Read koho II Yal Yau 25 Bible Online

II Yal Yau 25 - koho bible

II Yal Yau 25

¹Amajiah neh bàr jơt pram nam tòm tŭ khai sơntòm at bồ, mơ khai at bồ bàr jơt sin nam tòm Jerusalem. Sơnđan mè khai la Jehôadan, tòm Jerusalem.

²Khai lơh bơta di niam di đap mat Yàng Jehôwa, mơya òhềt jơh nùs song ngan.

³Tòm tŭ lơgar neh ơm kơ̆ hơđơm gơnoar at bồ khai dê rau, khai tơnchơt ală cau kwang duh broă neh tơnchơt bơtau la bèp khai.

⁴Mơya khai ò tơnchơt ală kòn sau bol hơ̆ dê, jat be neh cih tòm sră bơta boh lam Môise dê, mơ Yàng Jehôwa neh sồr: “Mè bèp ò kong tơnchơt ala ală kòn in, hala ală kòn ò kong tơnchơt ala mè bèp in; mơya jơh tơl nă pal kong chơt bơh glài is he dê.”

⁵Amajiah hòi pơjum làng bol Juda mơ jat ală hìu nhă bol khai dê mơ ơn bol khai hơđơm gơnoar ală cau kwang at bồ dô rbô ling mơ dô rhiang ling tòm jơh Juda mơ Benjamin. Gen khai tơrgòm ală cau bơh bàr jơt nam guh hơđang, gơs pe rhiang rbô nă cau di nam lòt ling, rgơi at tà mơ khèl nàng tòmlơh.

⁶Khai kung ơpah dô rhiang rbô nă cau ling Israel dô rhiang talơng priă.

⁷Mơya gơs dô nă cau Yàng Tom Trồ dê lòt tus mơ khai mơ đơs lah: “Ơ bơtau, bañ lòi ală mpồl ling Israel lòt bal mơ bơtau, bơh Yàng Jehôwa ò ơm bal mơ Israel, kung ò ơm bal mơ jơh làng bol Epraim.

⁸Bulah bơtau lòt is mơ tòmlơh, pràn kơldang tòm tiah tòmlơh, hala Yàng Tom Trồ rơp sang sơrbì bơtau di đap cau sò tơm, bơh Yàng Tom Trồ gơs gơnoar dong kòl hala lơh alah.”

⁹Amajiah lùp cau Yàng Tom Trồ dê lah: “Mơya mbe kòñ lơh bơh dô rhiang talơng mơ añ neh tơm mpồl ling Israel in taih?” Cau Yàng Tom Trồ dê ho lah: “Yàng Jehôwa rgơi ai bơtau in gơs oă rlau mơ hơ̆.”

¹⁰Behơ̆ Amajiah sồr ală mpồl ling neh tus mơ khai bơh di Epraim rê hìu. Mơya bol khai gơhào nùs ngan di Juda mơ rê hìu tòm nùs gơhào gơjrañ ngan.

¹¹Gen Amajiah ai jơh bơta khin cha mơ lam mpồl ling khai dê tus hơ Thòng Boh, mơ tơnchơt jơt rbô nă cau Seir.

¹²Mpồl ling Juda kung kup jơt rbô nă cau gam kis, lam bol khai guh hơđang bồ mơnơm Sela mơ tơlo bol khai tòm cìr hơ̆ nàng chơt lề làc.

¹³Mơya ală mpồl ling mơ Amajiah neh tơnrê ò ai lòt tòm bơta tòmlơh, bol khai tòmpìt ai phan mơna cau tòm ală ƀòn dờng Juda, bơh Samari tus hơ Bet Hôrôn. Bol khai tơnchơt pe rbô nă cau mơ tòmpìt ai oă ngan phan mơna.

¹⁴Tòm tŭ Amajiah rê wơl bơh di bơta tơnchơt cau Edôm, khai cèng brê ală rùp ràk cau Seir dê. Khai bơtào lơh gơs ală yàng să tòm khai dê, cùn khoai bol gơ mơ ơn phan duh khoai bol gơ in.

