Read koho II Yal Yau 13 Bible Online

II Yal Yau 13 - koho bible

II Yal Yau 13

¹Tòm nam dơ̆ jơt phàm rài at bồ Jerôbôam bơtau Israel, Abija at bồ hơđang Juda.

²Khai at bồ pe nam tòm Jerusalem. Mè khai sơnđan la Mikaya, kòn ùr Uriel dê bơh ƀòn dờng Gibea. Tŭ hơ̆ gơs bơta kơlìn digùl Abija mơ Jerôbôam.

³Abija lòt tòmlơh bal mơ poan rhiang rbô nă cau ling jak tòmlơh, mơ Jerôbôam lòt tòmdră mơ khai bal mơ phàm rhiang rbô nă cau ling pràn kơldang jak tòmlơh.

⁴Gen Abija ntào hơđang bồ mơnơm Jeramaim hơ̆ la tòm tiah lơgar kơh mơnơm Epraim dê, mơ đơs lah: “Ơ Jerôbôam mơ jơh Israel, dan iat añ!

⁵Bol mê ò git la Jehôwa Yàng Tom Trồ Israel dê bơtào bơtau hơđang Israel gam sùm sùm Dabit in mơ ală kòn sau khai in bơh dô bơta ho bal mơ boh ơ?

⁶Mơya Jerôbôam kòn klau Nebat dĭ gơna Salômôn kòn klau Dabit dê, bơtào tơngguh tòmdră mơ cau tòm khai dê,

⁷mơ ală cau ală alai ò kwơ neh pơjum gùt dar khai sền òsơp di Rôbôam kòn klau Salômôn, tòm tŭ Rôbôam gam kơnòm să òhềt git làm nàng tòmdră wơl mơ bol khai.

⁸Mơ tŭ do bol mê kơlôi lah bol mê rgơi tòmdră jai mơ lơgar bơtau Yàng Jehôwa dê ơm tòm tê ală kòn klau Dabit dê, tài bơh bol mê gơs gal ngan bal mơ rùp kòn kơnrồ mơ màh mơ Jerôbôam neh lơh gơs yàng bol mê in.

⁹Ò di bol mê neh ting bơtrơh ală cau gơnoar ơn phan duh khoai Yàng Jehôwa dê la kòn sau Arôn mơ ală cau Lebi dê, mơ neh bơtào is bol mê in ală cau gơnoar ơn phan duh khoai kung be ală làng bol lơgar ndai ò ơ? Cau lơi lòt tus nàng ơn să khai bal mơ dô nơm kơnrồ dam mơ poh nơm be dam, gen gơlik gơs dô nă cau gơnoar ơn phan duh khoai ală yàng ò di la yàng.

¹⁰Mơya đah mơ bol hi, Yàng Jehôwa la Yàng Tom Trồ bol hi dê, mơ bol hi ò sang lòi Kơnràñ. Bol hi gơs ală cau gơnoar ơn phan duh khoai duh broă Yàng Jehôwa, bol khai la ală kòn sau Arôn mơ gơs cau Lebi dong kòl bol khai.

¹¹Bol khai ơn Yàng Jehôwa in kòp àng drim mơ kòp mho ală phan ơn chu pơrguc mơ chu kơlhô, ơn pràng piang lă hơđang cơnòng lơh mơ màh goh, rcang gàr jơng đèng lơh mơ màh, nàng đèng gơ dê geh chu kòp mho. Bơh bol hi prap gàr ală jơnau sồr Jehôwa Yàng Tom Trồ bol hi dê, ai bol mê gen neh sang lòi Kơnràñ.

¹²Sền tĕ Yàng Tom Trồ ơm bal mơ bol hi mơ lam bồ bol hi; mơ ală cau gơnoar ơn phan duh khoai Kơnràñ dê uh kơlwòk bơta tòmlơh bol khai dê, nàng hòi lòt tòmlơh tòmdră mơ bol mê. Ơ ală cau Israel, bañ tòmlơh tòmdră mơ Jehôwa Yàng Tom Trồ ală ồng pàng bol mê dê, bơh bol mê ò geh pha.”

¹³Jerôbôam neh sồr dô mpồl ling kơp òm nàng brồ hơđang bol khai bơh đah ngkòi, bơh mpồl ling khai dê ơm di đap cau Juda, mơ gơs cau ling kơp òm đah ngkòi bol khai.

¹⁴Tòm tŭ cau Juda wơlke gen bơta tòmlơh neh ơm di đap mơ đah ngkòi bol khai, bol khai hòi dan mơ Yàng Jehôwa, mơ ală cau gơnoar ơn phan duh khoai uh kơlwòk.

¹⁵Ală cau Juda driau dờng brồ tòmlơh, mơ tòm tŭ làng bol Juda driau dờng, gen Yàng Tom Trồ lơh Jerôbôam mơ jơh mpồl ling Israel kong alah di đap Abija mơ cau Juda.

¹⁶Cau Israel ntoat dô di đap cau Juda, mơ Yàng Tom Trồ neh jào bol khai tòm tê cau Juda.

¹⁷Abija mơ mpồl ling khai dê lơh ală cau Israel in kong ơlah tơnchơt oă ngan cau, gơs pram rhiang rbô nă cau ling jak tòmlơh Israel dê neh gơplơ̆ chơt.

¹⁸Behơ̆ cau Juda neh geh pha lin rlau mơ cau Israel tòm bơta tòmlơh hơ̆, tài bơh bol khai gơn kơnòm di Jehôwa Yàng Tom Trồ ală ồng pàng bol khai dê.

¹⁹Abija ting jat Jerôbôam mơ mpồl ling khai dê mơ tòmpìt bơh di khai ală ƀòn dờng Betel, Jesana mơ Eprôn, bal mơ ală ƀòn dềt gùt dar.

²⁰Jerôbôam ò geh ai wơl gơnoar pràn khai dê tòm rài at bồ Abija dê. Yàng Jehôwa lơh khai gen khai chơt.

²¹Mơya Abija sơlo ngai sơlo pràn. Khai gơs jơt poan nă bau ùr, bàr jơt bàr nă kòn klau mơ jơt prau nă kòn ùr.

²²Ală broă ndai tòm rài at bồ Abija dê, ală broă khai neh lơh mơ ală jơnau khai neh đơs gen neh geh cih tòm sră yal yau cau gơnoar hwơr Itdô dê.