Read koho II Yal Yau 19 Bible Online

II Yal Yau 19 - koho bible

II Yal Yau 19

¹Jehôsaphat bơtau Juda rê wơl lơngap lơngai hơ gơlang khai dê tòm Jerusalem,

²Jehu kòn klau Hanani cau gơnoar hwơr lòt tìp bơtau mơ đơs mơ khai lah: “Bơtau pal dong kòl ală cau iơh bơsak mơ kòñ gơboh di ală cau gơjrañ di Yàng Jehôwa sơl ơ? Tài bơh ală bơta hơ̆, gen bơta gơjrañ dờng Yàng Jehôwa dê dùh hơđang bơtau.

³Bulah behơ̆, gơs dô êt bơta niam tòm bơtau, bơh bơtau neh tă sang ală jrong duh khoai Asera bơh di lơgar, mơ bơtau neh ơn nùs jòi jat Yàng Tom Trồ.”

⁴Bơtau Jehôsaphat ơm tòm Jerusalem, khai òs lòt rê digùl làng bol, bơh Beerseba tus di đah đơm rò gah lơgar kơh mơnơm Epraim dê hơ đah đang, nàng cèng làng bol rê wơl hơ Jehôwa Yàng Tom Trồ ală ồng pàng bol khai dê.

⁵Khai pồ bơtào ală cau kwang cahrña tòm kòp ală ƀòn dờng kơ̆ cê, bơh ƀòn dờng do tus hơ ƀòn dờng ne tòm Juda,

⁶mơ nting sồr ală cau kwang cahrña lah: “Sền sơwì tĕ bơh bơta bol mê lơh, bơh bol mê ò di cahrña ala kòn mơnus in, mơya ala Yàng Jehôwa in, mơ Kơnràñ ơm bal mơ ală bol mê tòm tŭ bol mê cahrña.

⁷Tŭ do, duh rngòt tĕ di Yàng Jehôwa mơ kơrhia tĕ tòm bơta cahrña, bơh Jehôwa Yàng Tom Trồ bol he dê ò dòp bơta ò song ring hala bơta ò ring bal hala cau dòp phan sa loă.”

⁸Rlau mơ hơ̆, tòm Jerusalem, Jehôsaphat pồ bơtào ală cau Lebi, cau gơnoar ơn phan duh khoai mơ cau at bồ hơđang hìu nhă Israel dê, nàng cahrña Yàng Tom Trồ in, mơ nàng cahrña lơh nền ală bơta tòm pơndang bal. Bol khai neh nggui tòm tiah duh broă bol khai dê tòm Jerusalem.

⁹Khai jào broă bol hơ̆ in: “Do la ală bơta bol mê pal lơh: duh rngòt di Yàng Jehôwa, dòn song mơ Yàng Jehôwa dô bă jơh nùs.

¹⁰Bulah tòm bơta yă wơn bơh oh mi bol mê dê ơm tòm ală ƀòn dờng cèng tus hơ bol mê, bơh bơta lơh hòr mhàm, bơh bơta boh lam hala bơta sồr lam, ală jơnau sồr, ală bơta lơh nền, gen bol mê pal nting sồr bol khai, nàng bol khai bañ gơkòl tìs glài di đap Yàng Jehôwa; mơ bơta gơjrañ dờng Kơnràñ dê rơp dùh hơđang bol mê mơ ală oh mi bol mê dê. Lơh tĕ behơ̆ gen bol mê ò gơkòl tìs glài.

¹¹Do, Amaria cau gơnoar ơn phan duh khoai rơp lam bồ bol mê tòm ală bơta gơwèt hơ Yàng Jehôwa, mơ Jebadia kòn klau Ismael, cau lam bồ jơi bơtiàn Juda dê, rơp lam bol mê tòm ală bơta gơwèt hơ cau bơtau, mơ cau Lebi rơp duh broă bol mê be ală cau kwang. Lơh khin cha tĕ mơ lơh jat ală jơnau nting sồr do mơ dan Yàng Jehôwa ơm bal mơ ală cau song ring.”