¹⁵Yàng Jehôwa gơhào gơjrañ di Amajiah, mơ Kơnràñ sồr dô nă cau gơnoar hwơr tus đơs mơ khai lah: “Ñchi bơh tài mê hòi lùp ală yàng ală làng bol do dê, la ală yàng ò rgơi dong klàs làng bol tòm bol gơ dê bơh di tê mê taih?”

¹⁶Tòm tŭ cau gơnoar hwơr ơm đơs, cau bơtau đơs mơ khai lah: “Bol hi neh pồ bơtào mê lơh gơs dô nă cau bơto sơnio cau bơtau in sơl ơ? Ơm tĕ mŏ mŏ! Ñchi bơh tài mê kòñ chơt taih?” Behơ̆ cau gơnoar hwơr ơm ò đơs tai, mơya đơs bơtơl lah: “Añ git la Yàng Tom Trồ neh lơh nền tơnroh bơtau, tài bơh bơtau neh lơh ală bơta do mơ ò bài iat jơnau bơto tơngkah añ jê.”

¹⁷Gen Amajiah bơtau Juda neh tòmbơyai mơ khai pơyoa jơnau tus hơ Jôas kòn klau Jôaca, sau Jehu bơtau Israel dê: “Tus tĕ, bol he tìp mat bal.”

¹⁸Mơya Jôas bơtau Israel ho wơl mơ Amajiah bơtau Juda lah: “Dô rlau lò mrơt tòm Liban pơyoa jơnau mơ dô đòm chi pơnàng tòm Liban mơ lah: ‘Ai tĕ kòn ùr mê dê bau mơ kòn klau añ jê.’ Gen dô nơm phan poan jơng tòm Liban lòt gan mơ jă rlau lò hơđơm mpàng jơng.

¹⁹Mê đơs mơ să tòm mê lah mê neh tòmlơh pha rlau mơ Edôm, mơ tŭ do mê jòng să mơ pơnhừ să. Mơya ơm tĕ wơl tòm hìu mê dê! Ñchi bơh tài jòi jat bơta bòl glar kalke lơh mê in gơtup pừ mơ lơh Juda in kung gơtup pừ bal taih?”

²⁰Bulah behơ̆, Amajiah ò bài iat, bơh Yàng Tom Trồ lơh tồ jào phi bol khai Jôas in, tài bơh bol khai jòi jat ală yàng Edôm dê.

²¹Behơ̆ Jôas bơtau Israel brồ lơh. Khai mơ Amajiah bơtau Juda tìp tòm toh mat tòm Bet Semet gơrê mơ Juda.

²²Juda kòl Israel lơh alah mơ kòp nă dô rê hơ hìu tòm khai dê.

²³Jôas bơtau Israel kup Amajiah bơtau Juda, kòn klau Jôas, sau Jôaca dê tòm Bet Semet. Gen Jôas cèng khai tus hơ Jerusalem mơ lơh tơrlah ală dơrñang Jerusalem dê bơh di Mpồng Epraim tus di Mpồng Mum, ngài pơgap poan rhiang tal jòng ròt.

²⁴Khai ai jơh màh mơ priă mơ jơh ală phan ngui jòi bàn tòm hìu duh khoai Yàng Tom Trồ dê neh geh sền gàr bơh Ôbet Edôm, bal mơ ală phan màng tòm gơlang bơtau dê bal mơ ală cau neh geh kup gen rê wơl hơ Samari.

²⁵Amajiah kòn klau Jôas bơtau Juda kis jơt pram nam tơnơ̆ mơ bơta chơt Jôas kòn klau Jehôahas bơtau Israel dê.

²⁶Bơh ală bơta ndai tòm rài at bồ Amajiah dê, bơh sơnròp tus di lồi dut, ò di neh geh cih tòm ală Sră ală Bơtau Juda mơ Israel dê ò ơ?

²⁷Bơh di tŭ Amajiah pơrlac sang ò lòt jat Yàng Jehôwa, gơs ală cau bơyai bơtào tòmdră mơ khai tòm Jerusalem mơ khai ntoat dô hơ Lakis, mơya bol khai sồr cau ting jat khai tòm Lakis mơ tơnchơt khai tềng hơ̆.

²⁸Khai geh cèng brê wơl mơ ơseh mơ geh tơp bal mơ ală ồng pàng khai dê tòm Ƀòn Dờng Dabit.