Read koho II Yal Yau 24 Bible Online

II Yal Yau 24 - koho bible

II Yal Yau 24

¹Jôas neh poh nam tòm tŭ khai sơntòm at bồ, mơ khai at bồ poan jơt nam tòm Jerusalem. Sơnđan mè khai dê la Jibia ƀòn tòm Beerseba.

²Jôas lơh bơta di niam di đap mat Yàng Jehôwa tòm jơh rài cau gơnoar ơn phan duh khoai Jehôyada gam kis.

³Jehôyada lap bàr nă bau ùr Jôas in, mơ khai tơnggơs ală kòn klau mơ ală kòn ùr.

⁴Tòm dô êt jŏ tơnơ̆ mơ hơ̆ Jôas lơh nền rcang bơt wơl hìu duh khoai Yàng Jehôwa dê.

⁵Khai pơjum ală cau gơnoar ơn phan duh khoai mơ ală cau Lebi mơ đơs mơ bol khai lah: “Lòt tĕ tus hơ ală ƀòn dờng Juda dê mơ tơrgòm jền priă tòm jơh Israel kòp nam; nàng rcang bơt wơl hìu duh khoai Yàng Tom Trồ bol mê dê. Bol mê lơh tĕ mhar.” Mơya cau lebi ò lơh mhar mo.

⁶Gen tàng bơtau hòi Jehôyada mơ đơs mơ khai lah: “Ñchi bơh tài ồng ò sồr cau Lebi cèng bơh di Juda mơ Jerusalem jền dap dia neh lơh nền bơh Môise cau duh broă Yàng Jehôwa dê mơ bơh mpồl jơnum Israel dê pal ơn sàl bơta ho bal in taih?”

⁷Bơh ală kòn sau Athalia cau ùr iơh bơsak ne neh mut kơñau tòm hìu duh khoai Yàng Tom Trồ dê mơ kung neh ngui ală phan ơn is sàng goh tòm hìu Yàng Jehôwa dê nàng duh khoai ală Baal.

⁸Gen bơtau ai jơnau gơnoar sồr, bol khai pơng dô nơm đài mơ ơn đah bơdìh mpồng dờng hìu duh khoai Yàng Jehôwa dê.

⁹Dô jơnau yal tơnggit neh geh yal tòm Juda mơ tòm Jerusalem lah bol khai pal cèng Yàng Jehôwa in jền dap dia mơ Môise cau duh broă Yàng Tom Trồ dê neh sồr Israel pal dap tòm ƀlàng ngềt ngơt.

¹⁰Jơh ală cau kwang at bồ mơ jơh làng bol chò hòp cèng tus ală pơnah dap dia bol khai dê, mơ tơndùh tòm đài jơl tus di tŭ gơ neh bềng.

¹¹Tŭ lơi cau Lebi cèng đài tus hơ ală cau kwang duh broă cau bơtau dê mơ bol khai gŏ gơs oă jền tòm hơ̆, gen cau cih sră bơtau dê mơ cau kwang duh broă cau gơnoar lam bồ ơn phan duh khoai dê rơp tus mơ tuh tơlik jơh bơh đài mơ cèng đài ơn wơl di tiah yau gơ dê. Bol khai kư̆ lơh sùm kòp ngai behơ̆ mơ dòp geh dô ntum khà jền dờng ngan.

¹²Cau bơtau mơ Jehôyada ai jền hơ̆ ală cau gơs broă pal lơh hìu duh khoai Yàng Jehôwa in. Bol khai ơpah ală cau chài bơt hìu mơ chài lơh chi nàng rcang bơt wơl hìu duh khoai Yàng Jehôwa dê, mơ kung ơpah ală cau chài tiar tŏ lòs mơ kòng sơl nàng rcang bơt wơl hìu duh khoai.

¹³Ală cau gơs broă lơh gen lơh ngac ngar ngan, bơh hơ̆ bơta rcang bơt wơl gơlik gơs mhar. Bol khai rcang bơt wơl hìu duh khoai jat be neh bơt sơnròp ngan mơ lơh gơ in gơs kơ̆.

¹⁴Tòm tŭ bol khai neh lơh sir, bol khai cèng jền gam wơl bơtau mơ Jehôyada in, mơ ngui jền hơ̆ lơh gơs ală phan ngui tòm bơta ơn ală phan ơn chu pơrguc, kung lơh gơs ală prềng mơ ală phan ngui ndai mơ màh mơ priă. Jehôyada gam kis jŏ kàr lơi gen ală phan ơn chu pơrguc geh ơn sùm kàr hơ̆ tòm hìu duh khoai Yàng Jehôwa dê.

