Read koho II Yal Yau 23 Bible Online

II Yal Yau 23 - koho bible

II Yal Yau 23

¹Mơya tòm nam dơ̆ poh, Jehôyada yal tơlik bơta khin cha khai dê. Khai bơtào dô bơta ho bal mơ ală cau kwang at bồ dô rhiang ling la Ajaria kòn klau Jerôham, Ismael kòn klau Jehôhanan, Ajaria kòn klau Ôbet, Maaseya kòn klau Adaya, mơ Elisaphat kòn klau Jikri.

²Bol khai lòt làm jơh Juda mơ pơjum tơrgòm cau Lebi mơ ală cau tòm at bồ hìu nhă Israel dê, bơh di jơh ală ƀòn dờng, mơ bol khai tus hơ Jerusalem.

³Gen jơh dô mpồl jơnum bơtào bơta ho bal mơ cau bơtau tòm hìu duh khoai Yàng Tom Trồ dê. Jehôyada đơs mơ bol khai lah: “Do la kòn klau bơtau rơp at bồ jat be jơnau Yàng Jehôwa neh ho pơgon bơh ală kòn sau Dabit dê.

⁴Tŭ do, do la bơta bol mê pal lơh: dô pơnah pe bol mê la cau gơnoar ơn phan duh khoai mơ cau Lebi gơs broă tòmpal lơh tòm ngai Saƀat gen ơm kơp gàr di ală mpồng,

⁵dô pơnah pe bol mê ơm di gơlang bơtau, mơ dô pơnah pe ơm di mpồng Jesôt dê, mơ jơh ală cau ndai pal ơm tòm ƀlàng hìu duh khoai Yàng Jehôwa dê.

⁶Ò gơs cau lơi geh mut tòm hìu duh khoai mìng ală cau gơnoar ơn phan duh khoai mơ ală cau Lebi gơs gơnoar nàng duh broă; bol khai rgơi mut tài bơh bol khai neh geh ơn is sàng goh, mơya jơh ală cau ndai pal lơh jat jơnau nting sồr Yàng Jehôwa dê.

⁷Să tòm ală cau Lebi pal ơm gùt dar bơtau, kòp nă at đào tòm tê; mơ cau lơi mut tòm hìu duh khoai gen pal kong tơnchơt. Ơm tĕ bal mơ cau bơtau tòm tŭ khai mut mơ tŭ khai lik.”

⁸Ală cau Lebi mơ jơh ală cau Juda lơh jat tòm toh be jơnau sồr cau gơnoar ơn phan duh khoai Jehôyada dê. Kòp nă lam ală cau khai dê, hơ̆ la ală cau gơs broă lơh tòm ngai Saƀat mơ ală cau neh sir lơh broă tòm ngai hơ̆, bơh Jehôyada cau gơnoar ơn phan duh khoai ò ai dô mpồl lơi lik rê.

⁹Gen khai jào ală cau at bồ ală mpồl dô rhiang nă in ală tà mơ ală khèl dờng mơ dềt neh gơrê bal mơ bơtau Dabit mơ neh geh ơn tòm hìu duh khoai Yàng Tom Trồ dê.

¹⁰Khai rơndap ơn jơh ală cau nàng sền gàr bơtau, kòp nă at đào tòm tê, bơh đah đang hìu duh khoai tus đah đơm hìu duh khoai mơ gùt dar cơnòng duh khoai mơ hìu duh khoai.

¹¹Gen Jehôyada cèng tơlik kòn klau bơtau dê mơ tơndau sơgơn bơtau hơđang bồ khai; mơ ai khai in sră bơta ho bal mơ yal tơnggit khai gơs bơtau at bồ. Jehôyada mơ ală kòn klau khai dê bong mơñà bơtau in mơ driau dờng lah; “Dan bơtau in kis jŏ!”

¹²Tòm tŭ Athalia kơno jơnau làng bol ntoat mơ driau dờng hòn chò jòng ro cau bơtau, khai lòt tus hơ hìu duh khoai Yàng Jehôwa dê mơ tus hơ làng bol;

¹³gen tòm tŭ khai sền mơ gŏ cau bơtau ntào hơđang kơnă ntào di gùng mut, mơ ală cau kwang duh broă, ală cau uh kơlwòk ơm ntào di gah cau bơtau, mơ jơh làng bol tòm lơgar hòn chò mơ uh kơlwòk, mơ ală cau đơs chò bal ală kơñi ơm lam bồ bơta đơs chò jòng ro. Gen Athalia crè ào jrùh khai dê, mơ driau dờng lah: “Pơrlơ̆ dră! Pơrlơ̆ dră!”

¹⁴Jehôyada cau gơnoar ơn phan duh khoai sồr ală cau kwang at bồ dô rhiang ling gơs broă at bồ mpồl ling đơs mơ bol khai lah: “Cèng tơlik tĕ khai bơh digùl tiah do, mơ ai đào tơnchơt cau lơi lòt jat khai.” Bơh cau gơnoar ơn phan duh khoai neh đơs lah: “Bañ tơnchơt khai tòm hìu duh khoai Yàng Jehôwa dê.”

¹⁵Behơ̆ bol khai kup Athalia tòm tŭ khai tus di tiah mut Mpồng Ơseh gơlang bơtau dê, mơ tềng hơ̆ bol khai tơnchơt Athalia.

¹⁶Gen Jehôyada bơtào dô bơta ho bal, khai mơ làng bol mơ cau bơtau rơp lơh gơs làng bol Yàng Jehôwa dê.

¹⁷Jơh làng bol lòt tus hơ hìu duh khoai Baal mơ sòr tơrlah gơ. Bol khai pòng bơcah cơnòng duh khoai mơ ală rùp ràk mơ tơnchơt Mattan cau gơnoar ơn phan duh khoai Baal dê di đap ală cơnòng duh khoai.

¹⁸Jehôyada jào broă rcang gàr hìu duh khoai Yàng Jehôwa dê mpồl cau Lebi la ală cau gơnoar ơn phan duh khoai, la ală cau mơ Dabit neh jào broă tòm hìu duh khoai nàng ơn ală phan ơn chu pơrguc Yàng Jehôwa in be neh cih tòm sră bơta Boh lam Môise dê, dô bă hòn chò bal mơ jơnau đơs chò kung be Dabit neh sồr.

¹⁹Khai kung ơn ală cau kơp gàr mpồng di ală mpồng dờng hìu duh khoai Yàng Jehôwa dê, nàng ò gơs cau lơi bulah bơh bơta lơi mơ gơlik ò goh.

²⁰Khai lam ală cau kwang at bồ mpồl dô rhiang ling, ală cau ryŭ ryơm, ală cau kwang at bồ làng bol mơ jơh làng bol tòm lơgar, mơ cèng cau bơtau mù bơh hìu duh khoai Yàng Jehôwa dê. Bol khai lòt gan di Mpồng Hơđang mơ mut tòm gơlang mơ ơn cau bơtau nggui hơđang sơbàn bơtau dê,

²¹mơ jơh làng bol tòm lơgar hòn chò ngan. Mơ ƀòn dờng ơm ring ngềt, tơnơ̆ mơ tŭ Athalia neh kong tơnchơt mơ đào.