Read koho II Yal Yau 28 Bible Online

II Yal Yau 28 - koho bible

II Yal Yau 28

¹Aca neh bàr jơt nam tòm tŭ khai sơntòm at bồ, mơ khai at bồ jơt prau nam tòm Jerusalem. Khai ò lơh ală bơta di niam di đap Yàng Jehôwa be Dabit ồng pàng khai dê neh lơh,

²mơya khai lòt tòm ală gùng dà ală cau bơtau Israel dê. Tian gơs pac ală rùp ràk in;

³mơ khai chu ală phan ơn tòm thòng kòn klau Hinôm dê, mơ sang ală kòn klau khai dê tòm ồs, jat ală bơta ngkòr ngkàc be ală lơgar mơ Yàng Jehôwa neh ting bơtrơh bơh di đap làng bol Israel.

⁴Khai ơn ală phan ơn mơ phan pơdơng hơđang ală tiah jơnhoa, hơđang ală bồ kơh mơ hơđơm ală mƀur tòm chi tơlir.

⁵Gen tàng Jehôwa Yàng Tom Trồ khai dê jào khai tơmut tòm tê bơtau Aram dê. Cau Aram lơh khai alah mơ kup jàm oă ngan làng bol khai dê mơ cèng bol khai tus hơ Damas. Khai kung gơkòl jào phi tòm tê cau bơtau Israel dê mơ neh tơnchơt oă ngan.

⁶Peka kòn klau Remalia tơnchơt dô rhiang bàr jơt rbô nă cau tòm Juda tòm dô ngai, jơh ală bol hơ̆ la ală cau ling tòmlơh jak mơ khin cha, tài bơh Juda neh sang lòi Jehôwa la Yàng Tom Trồ ală ồng pàng bol khai dê.

⁷Mơ Jikri dô nă cau Epraim la cau pràn kơldang mơ jak tòmlơh, khai tơnchơt Maaseya kòn klau bơtau, Ajrikam cau kwang sền gàr gơlang, mơ Elkana cau kwang dờng gơnoar oh bơtau dê.

⁸Cau Israel kup cèng bàr rhiang rbô nă cau gơp bơtiàn bol khai dê, ală cau ùr, ală kòn klau mơ ală kòn ùr. Bol khai kung tòmpìt ai oă ngan phan mơna mơ cèng brê hơ Samari.

⁹Mơya tềng hơ̆ gơs dô nă cau gơnoar hwơr Yàng Jehôwa dê sơnđan la Ôdet, khai lik lòt tìp mơ mpồl ling neh rê hơ Samari. Khai đơs mơ bol hơ̆ lah: “Tài bơh Jehôwa Yàng Tom Trồ ală ồng pàng bol mê dê gơhào gơjrañ di Juda, Kơnràñ neh jào bol khai tòm tê bol mê dê. Mơya bol mê neh sreh tơnchơt bol khai tòm bơta gơjrañ dờng gơguh tus hơ trồ.

¹⁰Mơ tŭ do bol mê kòñ kup ală cau klau mơ cau ùr Juda mơ Jerusalem lơh be dĭ bol mê dê. Mơya ñchi bol mê neh tìs glài tòmdră mơ Jehôwa Yàng Tom Trồ bol mê dê taih?

¹¹Tŭ do iat tĕ añ! Tơnrê tĕ ală cau mơ bol mê neh kup, bơh di gơp bơtiàn bol mê dê, bơh bơta gơjrañ dờng Yàng Jehôwa dê ơm hơđang bol mê.”

¹²Rlau mơ hơ̆, ală cau lam bồ cau Epraim dê, la Ajaria kòn klau Jehôhanan, Berekia kòn klau Mesillemôt, Jehiskia kòn klau Sallum, mơ Amasa kòn klau Hatlai ntào tòmdră mơ ală cau pa rê bơh bơta tòmlơh.

¹³Bol khai đơs lah: “Bol mê ò di cèng ală cau neh kup hơ̆ tềng do, bơh bol mê kòñ cèng hơđang bol hi glài tòmdră mơ Yàng Jehôwa; mơ bơtơl tai bol hi in glài hơđang ală tồi glài bol hi dê. Bơh tồi glài bol hi dê neh dờng rau, mơ gơs bơta gơhào gơjrañ dờng tòmdră mơ Israel.”

