Read koho II Yal Yau 11 Bible Online

II Yal Yau 11 - koho bible

II Yal Yau 11

¹Tòm tŭ Rôbôam neh tus hơ Jerusalem, khai pơjum tơrgòm hìu Juda mơ Benjamin, gơs dô rhiang phàm jơt rbô cau ling jak, nàng tòmlơh tòmdră mơ Israel, nàng ai wơl lơgar Rôbôam in.

²Mơya gơs jơnau Yàng Jehôwa tus mơ Semayah cau Yàng Tom Trồ dê lah:

³“Đơs tĕ mơ Rôbôam kòn klau Salômôn bơtau Juda, mơ jơh cau Israel tòm Juda mơ Benjamin lah:

⁴Yàng Jehôwa đơs be do: ‘Mê bañ guh tòmlơh mơ ală oh mi bol mê dê. Kòp nă rê hìu tĕ, bơta do la bơh Añ.’” Behơ̆ bol khai iat jơnau Yàng Jehôwa mơ rê wơl, ò lòt tòmlơh tòmdră mơ Jerôbôam.

⁵Rôbôam ơm tòm Jerusalem mơ khai bơt bơtào ală ƀòn dờng nàng cang kìng tòm Juda.

⁶Khai bơt bơtào Betlehem, Etam, Tekôa,

⁷Bet Jur, Sôkô, Adulam,

⁸Gat, Maresa, Jip,

⁹Adôraim, Lakis, Ajeka,

¹⁰Jôra, Aijalôn mơ Hebrôn. Hơ̆ la ală ƀòn dờng kơ̆ cê tòm Juda mơ tòm Benjamin.

¹¹Khai bơt ală tiah kơp gàr kơ̆ cê mơ ơn ală cau kwang at bồ mpồl ling tòm hơ̆, mơ prap phan sa, mơñà, mơ tơrnòm ño.

¹²Khai kung ơn ală khèl dờng mơ ală tà tòm jơh ală ƀòn dờng, mơ lơh bol gơ in gơlik pràn kơldang ngan. Behơ̆, khai at bồ hơđang Juda mơ Benjamin.

¹³Ală cau gơnoar ơn phan duh khoai mơ cau Lebi bơh di jơh ală kơnhwàl tòm làm jơh Israel lòt tus hơ khai.

¹⁴Ală cau Lebi kung sang lòi ù tiah bal bol khai dê, mơ tus tòm Juda mơ Jerusalem; tài bơh Jerôbôam mơ ală kòn klau khai dê neh kơryan bol khai bơh bơta duh broă be la cau gơnoar ơn phan duh khoai Yàng Jehôwa dê.

¹⁵Mơ pồ bơtào is khai in ală cau gơnoar ơn phan duh khoai ală tiah jơnhoa in mơ di đap ală rùp be mơ kơnrồ mơ khai neh lơh gơs.

¹⁶Ală cau hơ̆ neh ơn nùs bol khai dê jòi jat Yàng Jehôwa la Yàng Tom Trồ Israel dê, neh lòt jat ală cau Lebi neh tus bơh ală jơi bơtiàn Israel lòt tus hơ Jerusalem nàng ơn ală phan ơn duh khoai Yàng Jehôwa in la Yàng Tom Trồ ală ồng pàng bol khai dê.

¹⁷Bol khai bơtào kơ̆ lơgar bơtau Juda dê, mơ tòm pe nam bol khai lơh Rôbôam kòn klau Salômôn in ring lơngai, bơh bol khai lòt tòm gùng dà Dabit mơ Salômôn dê tòm pe nam.

¹⁸Rôbôam bau mơ Mahalat kòn ùr Jerimôt, sau Dabit mơ Abihail kòn ùr Eliap, sau Jesse dê.

¹⁹Mahalat deh Rôbôam in ală kòn klau la Jeus, Semaria mơ Jaham.

²⁰Gen Rôbôam bau mơ Maaka kòn ùr Apsalôm, khai deh Rôbôam in Abija, Attai, Jija mơ Selômit.

²¹Rôbôam kòñ gơboh di Maaka kòn ùr Apsalôm rlau mơ jơh ală bau ùr ndai mơ ală bau cồng khai dê. Khai gơs jơt phàm nă bau ùr mơ prau jơt nă bau cồng, bàr jơt phàm nă kòn klau mơ prau jơt nă kòn ùr.

²²Rôbôam pồ bơtào Abija kòn klau Maaka lơh gơs cau at bồ ală kòn bơtau digùl ală oh mi khai dê, nàng lơh nền bơtào khai gơs bơtau.

²³Khai lơh dô bă jak chài, mơ tòmpà cau ƀà tòm ală kòn klau khai dê tus ơm tòm làm jơh ală kơnhwàl Juda mơ Benjamin, mơ tòm jơh ală ƀòn dờng kơ̆ cê. Khai ai bol khai in oă phan mơna mơ tòmbau bol khai mơ oă bau ùr.