Read koho II Yal Yau 18 Bible Online

II Yal Yau 18 - koho bible

II Yal Yau 18

¹Tŭ hơ̆ Jehôsaphat gơlik gơs pas sơm mơ tiơng pơnro, mơ khai lơh prui sơmbàr mơ Ahap.

²Tòm dô êt nam tơnơ̆, bơtau Jehôsaphat lòt tus hơ Ahap tòm ƀòn dờng Samari, Ahap lơh poac oă ngan belàt mơ kơnrồ nàng wă rò Jehôsaphat bal mơ ală cau lòt bal mơ khai, mơ chồl pơndòm khai guh brồ lơh Ramôt tòm Galaat.

³Ahap bơtau Israel lùp Jehôsaphat bơtau Juda lah: “Ồng kòñ lòt mơ añ nàng tòmlơh mơ Ramôt tòm Galaat sơl?” Jehôsaphat ho wơl lah: “Añ kung be ồng, làng bol añ kung be làng bol ồng dê; bol hi rơp lòt bal mơ ồng tòm bơta tòmlơh.”

⁴Mơya Jehôsaphat kung đơs lah: “Lài ngan pal hòi lùp nùs kòñ Yàng Jehôwa dê.”

⁵Behơ̆ bơtau Israel hòi pơjum ală cau gơnoar hwơr, jơh ală la poan rhiang nă, mơ lùp bol khai lah: “Bol hi pal lòt tòmlơh mơ Ramôt tòm Galaat hala añ pal ơm wơl taih?” Bol khai ho lah: “Lòt tĕ bơh Yàng Tom Trồ rơp jào gơtòm tê bơtau dê.”

⁶Mơya Jehôsaphat lùp lah: “Tềng do ò gơs dô nă cau gơnoar hwơr ndai tai Yàng Jehôwa dê, nàng bơh khai bol he rgơi hòi lùp Kơnràñ sơl ơ?”

⁷Bơtau Israel ho wơl Jehôsaphat lah: “Tềng do gam gơs dô nă tai mơ bol hi rgơi kơnòm di khai nàng hòi lùp Yàng Jehôwa, hơ̆ la Mice kòn klau Imla, mơya añ gơjrañ di khai tài bơh khai ò tŭ lơi đơs hwơr niam añ in, mơya mìng bơta rung rài lơm. Khai la Mice kòn klau Imla.” Jehôsaphat ho wơl: “Bơtau bañ đơs jơnau behơ̆.”

⁸Gen bơtau Ahap hòi dô nă cau kwang khai dê mơ đơs lah: “Cèng tĕ mhar Mice kòn klau Imla tus mo!”

⁹Bơtau Israel mơ Jehôsaphat bơtau Juda soh ồi ào cau bơtau dê mơ nggui hơđang ală sơbàn bol khai dê di làn jă kòi rềp di gah gùng mut di mpồng Samari, bal mơ jơh ală cau gơnoar hwơr ơm đơs hwơr di đap bol khai.

¹⁰Jedekia kòn klau Kenaana neh lơh is khai in ală ngke mơ lòs, mơ đơs lah: “Yàng Jehôwa đơs be do: ‘Bơh ală ngke do bơtau rơp gĕ cau Aram jơl tus di tŭ bol khai kòl tơnroh jơh.’”

¹¹Jơh ală cau gơnoar hwơr ndai kung đơs hwơr dô bơta hơ̆. Bol khai đơs lah: “Guh tĕ brồ lơh Ramôt tòm Galaat mơ geh pha, Yàng Jehôwa rơp jào gơtòm tê bơtau dê.”

¹²Cau kong sồr neh lòt hòi jà Mice đơs mơ khai lah: “Do, la jơnau ală cau gơnoar hwơr ndai neh dô nùs bal đơs bơta niam nùs cau bơtau. Dan jơnau ồng đơs be jơnau dô nă tòm bol khai, mơ đơs bơta niam.”

¹³Mơya Mice đơs lah; “Kung be Yàng Jehôwa gam kis sùm, jơnau lơi Yàng Tom Trồ añ jê sồr đơs, gen añ rơp đơs.”

¹⁴Tòm tŭ khai tus hơ cau bơtau, mơ bơtau lùp khai lah: “Ơ Mice, bol hi pal lòt tòmlơh mơ Ramôt Galaat hala añ pal ơm wơl taih?” Khai ho lah: “Guh tĕ brồ lơh mơ geh pha. Bol khai rơp gơkòl jào tòm tê bơtau dê.”

¹⁵Mơya bơtau đơs mơ khai lah: “Nđò dơ̆ rau añ pal sồr mê srat să ai sơnđan Yàng Jehôwa đơs jơnau song mơ añ taih?”

¹⁶Mice đơs lah: “Añ neh gŏ jơh Israel nrah nring hơđang ală mơnơm, kung be belàt ò gơs cau ê; mơ Yàng Jehôwa đơs lah: ‘Làng bol do ò gơs cau tòm. Lòi tĕ bol khai rê hìu lơngap lơngai.’”

