, sau Hur neh lơh gơs, gen ơn di đap Sàl Ing Yàng Jehôwa, Salômôn mơ jơh mpồl làng bol hòi lùp Yàng Jehôwa tềng hơ̆.

⁶Behơ̆ Salômôn guh tus hơ cơnòng duh khoai mơ kòng di đap Yàng Jehôwa tòm Sàl Tòm Mat mơ ơn dô rbô nơm phan ơn duh khoai chu pơrguc hơđang hơ̆.

⁷Tòm mang hơ̆, Yàng Tom Trồ tơlik mat mơ Salômôn mơ đơs mơ khai lah: “Dan tĕ bơta lơi mê kòñ Añ ai mê in.”

⁸Salômôn ho wơl mơ Yàng Tom Trồ lah: “Yàng neh yal tơlik bơta kòñ gơboh kơ̆ dơn dờng mơ Dabit bèp Añ mơ neh bơtào añ gơs bơtau pơrdòn ala khai.

⁹Ơ Jehôwa Yàng Tom Trồ, lòi tĕ jơnau Kơnràñ neh ho mơ Dabit bèp añ, tŭ do gơlik wil tơl, bơh Kơnràñ neh lơh añ in gơlik gơs bơtau at bồ hơđang dô nơm làng bol gal ngan be thul tòm ù.

¹⁰Tŭ do dan ai Añ in bơta jak chài mơ bơta git wă nàng lik mơ mut di đap làng bol do, bơh ñcau rgơi at bồ làng bol dờng do Kơnràñ dê taih?”

¹¹Yàng Tom Trồ đơs mơ Salômôn lah: “Tài bơh hơ̆ la bơta neh gơs tòm nùs mê dê, mơ mê neh ò dan phan mơna, bơta pas sơm hala bơta tiơng pơnro, hala bơta kis ală cau gơjrañ di mê, mơ mê neh ò dan bơta kis jŏ, mơya dan bơta jak chài mơ bơta git wă nàng rgơi at bồ làng bol Añ jê mơ Añ neh lơh mê in gơs bơtau at bồ hơđang bol khai,

¹²gen bơta jak chài mơ bơta git wă rơp geh ai mê in. Mơ Añ kung rơp ai mê in phan mơna, bơta pas sơm mơ tiơng pơnro, tian gơs ò gơs cau bơtau lơi lài mê hala cau bơtau lơi tơnơ̆ mê rơp gơs ndròm be mê.”

¹³Behơ̆ Salômôn ñă lòt bơh tiah jơnhoa Gabaôn, bơh Sàl Tòm Mat tus hơ Jerusalem. Mơ khai at bồ hơđang Israel.

¹⁴Salômôn pơjum tơrgòm ală rơndeh lòs tòmlơh mơ ală ơseh; khai gơs dô rbô poan rhiang rơndeh lòs tòmlơh mơ jơt bàr rbô nơm ơseh mơ khai lòi ală rơndeh lòs tòmlơh tòm ală ƀòn dờng mơ kung lòi bal mơ bơtau tòm Jerusalem.

¹⁵Cau bơtau neh lơh priă mơ màh gơlik gơs phan be òs tòm Jerusalem kung be lŭ, mơ chi pơnàng gơs oă kung be tòm chi ƀal di jơng ală mơnơm.

¹⁶Salômôn blơi ơseh bơh di Ejiptơ mơ bơh di Kue, ală cau kă bro bơtau dê blơi ală ơseh hơ̆ bơh di Kue.

¹⁷Bol khai blơi dô nơm rơndeh lòs tòmlơh bơh Ejiptơ la prau rhiang sieklơ priă, mơ dô nơm ơseh la dô rhiang pram jơt sieklơ priă. Bol khai kung tac wơl mơ jơh ală cau bơtau cau Hetit mơ cau Aram.