Read koho II Yal Yau 29 Bible Online

II Yal Yau 29 - koho bible

II Yal Yau 29

¹Ejekia sơntòm at bồ tòm tŭ khai neh bàr jơt pram nam, mơ khai at bồ bàr jơt sin nam tòm Jerusalem. Mè khai sơnđan la Abija, kòn ùr Sacari.

²Khai lơh bơta di niam di đap mat Yàng Jehôwa, kung be Dabit ồng pàng khai neh lơh.

³Tòm kơnhai sơnròp mơ nam sơnròp rài at bồ khai dê, khai pò ală mpồng hìu duh khoai Yàng Jehôwa dê mơ rcang bơt wơl.

⁴Khai cèng brê wơl ală cau gơnoar ơn phan duh khoai mơ ală cau Lebi, pơjum tơrgòm bol khai tòm hìu jơnum dờng đah mattơngai lik

⁵mơ đơs mơ bol khai lah: “Ơ ală cau Lebi, iat tĕ añ! Lơh sàng goh tĕ să tòm bol mê mơ lơh sàng goh hìu duh khoai Yàng Jehôwa dê la Yàng Tom Trồ ală ồng pàng bol mê dê. Tă tơlik tĕ jơh ală phan ƀơ̆ ƀơl bơh di tiah sàng goh.

⁶Bơh ồng pàng bol he dê neh ò dòn song mơ neh lơh bơta iơh di đap mat Jehôwa Yàng Tom Trồ bol he dê. Bol khai neh sang lòi Kơnràñ, mơ neh wèt muh mat bol khai dê ngài bơh di tiah ơm sùm sùm Yàng Jehôwa dê mơ wèt ngkòi bol khai dê.

⁷Bol khai kung neh kal ală mpồng ƀlàng jơng gùng mơ tơnchơt ală ồs đèng. Bol khai ò chu kơlhô hala ơn phan duh khoai chu pơrguc tòm hìu duh khoai Yàng Tom Trồ Israel dê.

⁸Gen tàng, bơta gơjrañ Yàng Jehôwa dê neh tus hơđang Juda mơ Jerusalem; Kơnràñ neh lơh bol khai in gơlik gơs dô nơm phan rngòt rngơt cù kìr, ai lơh krơi mơ dơñŏ tơnhial be bol mê rgơi gŏ mơ mat tòm bol mê dê.

⁹Ồng pàng bol he dê gơpừ chơt bơh đào, mơ ală kòn klau, ală kòn ùr mơ ală bau ùr bol he dê neh kong kup cèng gơs dĭ bơh bơta do.

¹⁰Tŭ do, hơ̆ la bơh tòm nùs añ jê, kòñ bơtào dô bơta ho bal mơ Jehôwa Yàng Tom Trồ Israel dê, nàng bơta gơjrañ dờng Kơnràñ dê pleh ngài bơh bol he.

¹¹Ơ ală kòn klau añ jê, tŭ do bañ lơh ală alai, bơh Yàng Jehôwa neh sac rwah bol mê nàng ntào di đap Kơnràñ mơ duh broă Kơnràñ, mơ gơlik gơs cau duh broă mơ chu kơlhô Kơnràñ in.”

¹²Gen ală cau Lebi ñă ntào: Mahat kòn klau Amasai mơ Jôel kòn klau Ajaria bơh ală kòn klau Kôhat dê. Bơh ală kòn klau Merari dê gơs Kis kòn klau Apdi mơ Ajaria kòn klau Jehalelel; bơh mpồl Gersôn dê gơs Jôa kòn klau Jimma mơ Eden kòn klau Jôa dê;

¹³mơ bơh ală kòn klau Elisaphan dê gơs Simri mơ Jeuel; mơ bơh ală kòn klau Asap gơs Sacari mơ Mathania;

¹⁴mơ bơh di kòn klau Heman gơs Jehuel mơ Simei; bơh di kòn klau Jeduthun gen gơs Semaya mơ Ujiel.

