Read koho II Yal Yau 12 Bible Online

II Yal Yau 12 - koho bible

II Yal Yau 12

¹Tòm tŭ gơnoar at bồ bơtau Rôbôam dê geh bơtào kơ̆ mơ khai gơlik pràn kơldang, khai mơ jơh làng bol khai sang lòi bơta boh lam Yàng Jehôwa dê.

²Tòm nam dơ̆ pram rài at bồ bơtau Rôbôam dê, tài bơh bol khai ò dòn song mơ Yàng Jehôwa, gen Sisak bơtau Ejiptơ guh tòmlơh mơ Jerusalem.

³Bal mơ dô rbô bàr rhiang nơm rơndeh lòs mơ prau jơt rbô nă cau ling hào ơseh, mơ mpồl ling neh tus bơh Ejiptơ ò rgơi kòp, cau Libi, cau Suki mơ cau Ethiôpi.

⁴Khai tòmpìt ai ală ƀòn dờng kơ̆ cê Juda dê mơ brồ tus hơ Jerusalem.

⁵Gen cau gơnoar hwơr Semayah lòt tus hơ bơtau Rôbôam mơ ală cau kwang at bồ tòm Juda, neh pơjum bal tòm Jerusalem tài bơh Sisak, mơ đơs mơ bol khai lah: “Yàng Jehôwa đơs be do: ‘Bol mê neh sang lòi Añ; gen tàng Añ sang bol mê tòm tê Sisak.’”

⁶Gen Bơtau mơ ală cau at bồ tơnliah să bol khai dê mơ đơs lah: “Yàng Jehôwa ơm tòm bơta song ring.”

⁷Tòm tŭ Yàng Jehôwa gŏ bol khai neh tơnliah să, gen Yàng Jehôwa đơs mơ Semayah lah: “Bol khai neh tơnliah să bol khai dê, Añ rơp ò tơnroh bol khai; mơya Añ rơp ai bol khai in geh dong tă, mơ bơta gơjrañ dờng Añ jê rơp ò tuh hơđang Jerusalem, bơh tê Sisak.

⁸Bulah behơ̆ bol khai rơp gơlik gơs cau duh broă Sisak dê, bơh hơ̆ bol khai rơp git bơta krơi is digùl bơta duh broă Añ mơ bơta duh broă ală bơtau lơgar ndai dê.”

⁹Behơ̆ Sisak bơtau Ejiptơ guh tus brồ lơh Jerusalem, khai tă cèng ală đam jàr hìu duh khoai Yàng Jehôwa dê mơ gơlang bơtau dê, khai ai jơh ală phan. Khai kung tă cèng ală khèl màh mơ bơtau Salômôn neh lơh.

¹⁰Behơ̆ bơtau Rôbôam lơh gơs ală khèl mơ kòng ala ală khèl mơ màh mơ jào tòm tê ală cau kwang sền gàr kơp mpồng gơlang bơtau in.

¹¹Tòm tŭ lơi bơtau lòt tus mut tòm hìu duh khoai Yàng Jehôwa dê, ală cau ling sền gàr at ală khèl, mơ rơp cèng ơn wơl gơtòm ơdŭ prap gàr.

¹²Tài bơh Rôbôam tơnliah să khai dê, gen bơta gơjrañ Yàng Jehôwa dê neh pleh bơh khai, mơ ò tơnroh jơh bol khai, rlau mơ hơ̆ la bơta niam gam gơs tòm Juda.

¹³Behơ̆ Rôbôam bơtào kơ̆ să tòm khai mơ at bồ tòm Jerusalem. Rôbôam neh poan jơt dùl sơnam tòm tŭ khai sơntòm at bồ, mơ khai at bồ jơt poh nam tòm Jerusalem, ƀòn dờng mơ Yàng Jehôwa neh sac rwah bơh di jơh ală jơi bơtiàn tòm Israel nàng ơn sơnđan Kơnràñ dê tềng hơ̆. Mè khai sơnđan la Naama; cau Ammôn.

¹⁴Khai lơh bơta iơh, bơh khai ò ơn nùs jòi jat Yàng Jehôwa.

¹⁵Ală broă Rôbôam dê bơh sơnròp tus di lồi dut, neh geh cih tòm ală sră yal broă Semayah dê la cau gơnoar hwơr, mơ ală sră yal yau Itdô dê cau gơnoar hwơr cih sơnđan mat ală jơi bơtiàn dê. Gơs bơta tòmlơh sùm digùl Rôbôam mơ Jerôbôam.

¹⁶Rôbôam chơt mơ geh tơp tòm bơtô tòm ƀòn Dờng Dabit dê. Mơ Abija kòn klau khai pơrdòn sơbàn khai dê.