Read koho II Yal Yau 26 Bible Online

II Yal Yau 26 - koho bible

II Yal Yau 26

¹Gen jơh làng bol Juda bơtào Ujia gơs bơtau at bồ pơrdòn sơbàn Amajiah bèp khai dê; tŭ hơ̆ khai neh jơt prau nam.

²Khai la cau rcang bơt wơl Elôt mơ bơtào wơl Juda in, tơnơ̆ mơ tŭ Amajiah neh bic rlô bal mơ ală ồng pàng khai dê.

³Ujia neh jơt prau nam tòm tŭ khai sơntòm at bồ, mơ khai at bồ pram jơt bàr nam tòm Jerusalem. Sơnđan mè khai la Jekôlia ơm tòm Jerusalem.

⁴Khai lơh bơta di niam di đap Yàng Jehôwa be bèp khai la Amajiah neh lơh.

⁵Khai jòi jat Yàng Tom Trồ tòm rài Sacari la cau neh bơto sồr khai duh rngòt di Yàng Tom Trồ. Khai jòi jat Yàng Jehôwa jŏ kàr lơi gen Yàng Tom Trồ ai khai in bơta bơtoah bơtoài.

⁶Khai lik lòt tòmlơh tòmdră mơ cau Philistin mơ lơh tơrlah dơrñang Gat, Japne mơ Asdôt. Lồc behơ̆ khai bơt wơl ală ƀòn dờng rềp di Asdôt mơ tòm ală tiah ndai digùl cau Philistin.

⁷Yàng Tom Trồ dong kòl khai tòmdră mơ cau Philistin mơ tòmdră mơ cau Arap ơm tòm Gur Baal mơ tòmdră mơ cau Meunit.

⁸Cau Ammôn dap dia Ujia in, mơ jơnau tiơng pơnro bơh khai làm jơh tus di nhàr lơgar Ejiptơ, tài bơh khai neh gơlik pràn kơldang ngan.

⁹Ujia bơt bơtào ală theng jòng jơnhoa tòm Jerusalem di Mpồng Mum, di Mpồng Thòng mơ di mum dơrñang, mơ lơh bol gơ in kơ̆ cê.

¹⁰Khai kung bơt bơtào ală theng jòng jơnhoa tòm ƀlàng ngềt ngơt mơ tò oă tơrlung dà, tài bơh khai gơs oă mpồl phan poan jơng di jơng ală mơnơm mơ tòm ală ƀlàng ring. Khai gơs làng bol lơh broă tòm ală ƀlàng sre mơ tòm ală suơn ño khai dê tòm ală mơnơm dềt mơ ală tiah gơs ù bơkah, tài bơh khai kòñ gơboh di ù tiah.

¹¹Ujia gơs dô mpồl ling oă neh rcang sir nàng lik lòt tòmlơh geh rơndap ală mpồl jat ntum khà gơ dê, mơ geh kòp khà bơh Jeiel cau gơnoar cih mơ bơh Maaseya la dô nă tòm ală cau kwang, ơm hơđơm bơta at bồ Hanania la kwang duh broă bơtau dê.

¹²Ntum khà ală cau tòm hìu nhă at bồ mpồl ling tòmlơh la bàr rbô prau rhiang nă.

¹³Hơđơm gơnoar at bồ bol khai dê gơs dô mpồl ling pe rhiang mơ poh rbô pram rhiang nă neh rcang sir tòmlơh, dô bơta pràn kơldang dờng nàng dong kòl bơtau tòmdră mơ ală cau sò tơm khai dê.

¹⁴Ujia rcang gơs ală khèl, tà, sơgơn lòs tòmlơh, àtak, mơ sơna pañ lŭ jơh dô mpồl cau ling in.

¹⁵Tòm Jerusalem, khai ơn ală măi, bơh ală cau jak chài neh lơh gơs nàng ngui tòm ală theng jơnhoa mơ di ală mum dơrñang gơs cau ling kơp gàr nàng pañ kam mơ ală pơnai lŭ dờng. Khai geh tiơng pơnro làm jơh, bơh khai geh dong kòl dô bă krơi is tus di tŭ khai gơlik gơs pràn kơldang.

¹⁶Mơya tơnơ̆ mơ tŭ Ujia gơlik pràn, bơta pơnhừ să khai dê lơh khai in roh gơprah. Bơh khai ò dòn song mơ Jehôwa Yàng Tom Trồ bol khai dê, mơ mut tòm hìu duh khoai Yàng Jehôwa dê nàng chu kơlhô hơđang cơnòng duh khoai chu kơlhô.

¹⁷Ajaria cau gơnoar ơn phan duh khoai bal mơ phàm jơt nă cau gơnoar ơn phan duh khoai ndai Yàng Jehôwa dê mut jat khai.

¹⁸Bol khai tòmdră mơ khai mơ đơs lah: “Ơ Ujia, bơtau ò gơs gơnoar chu kơlhô Yàng Jehôwa in. Hơ̆ la broă ală cau gơnoar ơn phan duh khoai dê la ală kòn sau Arôn neh geh ơn is sàng goh nàng chu kơlhô. Lik tĕ bơh di tiah sàng goh, bơh bơtau neh lơh tìs; mơ bơtau rơp ò geh jòng ro bơh Jehôwa Yàng Tom Trồ.”

¹⁹Gen Ujia gơhào gơjrañ ngan, tŭ hơ̆ khai neh at gri ơn kơlhô tòm tê khai dê rcang nàng chu. Tòm tŭ khai gơhào gơjrañ di ală cau gơnoar ơn phan duh khoai gen tềl dun neh gơlik di bìng liang khai dê di đap ală cau gơnoar ơn phan duh khoai tòm hìu duh khoai Yàng Jehôwa dê, di gah cơnòng duh khoai chu kơlhô.

²⁰Tòm tŭ Ajaria cau gơnoar lam bồ ơn phan duh khoai mơ jơh ală cau gơnoar ơn phan duh khoai sền gŏ tềl dun di bìng liang khai dê, gen bol khai bơtrơh khai lik mo, mơ să tòm Ujia kung sơrbac sơrbang lik, tài bơh Yàng Jehôwa neh lơh khai.

²¹Bơtau Ujia gơs dun jơl tus di ngai khai chơt. Khai ơm tòm dô nơm hìu is, gơs dun mơ ơm ngài bơh di hìu duh khoai Yàng Jehôwa dê. Jôtham kòn klau khai dê neh geh jào broă sền gàr gơlang mơ at bồ làng bol tòm lơgar.

²²Ală bơta ndai tòm rài at bồ Ujia dê, bơh sơnròp tus di lồi dut, neh geh cih wơl bơh cau gơnoar hwơr Esai kòn klau Amôs dê.

²³Ujia bic lơhă bal mơ ală ồng pàng khai dê mơ geh tơp rềp di bol khai tòm dô nơm ƀlàng tơp ƀồc gơrê bal mơ ală cau bơtau, bơh làng bol đơs lah: “Khai gơs dun.” Mơ Jôtham kòn klau khai dê gơs bơtau pơrdòn sơbàn khai dê.