¹⁵Bol khai neh pơjum tơrgòm bal ală oh mi bol khai dê mơ lơh să tòm bol khai sàng goh, bol khai mut nàng wàs goh hìu duh khoai Yàng Jehôwa dê be bơtau neh sồr bơh jơnau Yàng Jehôwa dê.

¹⁶Ală cau gơnoar ơn phan duh khoai mut tòm dơlam hìu duh khoai Yàng Jehôwa dê nàng wàs goh tiah hơ̆. Bol khai tă tơlik jơh ală phan ò goh neh bàn tòm hìu duh khoai Yàng Jehôwa dê ơn tòm ƀlàng hìu duh khoai Yàng Jehôwa dê. Gen ală cau Lebi tă cèng ală phan hơ̆ tus hơ Thòng Kidrôn.

¹⁷Bol khai sơntòm lơh sàng goh tòm ngai dùl kơnhai dùl, mơ tòm ngai phàm kơnhai hơ̆ bol khai wàs tus di mpồng ƀlàng jơng gùng hìu duh khoai Yàng Jehôwa dê. Bol khai wàs goh hìu duh khoai Yàng Jehôwa dê tòm phàm ngai tai mơ tòm ngai dơ̆ jơt prau kơnhai dùl bol khai neh lơh sir.

¹⁸Gen bol khai lòt tus hơ bơtau Ejekia mơ yal lah: “Bol hi neh wàs goh jơh hìu duh khoai Yàng Jehôwa dê, cơnòng chu kơlhô mơ jơh ală phan ngui bal mơ gơ, mơ cơnòng ơn pràng piang lă mơ ală phan ngui bal mơ gơ.

¹⁹Jơh ală phan ngui mơ bơtau Aca neh ò bài sền gàr tòm tŭ khai at bồ mơ khai ò dòn song, bol hi neh lơh goh sir rau, tŭ do sền tĕ ală phan hơ̆ ơm di đap cơnòng duh khoai Yàng Jehôwa dê.”

²⁰Gen bơtau Ejekia guh gòñ bơh drim, pơjum ală cau kwang at bồ ƀòn dờng mơ guh hơ hìu duh khoai Yàng Jehôwa dê.

²¹Bol khai cèng poh nơm kơnrồ dam, poh nơm be dam, poh nơm belàt kòn dam mơ poh nơm be dam lơh gơs phan ơn tơwài glài lơgar in, hìu duh khoai in mơ Juda in. Cau bơtau ai jơnau gơnoar sồr ală cau gơnoar ơn phan duh khoai la ală kòn sau Arôn dê, ơn ală phan ơn hơ̆ hơđang cơnòng duh khoai Yàng Jehôwa dê.

²²Behơ̆ bol khai tơnchơt ală kơnrồ dam, mơ ală cau gơnoar ơn phan duh khoai ai mhàm mơ rsìh gơ hơđang cơnòng duh khoai; lồc behơ̆ bol khai hàl ală be dam mơ rsìh mhàm bol gơ hơđang cơnòng duh khoai.

²³Ală be nàng ơn phan ơn tơwài glài geh cèng tus di đap cau bơtau mơ mpồl jơnum, mơ bol khai ơn tê bol khai dê hơđang bol gơ.

²⁴Gen ală cau gơnoar ơn phan duh khoai hàl ală be mơ ơn mhàm bol gơ dê hơđang cơnòng duh khoai lơh gơs phan ơn tơwài glài nàng tơwài glài jơh Israel, tài bơh cau bơtau neh ai gơnoar sồr ơn phan ơn chu pơrguc mơ phan ơn tơwài glài jơh Israel in.

²⁵Khai rơndap ală cau Lebi tòm hìu duh khoai Yàng Jehôwa dê bal mơ ală cing dềt, kơñi pĕ mơ kơñi rơs jat be gơnoar sồr Dabit mơ Gat cau gơnoar git lài bơtau dê mơ Nathan cau gơnoar hwơr; hơ̆ la bơta Yàng Jehôwa neh sồr kơnòm di ală cau gơnoar hwơr Kơnràñ dê.

