Read koho II Yal Yau 21 Bible Online

II Yal Yau 21 - koho bible

II Yal Yau 21

¹Gen Jehôsaphat bic lơhă bal mơ ală ồng pàng khai dê mơ geh tơp bal mơ bol khai tòm ƀòn dờng Dabit. Mơ kòn klau khai dê la Jehôram pơrdòn sơbàn khai dê.

²Khai gơs ală oh mi, la ală kòn klau Jehôsaphat dê la Ajaria, Jehiel, Sacari, Ajariahu, Mikael mơ Sephatia. Jơh ală la kòn klau Jehôsaphat bơtau Israel dê.

³Bèp bol khai dê neh ai bol khai in oă ngan phan pà, priă mơ màh mơ ală phan màng gơs phan tòm, kung ai ală ƀòn dờng kơ̆ cê tòm Juda sơl, mơya bèp khai ai lơgar Jehôram in, tài bơh khai la kòn klau tơnhoa.

⁴Tòm tŭ Jehôram nggui hơđang sơbàn bèp khai dê mơ geh bơtào kơ̆, gen khai ai đào tơnchơt jơh ală oh mi khai dê bal mơ ală cau kwang lơgar Israel dê.

⁵Jehôram neh pe jơt bàr nam tòm tŭ khai sơntòm at bồ, khai at bồ phàm nam tòm Jerusalem.

⁶Khai lòt tòm ală gùng dà ală bơtau Israel kung be hìu Ahap neh lòt, tài bơh kòn ùr Ahap la bau ùr khai dê. Khai lơh bơta iơh di đap mat Yàng Jehôwa.

⁷Bulah behơ̆, Yàng Jehôwa ò kòñ tơnroh hìu Dabit, tài bơh bơta ho pơgon Kơnràñ neh bơtào mơ Dabit, mơ bơh di tŭ hơ̆ Kơnràñ neh ho ai dô nơm ồs đèng Dabit in mơ ală kòn sau khai in gam sùm sùm.

⁸Tòm rài Jehôram dê, Edôm bơtào tòmdră di bơta at bồ cau Juda dê mơ pồ bơtào dô nă bơtau is bol khai in.

⁹Behơ̆ Jehôram lòt tus tềng hơ̆ bal mơ ală cau kwang at bồ mơ jơh ală rơndeh ơseh tòmlơh khai dê. Bơtau Jehôram lik lòt tòm trồ mang nàng brồ lơh cau Edôm, bơh cau Edôm gơrwàng gùt dar khai mơ ală cau kwang at bồ ală rơndeh ơseh tòmlơh khai dê.

¹⁰Behơ̆ cau Edôm kư̆ bơtào tòmdră di bơta at bồ cau Juda dê jơl tus di ngai do. Kung tòm tŭ hơ̆, Lipna bơtào tòmdră bơtau at bồ khai dê, tài bơh Jehôram neh sang lòi Jehôwa Yàng Tom Trồ ală ồng pàng khai dê.

¹¹Rlau mơ hơ̆ khai neh bơt bơtào ală tiah jơnhoa tòm ală tiah kơh mơnơm Juda dê mơ neh lam làng bol ơm tòm Jerusalem ò dòn song mơ Yàng mơ neh lơh Juda in lòt tìs nrah.

¹²Jehôram dòp dô pang sră pơyoa bơh cau gơnoar hwơr Elise cih lah: “Do la jơnau đơs Yàng Jehôwa dê la Yàng Tom Trồ ồng pàng bơtau dê la Dabit: ‘Bơh mê ò lòt tòm ală gùng dà bèp mê dê la Jehôsaphat hala Asa bơtau Juda.

¹³Mơya mê neh lòt tòm ală gùng dà ală cau bơtau Israel dê, mơ lam Juda mơ làng bol Jerusalem ò dòn song be hìu Ahap neh ò dòn song, mơ mê kung neh tơnchơt ală oh mi mê dê, la ală cau tòm hìu nhă bèp mê dê, la ală cau niam rlau mơ să tòm mê.

¹⁴Behơ̆ tŭ do Yàng Jehôwa rơp cèng bơta rung rài dờng ngan hơđang làng bol mê dê, ală kòn sau mê dê, ală bau ùr mê dê mơ jơh ală phan gơrê bal mơ mê.

¹⁵Să tòm mê rơp gơs kòp jê kơnjơ̆ ngan, jê tòm pròc klung mê dê jơl tus dê tŭ pròc klung mê dê gơlik di tiah, bơh ngai do tus ngai ne tài bơh bơta kòp jê hơ̆.’”

¹⁶Yàng Jehôwa tơngguh bơta gơjrañ cau Philistin mơ cau Arap ơm rềp mơ cau Kus tòmdră mơ Jehôram.

¹⁷Bol khai brồ lơh Juda, tòmpìt ai gơ mơ tă cèng jơh ală phan mơna bol khai jòi bàn tòm gơlang bơtau dê, bal mơ ală kòn klau mơ ală bau ùr khai dê. Ò gam wơl khai in dô nă kòn klau lơi, mìng Acasia kòn put khai dê.

¹⁸Tơnơ̆ mơ jơh ală bơta hơ̆, Yàng Jehôwa lơh Jehôram bơh dô bơta kòp jê tòm pròc klung ò rgơi sơmbòi.

¹⁹Tŭ tơngai lòt rlau, di lồi nam dơ̆ bàr, pròc klung khai dê gơlik di tiah tài bơh bơta kòp jê, mơ khai chơt dô bă jê sồt ngan. Làng bol khai dê ò sing ồs dờng nàng moat bơh khai be neh sing ồs ală ồng pàng khai in.

²⁰Jehôram neh pe jơt bàr nam tòm tŭ khai sơntòm at bồ, mơ khai at bồ tòm Jerusalem phàm nam. Khai chơt ò gơs cau lơi kah pơlai mơ geh tơp tòm Ƀòn Dờng Dabit, mơya ò di tòm bơtô ƀồc ală cau bơtau dê.