Read koho II Yal Yau 20 Bible Online

II Yal Yau 20 - koho bible

II Yal Yau 20

¹Tơnơ̆ mơ hơ̆, cau Môap mơ cau Ammôn, bal mơ dô êt cau Meunit lòt tus brồ lơh Jehôsaphat tòm bơta tòmlơh.

²Gơs cau tus cèng jơnau yal mơ bơtau Jehôsaphat lah: “Gơs dô mpồl ling gal ngan lòt tus tòmdră mơ bơtau bơh Edôm, đah ne Dàlềng; Bol khai neh tus tòm Hajajôn Tamar rau (hơ̆ la Engedi).”

³Jehôsaphat rngòt rngơt, să tòm khai jòi jat Yàng Jehôwa, mơ khai yal tơnggit bơta ơt sa tòm làm jơh Juda.

⁴Juda pơjum bal nàng jòi lùp bơta dong kòl bơh Yàng Jehôwa; bơh di ală ƀòn dờng tòm Juda làng bol lòt tus nàng hòi lùp Yàng Jehôwa;

⁵Bơtau Jehôsaphat ñă ntào di đap mpồl jơnum làng bol Juda mơ Jerusalem tòm hìu duh khoai Yàng Jehôwa dê, di đap ƀlàng pa,

⁶mơ đơs lah: “Ơ Yàng Jehôwa la Yàng Tom Trồ ală ồng pàng bol hi dê, Kơnràñ ò di la Yàng Tom Trồ ơm hơđang trồ ơ? Kơnràñ ò di at bồ hơđang jơh ală lơgar ală làng bol ò ơ? Tòm tê Kơnràñ gơs gơnap gơnoar mơ gơnoar pràn, gen tàng ò gơs cau lơi rgơi ntào jai di đap Kơnràñ.

⁷Kơnràñ ò di la Yàng Tom Trồ bol hi dê, neh ting bơtrơh ală làng bol ơm tòm lơgar do di đap làng bol Israel Kơnràñ dê, mơ ai lơgar kòn sau Abraham in, la cau bơyô Kơnràñ dê, jơl tus sùm sùm ò ơ?

⁸Bol khai neh ơm tòm lơgar do mơ tòm hơ̆ neh bơt Kơnràñ in dô nơm hìu duh khoai sơnđan Kơnràñ in, đơs lah:

⁹‘Dilah bơta rung rài tus hơđang bol hi, đào tà, bơta cahrña hala pluh plàng hala jơgloh rung, bol hi rơp ntào di đap hìu duh khoai do mơ di đap Kơnràñ bơh sơnđan Kơnràñ ơm tòm hìu do, mơ rac dan di Kơnràñ tòm bơta kalke bòl glar bol hi dê, gen Kơnràñ rơp iat mơ dong tă.’

¹⁰Sền tĕ tŭ do gơs ală cau bơh di Ammôn, Môap mơ mơnơm Seir, la làng bol mơ Kơnràñ ò ai cau Israel in phà tơnroh tòm tŭ bol khai lik bơh lơgar Ejiptơ, mơ cau Israel neh pleh ò tơnroh bol khai,

¹¹mơya bol khai neh tơm wơl bol hi in la tus bơtrơh tơlik bol hi bơh di ù tiah mơ Kơnràñ neh ai bol hi in lơh gơs sre brê.

¹²Ơ Yàng Tom Trồ bol hi dê, Kơnràñ rơp ò cahrña hơđang bol khai ơ? Bơh bol hi ò gơs gơnoar pràn nàng tòmdră mơ mpồl ling gal ngan do neh lòt tus brồ lơh bol hi. Bol hi ò git ñchi pal lơh, mơya mat bol hi tơnggòr sền di Kơnràñ.”

¹³Tòm tŭ jơh ală cau Juda ntào di đap Yàng Jehôwa bal mơ ală kòn dềt, mơ ală bau ùr mơ ală kòn sau bol khai dê.

¹⁴Gen Hwềng Yàng Jehôwa dê tus hơđang Jahajiel, kòn klau Sacari, sau Benayah, se Jeiel, set Mathania, dô nă cau Lebi mơ la kòn sau Asap dê, ơm ntào digùl mpồl làng bol.

¹⁵Khai đơs lah: “Dan ơm iat, ơ jơh cau Juda mơ ală làng bol ơm tòm Jerusalem, mơ bơtau Jehôsaphat: Yàng Jehôwa đơs be do mơ ală ồng: ‘Bañ rngòt hala gơplơ̆ nùs di mpồl ling gal ngan do, bơh bơta tòmlơh do ò gơrê bal mơ bol mê mơya gơrê mơ Yàng Tom Trồ.

¹⁶Ngai hìng lik lòt tĕ tòmdră mơ bol khai. Bol khai rơp guh hơđang mơnơm Jis, mơ bol mê rơp bàn bol khai di tiah lồi thòng tòm ƀlàng ngềt ngơt Jeruel dê.

¹⁷Bơta tòmlơh do la ò di bơh bol mê tòmlơh. Ơm tĕ di tiah bol mê; ntào kơ̆ tĕ mơ sền bơta pha lin Yàng Jehôwa dê ai bol mê in. Ơ Juda mơ Jerusalem, bañ rngòt mơ bañ gơplơ̆ nùs. Ngai hìng lik tĕ tòmdră mơ bol khai, mơ Yàng Jehôwa rơp ơm bal mơ bol mê.’”

¹⁸Jehôsaphat tơmbic să blup mat tòm ù, mơ jơh làng bol Juda mơ Jerusalem tơmbic să duh khoai di đap Yàng Jehôwa.