¹⁵Mơya Jehôyada neh kra mơ jòng sơnam, mơ khai chơt tòm tŭ khai gơs dô rhiang mơ pe jơt nam.

¹⁶Khai geh tơp bal mơ ală cau bơtau tòm Ƀòn Dờng Dabit, tài bơh bơta niam mơ khai neh lơh Yàng Tom Trồ in mơ hìu duh khoai Kơnràñ in tòm Israel.

¹⁷Tơnơ̆ mơ tŭ Jehôyada neh chơt, ală cau kwang duh broă tòm Juda lòt tus yal tơlik bơta dòn duh di cau bơtau, mơ bơtau wèt tồr iat bol khai,

¹⁸Bol khai sang lòi hìu duh khoai Yàng Jehôwa la Yàng Tom Trồ ală ồng pàng bol khai dê mơ duh khoai ală jrong duh khoai mơ ală rùp ràk Asera dê. Tài bơh bơta tồi glài bol khai dê gen bơta gơjrañ dờng Yàng Tom Trồ dê dùh hơđang Juda mơ Jerusalem.

¹⁹Bulah Yàng Jehôwa sồr ală cau gơnoar hwơr lòt tus hơ làng bol nàng cèng bol khai rê wơl hơ Kơnràñ, mơ bulah bol khai lơh cơng tòmdră mơ làng bol, mơya làng bol ò bài iat.

²⁰Gen Hwềng Yàng Tom Trồ mù hơđang Sacari kòn klau Jehôyada cau gơnoar ơn phan duh khoai. Khai ntào di đap làng bol mơ đơs lah: “Yàng Tom Trồ đơs be do: ‘Ñchi bơh tài bol mê ò dòn bơr lơh jat ală jơnau gơnoar sồr Yàng Jehôwa dê tiah? Bol mê rơp ò geh bơtoah bơtoài ò. Tài bơh bol mê neh sang lòi Yàng Jehôwa, Kơnràñ kung neh sang lòi bol mê.’”

²¹Mơya bol khai bơyai òm tòmdră mơ khai, mơ jat jơnau gơnoar sồr bơtau dê, bol khai cơm lŭ tơnchơt khai tòm ƀlàng hìu duh khoai Yàng Jehôwa dê.

²²Bơtau Jôas ò kah bơta niam mơ Jehôyada bèp Sacari neh lơh khai in, mơya neh tơnchơt kòn klau khai dê; tòm tŭ gơpừ bic tòm tiah mòr chơt, khai đơs lah: “Dan Yàng Jehôwa sền gŏ bơta do mơ tơm wơl bol mê in jat bơta bol mê neh lơh.”

²³Di tŭ lồi nam, mpồl ling Aram lòt tus tòmlơh mơ Jôas; bol khai brồ lơh Juda mơ Jerusalem mơ tơnchơt jơh ală cau kwang at bồ làng bol. Bol khai pơyoa jơh ală phan phà tòmpìt tus hơ cau bơtau bol khai dê tòm Damas.

²⁴Bulah mpồl ling Aram neh tus gơs mìng dô êt cau ling, Yàng Jehôwa neh jào phi tòm tê bol khai dô mpồl gơs oă cau rlau. Tài bơh Juda neh sang lòi Jehôwa Yàng Tom Trồ ală ồng pàng bol khai dê, bơta cahrña neh tus hơđang Jôas.

²⁵Tòm tŭ cau Aram ruc wơl, bol khai lòi wơl Jôas kong sồt kơnjơ̆ ngan. Ală cau kwang duh broă khai bơyai bơtào kai gơrmơ̆i tòmdră mơ khai, tài bơh mhàm kòn klau Jehôyada cau gơnoar ơn phan duh khoai, mơ bol khai tơnchơt Jôas tòm tŭ khai ơm bic hơđang cơnòng bic khai dê. Behơ̆ khai chơt mơ geh tơp tòm Ƀòn Dờng Dabit, mơya ò di tòm bơtô ƀồc ală cau bơtau dê.

²⁶Ală cau neh bơyai bơtào bơta tòmdră mơ khai la Jabat kòn klau Simeat dô nă cau ùr Ammôn, mơ Jehôjabat kòn klau Simrit dô nă cau ùr Môap.

²⁷Jơnau yal bơh ală kòn klau khai dê, ală jơnau đơs hwơr bơh khai, mơ sră cih yal bơh bơta rcang bơt wơl hìu duh khoai Yàng Tom Trồ dê neh geh cih tòm ală sră yal broă ală cau bơtau dê. Mơ Amajiah kòn klau khai dê gơs bơtau tơrbŏ sơbàn khai.