Read koho II Yal Yau 16 Bible Online

II Yal Yau 16 - koho bible

II Yal Yau 16

¹Tòm nam pe jơt prau rài at bồ bơtau Asa dê, Baasa bơtau Israel guh lòt tòmdră mơ Juda mơ bơtào Rama nàng kơryan bơta mut mơ lik bơh ù tiah Asa bơtau Juda dê.

²Gen Asa tă priă mơ màh bơh đam jàr hìu duh khoai Yàng Jehôwa dê mơ bơh di gơlang khai dê mơ pơyoa tus hơ Benhadat bơtau Aram ơm tòm Damas mơ đơs lah:

³“Bol he bơtào tĕ bơta dô bă bal, be digùl bèp añ mơ bèp bơtau dê. Añ pơyoa bơtau in priă mơ màh; lòt tĕ gơltac sang jơnau ho lơh dô bă bal mơ Baasa bơtau Israel, nàng khai lik lòt bơh di añ.”

⁴Benhadat iat jơnau Asa mơ sồr ală cau kwang at bồ mpồl ling khai dê brồ lơh di ală ƀòn dờng Israel dê. Bol khai tòmpìt ai Ijôn, Dan, Abel Bet Maaka mơ jơh ală ƀòn dờng prap phan Neptali dê.

⁵Tòm tŭ Baasa kơno bơta hơ̆, khai dơh wơl ò bơt Rama tai mơ lòi broă khai dê dơh wơl.

⁶Gen bơtau Asa cèng bal jơh ală cau tòm làm Juda, mơ bol khai tă cèng bơh di Rama ală lŭ mơ mpàn chi mơ Baasa dê, ală phan Asa neh bơt bơtào mơ ngui ală phan hơ̆ khai bơt Geba mơ Mispa.

⁷Tòm tŭ hơ̆, Hanani cau gơnoar hwơr lòt tus hơ Asa bơtau Juda mơ đơs lah: “Tài bơh bơtau neh dòn kơnòm di bơtau lơgar Aram mơ ò dòn kơnòm di Jehôwa Yàng Tom Trồ bơtau dê, gen mpồl ling bơtau lơgar Aram dê neh dô klàs bơh di tê bơtau dê.

⁸Ală cau Kus mơ cau Libi ò di la dô mpồl ling dờng bal mơ oă rơndeh lòs tòmlơh mơ cau ling hào ơseh ò ơ? Bulah behơ̆, tòm tŭ bơtau dòn kơnòm di Yàng Jehôwa, Kơnràñ neh jào bol khai tòm tê bơtau.

⁹Bơh Yàng Jehôwa sền sơwì làm plai ù nàng bơtơl pràn ală cau in jơh nùs dòn song mơ Kơnràñ. Bơtau neh lơh dô bơta bơrngơl gơla be do, bơh tŭ do rơp gơs bơta kơlìn sùm hơđang bơtau.”

¹⁰Asa gơhào gơjrañ di cau gơnoar hwơr tài bơh jơnau hơ̆; mơ kup Hanani jàm khai tòm hìu prap phan, bơh bơtau gơhào gơjrañ di khai. Kung tòm tŭ hơ̆, Asa rồn bơklơn iơh rmơh ngan dô êt nă cau tòm làng bol.

¹¹Ală broă lơh tòm rài at bồ Asa dê, bơh sơnròp tus di lồi dut, neh geh cih tòm sră yal yau ală bơtau Juda mơ Israel dê.

¹²Tòm nam pe jơt sin rài at bồ Asa dê, khai jê jơng kơnjơ̆ ngan. Bulah bơta jê sồt kơnjơ̆ ngan, khai kung ò jòi Yàng Jehôwa, mơya mìng jòi ală cau gơnoar sơnơm lơm.

¹³Gen Asa chơt bic mơ ồng pàng khai dê, tòm nam poan jơt dùl rài at bồ khai dê.

¹⁴Mơ cau tơp khai tòm bơtô mơ khai neh tò să tòm khai in tòm ƀòn dờng Dabit. Cau ơn khai hơđang dô nơm phan tùng ƀồc neh bong tơl ală sơnơm ƀô bơlhu neh bơcă bơh cau chài bơcă mơñà ƀô bơlhu; mơ bol khai sing dô gơnru ồs dờng nàng ñìm ƀồc khai.