²⁶Behơ̆ ală cau Lebi ntào bal mơ ală kơñi Dabit dê mơ ală cau gơnoar ơn phan duh khoai bal mơ ală kơlwòk bol khai dê.

²⁷Ejekia ai gơnoar sồr ơn phan duh khoai chu pơrguc hơđang cơnòng duh khoai. Tòm tŭ rơp sơntòm ơn phan duh khoai gen bơta đơs chò jòng ro Yàng Jehôwa kung sơntòm bal mơ ntas ală kơlwòk mơ ală bơta kơñi Dabit dê la bơtau Israel.

²⁸Jơh dô mpồl jơnum tơmbic să duh khoai tòm tŭ ală cau đơs chò kư̆ đơs mơ ală cau uh kơlwòk kư̆ uh. Jơh ală bơta hơ̆ gơpơnjat jơl tus di neh sir ơn phan ơn chu pơrguc.

²⁹Tòm tŭ neh sir ơn ală phan ơn rau, gen cau bơtau mơ jơh ală cau bal mơ khai cùn gơltang mơ duh khoai.

³⁰Bơtau Ejekia mơ ală cau kwang duh broă khai dê ai gơnoar sồr ală cau Lebi ngui ală jơnau đơs crih Dabit mơ Asap cau gơnoar git lài khai dê mơ jòng ro Yàng Jehôwa. Behơ̆ bol khai đơs chò jòng ro tòm bơta hòn chò mơ bol khai kun bồ mơ duh khoai.

³¹Gen Ejekia đơs lah: “Tŭ do bol mê neh ơn să tòm bol mê dê Yàng Jehôwa in. Tus tĕ mơ cèng ală phan ơn duh khoai mơ ală phan ơn ưnngài tòm hìu duh khoai Yàng Jehôwa dê.” Behơ̆ mpồl jơnum cèng ală phan ơn duh khoai mơ ală phan ơn ưnngài, mơ jơh ală cau lơi bơh nùs kòñ cèng ală phan ơn chu pơrguc.

³²Ntum khà ală phan ơn chu pơrguc mơ mpồl jơnum neh cèng tus la poh nơm kơnrồ dam, dô rhiang nơm be dam mơ bàr rhiang nơm belàt kòn dam; jơh ală phan do lơh gơs phan ơn chu pơrguc Yàng Jehôwa in.

³³Ală phan ơn is sàng goh lơh gơs phan ơn duh khoai la prau rhiang nơm kơnrồ dam mơ pe rbô nơm belàt mơ be.

³⁴Bulah behơ̆, ntum khà ală cau gơnoar ơn phan duh khoai la dô êt, ò tơl nàng klò gơltau jơh ală phan ơn chu pơrguc; behơ̆ cau gơp bơtiàn bol khai dê la cau Lebi dong kòl bol khai jơl tus di tŭ lơh sir broă hơ̆, mơ jơl tus di tŭ ală cau gơnoar ơn phan duh khoai ndai geh ơn is sàng goh, bơh tòm bơta ơn is să tòm bol khai sàng goh, gen ală cau Lebi jơh nùs lơh sàng goh să he rlau mơ ală cau gơnoar ơn phan duh khoai.

³⁵Rlau mơ ală khà oă ngan phan ơn chu pơrguc, gen gơs dơngi bơh ală phan ơn bơta ring lơngai, mơ ală phan ơn ñô phan ơn chu pơrguc in. Behơ̆ bơta duh broă tòm hìu duh khoai Yàng Jehôwa dê neh geh bơt bơtào wơl.

³⁶Ejekia mơ jơh làng bol hòn chò bơh ală bơta mơ Yàng Jehôwa neh lơh làng bol Kơnràñ in, bơh ală bơta neh gơlik gơs dô bă mhar.