¹⁹Ală cau Lebi bơh mpồl Kôhat mơ cau Kôra ñă ntào nàng jòng ro Jehôwa Yàng Tom Trồ Israel dê bal mơ sap driau dờng.

²⁰Bol khai guh gòñ bơh rìng àng, mơ lik lòt hơ ƀlàng ngềt ngơt Tekôa; mơ tòm tŭ bol khai lik lòt, Jehôsaphat ñă ntào mơ đơs lah: “Dan iat añ, ơ Juda mơ làng bol Jerusalem! Dòn tĕ di Jehôwa la Yàng Tom Trồ bol mê dê, gen bol mê rơp geh ntào kơ̆; dòn tĕ ală cau gơnoar hwơr Kơnràñ dê.”

²¹Tòm tŭ khai neh cri bơyai mơ làng bol, Jehôsaphat bơtào ală cau đơs chò nàng jòng ro Yàng Jehôwa tòm bơta gơcrà sàng goh, tòm tŭ bol khai lòt di đap mpồl ling, mơ đơs lah: “Ưnngài tĕ Yàng Jehôwa, bơh bơta kòñ gơboh kơ̆ dơn Kơnràñ dê gam sùm sùm.”

²²Tòm tŭ bol khai sơntòm đơs chò mơ jòng ro, gen Yàng Jehôwa ơn ală cau kơp òm tòmdră mơ mpồl ling cau Ammôn, cau Môap mơ cau bơh mơnơm Seir, la ală cau neh tus tòmdră mơ Juda, behơ̆ mpồl gal gơlik sơlồng sơlàng.

²³Bơh cau Ammôn mơ cau Môap brồ lơh wơl cau ơm tòm mơnơm Seir, tơnchơt jơh hir bol khai, mơ bol khai tơrwơl tơnchơt bal mơ gơp.

²⁴Tòm tŭ cau Juda neh lòt tus di tiah theng kơp gàr tòm ƀlàng ngềt ngơt, bol khai wèt sền đah mpồl ling gal ngan, gen gŏ ƀồc bol khai bic chơt hơđang ù, ò gơs dô nă lơi geh klàs.

²⁵Behơ̆ Jehôsaphat mơ ală mpồl ling khai dê lòt tus ai phan tòmpìt geh mơ gŏ gơs oă ngan ală phan poan jơng, phan mơna, ồi ào mơ ală phan màng, bol khai cèng jơl tus ò rgơi cèng tai. Bol khai pal roh pe ngai nàng cèng ală phan tòmpìt geh tài bơh gơs oă ngan.

²⁶Tòm ngai poan, bol khai pơjum bal tòm thòng Beraka, tềng hơ̆ bol khai jòng ro Yàng Jehôwa. Tài bơh hơ̆ tàng bol khai sơnđan thòng hơ̆ la Beraka jơl tus di ngai do.

²⁷Gen jơh ală cau Juda mơ làng bol Jerusalem bal mơ bơtau Jehôsaphat rê wơl hơ Jerusalem dô bă hòn chò, bơh Yàng Jehôwa lơh bol khai in hòn chò pha rlau mơ cau sò tơm bol khai dê.

²⁸Bol khai mut tòm Jerusalem mơ lòt tus hơ hìu duh khoai Yàng Jehôwa dê bal mơ ală kơñi, ală kơwào mơ ală kơlwòk.

²⁹Bơta rngòt rngơt Yàng Tom Trồ dê mù hơđang làm jơh ală lơgar, tòm tŭ bol khai kơno lah Yàng Jehôwa neh tòmlơh tòmdră mơ ală cau sò tơm Israel dê.

³⁰Behơ̆ Jehôsaphat at bồ tòm lơgar geh ring lơngai, bơh Yàng Tom Trồ ai khai in rlô lơngai bơh kòp đah gùt dar.

³¹Jehôsaphat gơs bơtau at bồ hơđang Juda, tòm tŭ khai neh pe jơt pram nam, mơ at bồ tòm Jerusalem bàr jơt pram nam. Mè khai sơnđan la Ajuba, kòn ùr Silhi.

³²Khai lòt jat ală gùng dà bèp khai dê la Asa, mơ ò wèt bơh di ală gùng dà hơ̆; lơh bơta niam di đap mat Yàng Jehôwa.

³³Bulah behơ̆, ală tiah jơnhoa duh khoai òhềt tă sang, mơ làng bol òhềt ơn jơh nùs duh khoai Yàng Tom Trồ ală ồng pàng bol khai dê.

³⁴Ală broă ndai tòm rài at bồ Jehôsaphat dê, bơh sơnròp tus di lồi dut, neh geh cih tòm sră yal broă kòp nam Jehu dê, kòn klau Hanani, kung geh cih tòm sră yal yau ală cau bơtau Israel dê.

³⁵Tơnơ̆ hơ̆, Jehôsaphat bơtau Juda lơh gơs dô bă bal mơ Acasia bơtau Israel la cau lơh oă bơta iơh bơsak.

³⁶Jehôsaphat dô nùs bal mơ khai nàng pơng dô mpồl ơhò lòt hơ Tarsi; bol khai kung pơng ơhò tòm Ejiôn Geber,

³⁷Mơya Eliejer kòn klau Dôdabahu ơm tòm Maresa đơs hwơr tòmdră mơ Jehôsaphat lah: “Tài bơh bơtau neh dô nùs bal mơ Acasia, Yàng Jehôwa rơp tơnroh ală bơta bơtau neh lơh gơs.” Ală ơhò neh bơcah mơ ò rgơi lòt hơ Tarsi.