Read koho II Yal Yau 17 Bible Online

II Yal Yau 17 - koho bible

II Yal Yau 17

¹Jehôsaphat kòn klau Asa gơs bơtau at bồ, mơ lơh să tòm khai in gơs pràn kơldang tòmdră mơ Israel.

²Khai ơn ală mpồl ling tòm jơh ală ƀòn dờng kơ̆ cê tòm Juda mơ ơn mpồl ling kơp gàr tòm Juda mơ tòm ală ƀòn dờng Epraim mơ bèp khai neh tòmpìt geh.

³Yàng Jehôwa ai lơngai Jehôsaphat in, tài bơh tòm ală nam sơnròp khai lòt tòm ală gùng dà mơ Dabit ồng pàng khai neh lòt mơ khai ò duh khoai yàng Baal.

⁴Khai jòi jat Yàng Tom Trồ bèp khai dê, lòt jat ală gơnoar sồr Yàng Tom Trồ dê, mơ ò jat ală gùng dà Israel dê.

⁵Gen tàng Yàng Jehôwa bơtào kơ̆ lơgar bơtau tòm tê khai dê; mơ jơh làng bol Juda cèng ală phan pà Jehôsaphat in, mơ khai gơlik pas sơm ngan mơ geh màng ryŭ.

⁶Nùs khai geh chồl bơtrut tòm gùng dà Yàng Jehôwa dê; mơ rlau mơ hơ̆ tai khai neh tă sang ală tiah jơnhoa mơ ală jrong duh khoai Asera tòm Juda.

⁷Tòm nam dơ̆ pe rài at bồ khai dê, khai sồr ală cau kwang duh broă khai dê la Ben Hail, Ôbadia, Sacari, Nethanel mơ Mikaya lòt tus bơto tòm ală ƀòn dờng Juda dê.

⁸Lòt bal mơ bol khai gơs ală cau Lebi la Semaya, Nethania, Jebadia, Asahel, Semiramôt, Jehônathan, Adônija, Tôbija, Tôbadônija, mơ ală cau gơnoar ơn phan duh khoai Elisama mơ Jehôram.

⁹Bol khai bơto tòm Juda, bol khai cèng bal Sră Bơta Boh Lam Yàng Jehôwa dê, mơ lòt làm jơh ală ƀòn tòm Juda mơ bơto digùl làng bol.

¹⁰Bơta rngòt Yàng Jehôwa dùh hơđang jơh làm lơgar gùt dar Juda, mơ bol khai ò tòmlơh mơ bơtau Jehôsaphat.

¹¹Gơs dô êt cau Philistin cèng Jehôsaphat ală phan pà, mơ priă nàng lơh gơs phan pà, mơ ală cau Arap kung cèng khai in poh rbô poh rhiang nơm belàt mơ poh rbô poh rhiang nơm be.

¹²Behơ̆ Jehôsaphat sơlo ơm sơlo gơbơtơl gơnoar pràn; khai bơt bơtào ală theng kơ̆ cê mơ ală ƀòn dờng prap phan mơna tòm làm jơh Juda.

¹³Khai cèng oă broă lơh tòm ƀòn dờng Juda dê. Khai gơs ală cau ling pràn kơldang jak tòmlơh tòm Jerusalem.

¹⁴Bơta hòi pơjum do jat sơnđan kòp hìu nhă be tơnơ̆ do: Bơh di Juda, Atna la cau kwang ling at bồ hơđang pe rhiang rbô nă;

¹⁵Cau dơ̆ bàr la Jehôhanan kwang ling at bồ hơđang bàr rhiang phàm jơt rbô nă;

¹⁶mơ cau dơ̆ pe la Amasiah kòn klau Jikri ơn is să tòm khai dê duh broă Yàng Jehôwa, at bồ bàr rhiang rbô nă.

¹⁷Bơh di Benjamin: Eliada la dô nă cau pràn kơldang jak tòmlơh at bồ bàr rhiang rbô nă cau at àtak mơ khèl;

¹⁸tơnơ̆ khai la Jehôjabat at bồ dô rhiang phàm jơt rbô nă rcang sir tòmlơh.

¹⁹Hơ̆ la ală cau duh broă cau bơtau tòm Jerusalem, rlau mơ ală cau hơ̆ gơs ală cau neh geh bơtau ơn tòm ală ƀòn dờng kơ̆ cê tòm làm jơh Juda.