Read koho II Yal Yau 15 Bible Online

II Yal Yau 15 - koho bible

II Yal Yau 15

¹Hwềng Yàng Tom Trồ dê tus hơđang Ajaria kòn klau Ôdet.

²Khai lik lòt tòm mat mơ bơtau Asa mơ đơs lah: “Ơ bơtau Asa mơ jơh bol mê la ală cau Juda mơ Benjamin, iat tĕ añ. Yàng Jehôwa ơm bal mơ bol mê tòm tŭ bol mê ơm mơ Kơnràñ. Dilah bol mê jòi jat Kơnràñ, bol mê rơp jòi bàn Kơnràñ, mơya dilah bol mê sang lòi Kơnràñ, gen Kơnràñ rơp sang lòi bol mê.

³Neh jŏ rau Israel kis ò gơs Yàng Tom Trồ song ngan, ò gơs dô nă cau gơnoar ơn phan duh khoai la cau bơto, mơ ò gơs bơta boh lam.

⁴Mơya tòm tŭ tòm bơta bòl glar kalke, bol khai rê wơl hơ Yàng Jehôwa la Yàng Tom Trồ Israel dê, bol khai jòi mơ bàn Kơnràñ.

⁵Tòm ală ngai hơ̆, ò gơs cau lơi rgơi lòt hala rê tòm bơta ring lơngai, tài bơh bơta bòl glar mơ sơlồng sơlàng tòm jơh ală làng bol ơm làm bă tiah.

⁶Bol khai bơcah lề lac lơgar do rồn bơklơn lơgar ndai, ƀòn dờng do rồn bơklơn ƀòn dờng ne, tài bơh Yàng Tom Trồ lơh dơrcul bol khai mơ oă bơta bòl glar kalke.

⁷Mơya bol mê, khin cha tĕ, bañ lòi tê bol mê dê gơlik lơbơn, bơh broă lơh bol mê dê rơp geh phan ƀàn.”

⁸Tòm tŭ Asa neh kơno ală jơnau hơ̆ la jơnau đơs hwơr Ôdet dê, gen khai geh gơchồl nùs. Khai tă sang ală rùp ràk cù kìr bơh làm jơh lơgar Juda mơ Benjamin, mơ bơh di ală ƀòn dờng mơ khai neh tòmpìt geh tòm lơgar kơh mơnơm Epraim dê. Khai kung rcang wơl cơnòng duh khoai Yàng Jehôwa dê tòm ƀlàng dơlam hìu duh khoai dê.

⁹Khai pơjum tơrgòm jơh ală cau Juda mơ Benjamin; mơ ală cau bơh Epraim mơ Manase, mơ Simeôn la ală cau ơm tòm lơgar be cau làng bol bơdìh, tài bơh ntum khà cau oă ngan neh sang lòi Israel lòt tus hơ Asa, tòm tŭ bol khai neh gŏ Jehôwa Yàng Tom Trồ khai dê ơm bal mơ khai.

¹⁰Bol khai pơjum bal tòm Jerusalem tòm kơnhai dơ̆ pe, nam dơ̆ jơt pram rài at bồ Asa dê.

¹¹Tòm ngai hơ̆ bol khai ơn phan pơdơng Yàng Jehôwa in bơh ală phan phà kup mơ bol khai neh cèng brê, poh rhiang kơnrồ mơ poh rbô belàt.

¹²Bol khai bơtào bơta ho bal nàng jòi jat Jehôwa Yàng Tom Trồ ală ồng pàng bol khai dê, dô bă jơh nùs mơ jơh hwềng soàn bol khai dê.

¹³Cau lơi ò bài jòi jat Jehôwa Yàng Tom Trồ Israel dê gen pal kong tơnchơt, bulah la cau kơnòm hala cau kra, cau klau hala cau ùr.

¹⁴Bol khai srat să mơ Yàng Jehôwa dô jơnau dờng, mơ sap driau dờng, bal mơ ală kơlwòk, mơ tơliă.

¹⁵Jơh ală cau Juda hòn chò ngan, bơh bol khai neh lơh bơta ho pơgon hơ̆. Bol khai neh srat să mơ bơta jơh nùs mơ neh jòi jat Kơnràñ bơh jơh nùs kòñ bol khai dê, mơ bol khai neh jòi bàn Kơnràñ; mơ Yàng Jehôwa ai bol khai in bơta ring lơngai tòm jơh ală đah gùt dar.

¹⁶Bơtau Asa kung tă gơnoar mè bơtau dê bơh Maaka la mò khai dê, tài bơh mò hơ̆ neh bơtào jrong duh khoai yàng Asera; Asa koh rùp ràk mò dê, pòng bơcah lề lac mơ chu gơtòm Thòng Kidrôn.

¹⁷Mơya ală tiah jơnhoa duh khoai òhềt tă sang bơh di Israel, bulah behơ̆ nùs Asa dê song ngan tòm jơh rài kis khai dê.

¹⁸Khai cèng tơmut tòm hìu duh khoai Yàng Tom Trồ ală phan is gơrê mơ bèp khai mơ phan tòm khai dê neh ho ơn Yàng Tom Trồ in priă, màh bal mơ jơh ală phan ngui.

¹⁹Mơ ò gơs bơta kơlìn tai jơl tus di nam pe jơt pram rài at bồ Asa dê.