Read koho II Yal Yau 22 Bible Online

II Yal Yau 22 - koho bible

II Yal Yau 22

¹Làng bol Jerusalem pồ bơtào Acasia kòn klau put Jehôram dê pơrdòn sơbàn khai, bơh gơs dô mpồl ling tus bal mơ cau Arap tòm sàl ling mơ tơnchơt jơh ală kòn klau dờng bơtau dê. Behơ̆ Acasia kòn klau Jehôram gơs bơtau at bồ Juda.

²Acasia neh bàr jơt bàr nam tòm tŭ khai sơntòm at bồ, khai at bồ dô nam tòm Jerusalem. Sơnđan mè khai la Athalia, sau ùr Ômri dê.

³Khai kung lòt tòm ală gùng dà Ahap dê, bơh mè khai sơnio lam khai lơh bơta iơh bơsak.

⁴Khai lơh bơta iơh di đap mat Yàng Jehôwa, kung be hìu Ahap neh lơh, bơh tơnơ̆ mơ tŭ chơt bèp khai gen bol khai gơlik gơs cau cri bơyai lam khai tus di tiah roh rui.

⁵Khai kung jat jơnau bơyai bol hơ̆ dê tòm tŭ khai lòt bal mơ Jôram kòn klau Ahap bơtau Israel dê nàng tòmlơh mơ Hajael bơtau Aram dê tòm Ramôt Galaat. Cau Aram lơh Jôram in kong sồt;

⁶behơ̆ khai rê wơl hơ Jejreel nàng sơm ală tềl sồt mơ khai neh kong tòm Ramôt Galaat tòm tŭ khai tòmlơh mơ Hajael bơtau Aram. Gen Acasia bơtau Juda mù hơ Jejreel nàng còp Jôram kòn klau Ahap tài bơh khai neh kong sồt.

⁷Mơya hơ̆ la bơta lơh nền bơh Yàng Tom Trồ lơh Acasia in gơkòl roh rui, bơh bơta khai lòt còp Jôram. Bơh tòm tŭ Acasia tus tềng hơ̆ khai lòt mơ Jôram nàng tìp Jehu kòn klau Nimsi la cau mơ Yàng Jehôwa neh bong mơñà nàng tơnroh hìu Ahap.

⁸Tòm tŭ Jehu neh lơh gơs bơta cahrña hìu Ahap dê, khai bàn ală kòn klau bơtau Juda dê mơ ală kòn klau ală cau gơp bơtiàn Acasia dê ơm duh broă Acasia in, gen khai tơnchơt bol hơ̆.

⁹Lồc behơ̆ khai lòt jòi Acasia, mơ ală cau khai dê neh kup tòm tŭ khai pồn să tòm Samari. Cau cèng khai tus hơ Jehu mơ tơnchơt khai. Bol khai tơp khai bơh bol khai đơs lah: “Khai la dô nă sau klau Jehôsaphat dê la cau neh jơh nùs jòi jat Yàng Jehôwa.” Behơ̆ ò gam dô nă cau lơi tòm hìu Acasia dê rgơi at bồ lơgar.

¹⁰Tòm tŭ Athalia mè Acasia dê gŏ kòn klau khai dê neh chơt rau, khai ñă ntào tơnroh jơh hìu nhă cau bơtau Juda dê.

¹¹Mơya Jehôsebat kòn ùr bơtau Jehôram cèng Jôas kòn klau Acasia mơ kơñau khai bơh digùl ală kòn klau bơtau dê rơp gơkòl tơnchơt, ơn khai bal mơ cau ròng khai tòm dô nơm ơdŭ bic. Behơ̆ Jehôsebat kòn ùr bơtau Jehôram mơ bau ùr cau gơnoar ơn phan duh khoai Jehôyada la ruh Acasia dê, khai pồn Jôas bơh di Athalia nàng mò ò geh tơnchơt Jôas.

¹²Jôas ơm pồn să mơ bol khai tòm hìu duh khoai Yàng Tom Trồ dê tòm prau nam, tòm tŭ Athalia at bồ hơđang lơgar.