Read koho II Yal Yau 14 Bible Online

II Yal Yau 14 - koho bible

II Yal Yau 14

¹Mơ Abija chơt rê mơ ală ồng pàng khai dê mơ cau tơp khai tòm ƀòn dờng Dabit dê. Asa kòn klau khai dê pơrdòn sơbàn khai dê, mơ tòm rài Asa lơgar geh ring lơngai tòm jơt nam.

²Asa lơh bơta niam mơ song ring di đap Jehôwa Yàng Tom Trồ khai dê.

³Khai tă sang ală cơnòng duh khoai làng bol bơdìh dê mơ ală tiah jơnhoa duh khoai, pòng bơcah ală lŭ jrong duh khoai, mơ koh sang ală jrong duh khoai yàng Asera dê,

⁴mơ ai jơnau sồr cau Juda jòi jat Jehôwa la Yàng Tom Trồ ală ồng pàng bol khai dê, mơ prap gàr bơta boh lam bơta sồr lam.

⁵Khai kung tă sang ală tiah jơnhoa duh khoai mơ ală cơnòng chu kơlhô tòm ală ƀòn dờng Juda dê, mơ lơgar geh ring lơngai hơđơm gơnoar at bồ khai dê.

⁶Khai bơt bơtào ală ƀòn dờng kơ̆ cê tòm Juda, tòm tŭ lơgar geh rlô lơngai, ò gơs bơta kơlìn tòm ală nam hơ̆; bơh Yàng Jehôwa ai khai in bơta ring lơngai.

⁷Khai đơs mơ cau Juda lah: “Bol he bơtào kơ̆ lă ală ƀòn dờng do, bơt ală dơrñang mơ ală theng, ală mpồng dờng gơs ală kơrnal kal; lơgar gơrê mơ bol he, tài bơh bol he neh jòi jat Jehôwa Yàng Tom Trồ bol he dê; bol he neh jòi jat Kơnràñ mơ Kơnràñ neh ai bol he in bơta ring lơngai bơh kòp đah.” Behơ̆ bol khai bơt bơtào mơ geh cồng nha.

⁸Bơtau Asa gơs dô mpồl ling bal mơ pe rhiang rbô nă cau bơh Juda at ală khèl dờng mơ ală tà, mơ bàr rhiang phàm jơt rbô nă cau bơh mpồl Benjamin at ală khèl mơ ală àtak. Jơh ală bol khai la cau ling jak tòmlơh mơ pràn kơldang.

⁹Jerah la cau Ethiôpi guh lòt tòmlơh mơ cau Juda, bal mơ dô mpồl ling dô tơlak sa nă mơ pe rhiang rơndeh lòs tus hơ Maresa.

¹⁰Asa lik lòt tòmlơh mơ khai, mơ bol khai rơndap tiah tòmlơh tòm thòng Jephatha rềp Maresa.

¹¹Asa hòi dan mơ Jehôwa Yàng Tom Trồ khai dê lah: “Ơ Yàng Jehôwa, ò gơs bơta lơi kalke Kơnràñ in, Kơnràñ rgơi dong cau lơbơn òsô tòmdră mơ cau gơnoar pràn. Ơ Jehôwa Yàng Tom Trồ bol hi dê, dan dong kòl bol hi bơh bol hi dòn kơnòm di Kơnràñ, mơ tòm sơnđan Kơnràñ dê bol hi neh lòt tus tòmdră mơ mpồl ling gal ngan do. Ơ Yàng Jehôwa, Kơnràñ la Yàng Tom Trồ bol hi dê; ò gơs kòn mơnus lơi rgơi tòmdră mơ Kơnràñ.”

¹²Behơ̆ Yàng Jehôwa lơh alah mpồl ling Ethiôpi, di đap Asa mơ mpồl ling Juda, mơ cau Ethiôpi ntoat dô,

¹³gen Asa mơ mpồl ling khai dê ting jat bol hơ̆ tus hơ Gerar. Gơs oă ngan cau Ethiôpi kòl tơnchơt mơ jơh mpồl ling ò rgơi guh mơ tòmlơh; mơ cau Ethiôpi gơplơ̆ chơt tian gơs ò gam dô nă cau lơi kis, bơh bol khai gơkòl tơnroh di đap Yàng Jehôwa mơ mpồl ling Kơnràñ dê. Cau Juda tòmpìt ai oă ngan phan phà kup.

¹⁴Bol khai tơnroh jơh ală ƀòn dềt gùt dar Gerar, bơh bơta rngòt rngơt Yàng Jehôwa dê ơm hơđang bol khai. Bol khai phà tơnroh jơh ală ƀòn dờng mơ tơnroh oă phan mơna tềng hơ̆.

¹⁵Bol khai kung brồ lơh ală sàl ală cau ê gàr phan poan jơng mơ kup cèng ală belàt, ală be mơ ală làkđa oă ngan. Behơ̆ bol khai rê wơl hơ Jerusalem.