Read koho II Yal Yau 10 Bible Online

II Yal Yau 10 - koho bible

II Yal Yau 10

¹Rôbôam lòt hơ Sicem, bơh jơh cau Israel neh lòt tus hơ Sicem nàng bơtào khai gơs bơtau.

²Tòm tŭ Jerôbôam kòn klau Nebat kơno jơnau hơ̆ (bơh khai ơm tòm Ejiptơ la tiah khai neh dô bơh bơtau Salômôn), gen khai rê wơl bơh Ejiptơ.

³Bol khai sồr hòi Jerôbôam, gen khai mơ jơh Israel lòt tus đơs mơ Rôbôam lah:

⁴“Bèp ồng neh ơn yô kơnjơ̆ hơđang bol hi, mơya tŭ do dan lơh nggòc broă lơh bòl glar mơ yô kơnjơ̆ mơ khai neh ơn hơđang bol hi, mơ bol hi rơp duh broă ồng.”

⁵Rôbôam ho bol khai lah: “Tus tĕ wơl mơ añ tòm pe ngai tai.” Behơ̆ làng bol lik lòt.

⁶Gen bơtau Rôbôam bơyai mơ ală cau kra la ală cau neh duh broă Salômôn bèp khai tòm tŭ gam kis, mơ đơs lah: “Mbe ală ồng bơto sơnio añ in jơnau ho wơl làng bol do in taih?”

⁷Bol khai ho lah: “Dilah bơtau gơwèt niam mơ làng bol do, mơ lơh niam nùs bol khai mơ đơs jơnau niam mơ bol khai, gen bol khai rơp lơh gơs cau duh broă bơtau dê sùm sùm.”

⁸Mơya Rôbôam sang lòi jơnau bơto sơnio ală cau kra neh yal khai in, mơ lùp bơyai mơ ală cau pơnu dô rơh mơ khai mơ tŭ do duh broă khai in.

⁹Khai lùp bol hơ̆ lah: “Ñchi jơnau bơto sơnio bol mê dê, nàng bol he ho wơl làng bol do in la ală cau neh đơs mơ añ lah: ‘Dan lơh nggòc yô mơ bèp ồng neh ơn hơđang bol hi’?”

¹⁰Ală cau klau pơnu dô rơh mơ khai ho wơl lah: “Đơs tĕ mơ làng bol neh đơs mơ ồng lah: ‘Bèp ồng neh ơn dô nơm yô kơnjơ̆ hơđang bol hi, mơya lơh tĕ nggòc yô bol hi dê,’ đơs tĕ mơ bol khai lah: ‘Kòn tê dềt añ jê la dờng rlau mơ ngkòi bèp añ.

¹¹Bèp añ neh ơn hơđang bol mê dô nơm yô kơnjơ̆; añ rơp lơh gơ in kơnjơ̆ rlau. Bèp añ pù bol mê mơ gai, añ rơp pù bol mê mơ ală diang.’”

¹²Pe ngai tơnơ̆ Jerôbôam mơ jơh làng bol tus wơl hơ Rôbôam jat be bơtau neh đơs: “Tus wơl tĕ hơ añ tòm pe ngai tai.”

¹³Cau bơtau ho wơl mơ bol khai dô bă kơnjơ̆ kơnjut. Bơtau Rôbôam sang lòi jơnau bơto sơnio ală cau kra dê,

¹⁴khai neh đơs mơ làng bol jat jơnau bơyai ală cau pơnu dê lah: “Bèp añ neh lơh yô bol mê in kơnjơ̆; mơya añ rơp bơtơl gơ in kơnjơ̆ rlau. Bèp añ pù bol mê mơ gai; añ rơp pù bol mê mơ diang.”

¹⁵Behơ̆, bơtau ò iat làng bol, bơh bơta gơpơrlac tòm broă do tus bơh Yàng Tom Trồ nàng Yàng Jehôwa lơh gơlik wil tơl jơnau Kơnràñ neh đơs bơh Ahija cau Silô dê; tòm broă Jerôbôam kòn klau Nebat in.

¹⁶Tòm tŭ jơh Israel neh gŏ bơtau ò bài iat bol khai gen bol khai ho wơl mơ bơtau lah: “Ñchi phan bol he geh tòm Dabit, Bol hi ò gơs sre brê lơi tòm kòn klau Jese dê. Ơ Israel, rê wơl tĕ hơ sàl bol mê dê! Ơ Dabit, sền kơrhia tĕ hìu tòm mê dê!” Behơ̆ jơh cau Israel rê hìu.

¹⁷Mơya Rôbôam at bồ hơđang ală cau Israel gam ơm tòm ală ƀòn dờng Juda dê.

¹⁸Tòm tŭ bơtau Rôbôam sồr Adôniram la cau kwang at bồ ală cau lơh broă bòl glar; mơya cau Israel cơm lŭ tơnchơt khai. Bơtau Rôbôam sơrbac sơrbang hào rơndeh ơseh khai dê mơ dô pleh hơ Jerusalem.

¹⁹Behơ̆, Israel neh tòmdră mơ hìu Dabit jơl tus di ngai do.