¹⁴Behơ̆ ală cau ling sang lòi ală cau gơkòl kup mơ ală phan neh tòmpìt geh di đap ală cau kwang at bồ mơ jơh dô mpồl jơnum.

¹⁵Ală cau kwang neh gơs sơnđan mat hơđang do cèng ală cau neh kòl kup mơ ai ồi ào cau ling neh tòmpìt geh tơnsoh ală cau ơm să kuh in. Bol khai ai bol hơ̆ in ồi ào mơ jơkhŏ, phan sa mơ phan hùc, mơ bong mơñà bol khai in, mơ pơdiang jơh ală cau lơbơn òsô tòm bol khai hơđang ală alàng. Behơ̆ bol khai cèng bol hơ̆ rê wơl hơ ală gơp bơtiàn bol khai dê tòm Jerikô la Ƀòn Dờng ală tòm Chi Gòl, gen bol khai rê wơl hơ Samari.

¹⁶Tòm tŭ hơ̆ bơtau Aca sồr cau lòt dan bơtau Asiri dong kòl khai.

¹⁷Bơh cau Edôm neh brồ lơh Juda tai mơ kup cèng oă cau.

¹⁸Tòm tŭ ală cau Philistin phà kơñau ală ƀòn dờng di jơng mơnơm mơ đah đơm Juda, mơ neh tòmpìt ai Bet Semet, Aijalôn, Gederôt, Sôkô mơ ală ƀòn gơ dê, Timna mơ ală ƀòn gơ dê, Gimjô mơ ală ƀòn gơ dê; mơ bol khai ơm tòm hơ̆.

¹⁹Yàng Jehôwa neh tơmù Juda, tài bơh glài Aca bơtau Juda neh ò kơrhia bơta lơh lòt khai dê tòm Juda mơ ò dòn song mơ Yàng Jehôwa.

²⁰Behơ̆ bơtau Tilglat Pilneser, Asiri dê lòt tus tòmdră mơ khai, ò lơh khai in pràn kơldang, mơya sơlo rồn bơklơn khai.

²¹Aca neh tă ai phan bơh hìu duh khoai Yàng Jehôwa dê, bơh di gơlang bơtau mơ bơh di ală cau kwang at bồ nàng ơn bơtau Asiri in, mơya bơta hơ̆ kung ò dong kòl khai.

²²Tòm tŭ tìp bơta bòl glar jê sồt, bơtau Aca neh gơlik ò dòn song rlau tai mơ Yàng Jehôwa.

²³Khai ơn ală phan ơn duh khoai ală yàng Damas in la yàng neh lơh khai in kong alah; bơh khai kơlôi lah: “Tài bơh ală yàng cau Aram dê neh dong kòl bol khai, gen añ ơn phan ơn duh khoai ală yàng hơ̆ nàng ală yàng hơ̆ rơp dong kòl añ.” Mơya ală yàng hơ̆ la bơta roh rui khai in mơ jơh Israel.

²⁴Aca tơrgòm jơh ală phan ngui tòm hìu duh khoai Yàng Tom Trồ dê mơ koh rpot rpet jơh ală phan ngui tòm hìu duh khoai Yàng Jehôwa dê. Khai kal ală mpồng hìu duh khoai Yàng Jehôwa dê mơ bơtào să tòm khai in ală cơnòng duh khoai tòm kòp mum ƀòn dờng Jerusalem dê.

²⁵Tòm ală ƀòn dờng Juda dê, khai bơtào ală tiah jơnhoa nàng ơn phan ơn chu pơrguc ală yàng ndai in mơ bơrcek bơta gơjrañ Jehôwa Yàng Tom Trồ ală ồng pàng khai dê.

²⁶Ală broă ndai tòm rài at bồ khai dê mơ jơh ală gùng dà khai dê, bơh sơnròp tus di lồi dut neh geh cih tòm ală Sră ală cau Bơtau Juda mơ Israel dê.

²⁷Aca bic lơhă bal mơ ală ồng pàng khai dê mơ geh tơp tòm ƀòn dờng Jerusalem, mơya cau ò cèng khai ơn tòm ală bơtô ƀồc ală cau bơtau Israel dê. Mơ Ejekia kòn klau khai gơs bơtau pơrdòn sơbàn khai.