¹⁷Bơtau Israel đơs mơ Jehôsaphat lah: “Añ ò di neh đơs mơ ồng lah khai ò tŭ lơi đơs hwơr jơnau niam añ in, mơya mìng bơta rung rài lơm ơ?”

¹⁸Mice đơs tai lah: “Behơ̆ gen, iat tĕ jơnau Yàng Jehôwa dê: Añ neh gŏ Yàng Jehôwa ơm nggui hơđang sơbàn Kơnràñ dê, bal mơ jơh ală cau gơnrơh hơđang trồ ơm ntào đah ma mơ đah kiau Kơnràñ.

¹⁹Mơ Yàng Jehôwa đơs lah: ‘Ñcau rơp lòt ơniai Ahap bơtau Israel nàng khai lòt brồ lơh mơ gơplơ̆ chơt tòm Ramôt Galaat taih?’ Cau ƀà đơs be do mơ cau ndai đơs ne;

²⁰jơl tus dô nơm hwềng lòt tus mơ ntào di đap Yàng Jehôwa, mơ đơs lah: ‘añ rơp lòt ơniai khai.’ Yàng Jehôwa lùp lah: ‘Lơh mbe lơi taih?’

²¹Khai đơs lah: ‘Añ rơp lòt mơ lơh gơs dô nơm hwềng đơs blac tòm bơr jơh ală cau gơnoar hwơr Ahap dê.’ Yàng Jehôwa đơs lah: ‘Mê rơp lòt ơniai khai mơ mê rơp geh pha. Lòt tĕ mơ lơh bơta hơ̆.’

²²Behơ̆, bơtau sền tĕ Yàng Jehôwa neh ơn dô nơm hwềng đơs blac tòm bơr ală cau gơnoar hwơr bơtau dê. Yàng Jehôwa neh lơh nền ai bơta rung rài bơtau in.”

²³Gen Jedekia kòn klau Kenaana lòt tus rềp di Mice, pah di tơrmồ Mice. Khai lùp lah: “Bơh gùng lơi hwềng Yàng Jehôwa dê neh pleh bơh añ nàng đơs mơ mê taih?”

²⁴Mice ho lah: “Mê rơp git bơta hơ̆ tòm tŭ mê dô pồn tòm dô nơm ơdŭ dơlam.”

²⁵Gen bơtau Israel sồr lah: “Kup tĕ Mice mơ cèng khai wơl hơ Ammôn cau kwang at bồ ƀòn dờng mơ hơ Jôas kòn klau cau bơtau dê,

²⁶mơ đơs lah: ‘Bơtau đơs be do: Jàm tĕ cau do tòm hìu jàm mơ siam khai mơ piang lă mơ dà bơta bòl glar jơl tus di tŭ añ rê wơl lơngap lơngai.’”

²⁷Mice đơs lah: “Dilah bơtau rê wơl tòm bơta lơngap lơngai, gen Yàng Jehôwa neh ò sồr añ đơs.” Gen khai đơs bơtơl lah: “Iat tĕ! Ơ jơh làng bol, jơh ală bol mê.”

²⁸Behơ̆ bơtau Israel mơ Jehôsaphat bơtau Juda lòt tòmlơh mơ Ramôt tòm Galaat.

²⁹Bơtau Israel đơs mơ Jehôsaphat lah: “Añ rơp soh ồi ào ndai nàng lòt tòmlơh, mơya ồng kư̆ soh ồi ào bơtau ồng dê.” Behơ̆ bơtau Israel lơh tànggơ be cau ndai mơ lik lòt hơ tiah tòmlơh.

³⁰Tŭ hơ̆ bơtau Aram neh ai gơnoar sồr ală cau kwang at bồ rơndeh lòs tòmlơh lah: “Bañ brồ lơh mơ dô nă cau lơi bulah dềt hala dờng, mơya mìng lơh bơtau Israel lơm,”

³¹Behơ̆ tòm tŭ ală cau kwang at bồ rơndeh lòs tòmlơh gŏ Jehôsaphat, bol khai đơs lah: “Hơ̆ la bơtau Israel dê.” Behơ̆ bol khai tơrwơl nàng tòmlơh mơ khai, mơya Jehôsaphat hòi driau, mơ Yàng Jehôwa dong kòl khai. Yàng Tom Trồ tơmpleh bol hơ̆ ngài bơh di khai,

³²tòm tŭ ală cau kwang at bồ rơndeh lòs tòmlơh gŏ khai ò di la bơtau Israel, gen ruc wơl ò ting jat khai tai.

³³Mơya gơs cau nisơna wàr àtak pañ mơ ò git la bơtau Israel, digùl tiah ngkàp ào lòs mơ tiah cang ntơh khai dê. Behơ̆ bơtau đơs mơ cau at rơndeh ơseh tòmlơh lah: “Tơrwơl tĕ rơndeh mơ cèng añ lik bơh di tiah tòmlơh do. Añ neh kong sồt rau.”

³⁴Bơta tòmlơh sơlo ơm sơlo pràn ngan mơ bơtau Israel sơnđìng să khai di rơndeh ơseh khai dê, di đap mat cau Aram jơl tus di mho; gen di tŭ mattơngai mut gen khai chơt.