Read koho II Yal Yau 30 Bible Online

II Yal Yau 30 - koho bible

II Yal Yau 30

¹Ejekia pơyoa jơnau tus hơ jơh Israel mơ Juda, mơ kung cih ală sră pơyoa tus hơ Epraim mơ Manase, jà bol khai lòt tus hơ hìu duh khoai Yàng Jehôwa dê tòm Jerusalem, nàng prap gàr bơta pơjum sa ngai wèr Lòt Gan Jehôwa Yàng Tom Trồ Israel in.

²Bơh bơtau mơ ală cau kwang duh broă khai dê mơ jơh dô mpồl jơnum tòm Jerusalem neh bơyai lơh nền pơjum sa ngai wèr Lòt gan tòm kơnhai bàr.

³(Bơh bol khai neh ò prap gàr pơjum sa ngai wèr hơ̆ jat tŭ tơngai òs neh lơh nền gơ in, tài bơh ală cau gơnoar ơn phan duh khoai neh ò lơh să tòm bol khai in sàng goh tơl di pal khà gơ dê mơ làng bol ò gŏ pơjum bal tòm Jerusalem).

⁴Bơta bơyai rơndap sền gơlơh di nùs cau bơtau bal mơ jơh dô mpồl jơnum làng bol.

⁵Behơ̆, bol khai lơh nền pơyoa dô jơnau yal tơnggit làm jơh Israel, bơh Beerseba tus hơ Dan, mơ làng bol pal lòt tus nàng prap gàr bơta pơjum sa ngai wèr Lòt gan Jehôwa Yàng Tom Trồ Israel in tòm Jerusalem; bơh bol khai neh ò prap gàr bơta pơjum sa dô bă gal ngan be khà neh ai gơnoar sồr.

⁶Behơ̆ ală cau cèng sră neh lòt làm jơh Israel mơ Juda nàng cèng sră pơyoa bơh bơtau mơ ală cau kwang duh broă bơtau dê neh sồr, gơs jơnau cih be do: “Ơ làng bol Israel, rê wơl tĕ hơ Yàng Jehôwa la Yàng Tom Trồ Abraham, Isak mơ Israel dê, tồ Kơnràñ rơp rê wơl hơ ală cau gam wơl tòm bol mê la ală cau neh klàs bơh di tê ală cau bơtau Asiri dê.

⁷Bañ lơh be ală ồng pàng mơ ală oh mi bol mê dê la ală cau ò dòn song mơ Jehôwa Yàng Tom Trồ ală ồng pàng bol khai dê, tian gơs Kơnràñ neh lơh bol khai in gơlik gơs dô bă tiah tơrlah tơrling be bol mê neh gŏ.

⁸Bañ lơh kơldang bồ kơldang ngko be ală ồng pàng bol mê dê, wèt tĕ să tòm bol mê hơ Yàng Jehôwa. Lòt tus tĕ hơ Tiah Sàng Goh mơ Kơnràñ neh ơn is sàng goh gam sùm sùm. Duh tĕ broă Jehôwa Yàng Tom Trồ bol mê dê, tồ bơta gơjrañ dờng Kơnràñ dê rơp pleh ngài bơh bol mê.

⁹Dilah bol mê rê wơl hơ Yàng Jehôwa gen ală oh mi mơ ală kòn sau bol mê dê rơp geh bơta nđàc di đap ală cau neh kup bol khai, mơ bol khai rơp rê wơl hơ lơgar do, bơh Jehôwa Yàng Tom Trồ bol mê dê la Bơtau gơs nùs kòñ nđàc mơ nđàc sơngit, mơ Kơnràñ rơp ò pleh mat bơh di bol mê dilah bol mê rê wơl hơ Kơnràñ.”

¹⁰Ală cau cèng sră pơyoa lòt bơh ƀòn dờng do tus hơ ƀòn dờng ne tòm Epraim mơ Manase, lòt ngài jơl tus di Jebulun, mơya làng bol dơñŏ mơ lah sơrpah mơ dơñŏ tơnhial di bol khai.

¹¹Mìng dô êt lơm bơh mpồl Aser, Manase mơ Jebulun pơndêt să bol khai dê mơ lòt tus hơ Jerusalem.

¹²Tòm Juda, tê Yàng Jehôwa kung ơm hơđang làng bol mơ ai bol khai in bơta lơh gơs dô bă bal nàng lơh gơlik gơs jat be cau bơtau mơ ală cau kwang bơtau dê neh sồr jat be jơnau Yàng Jehôwa dê.

¹³Dô mpồl làng bol gal ngan neh pơjum bal tòm Jerusalem nàng pơjum sa ngai wèr Piang Lă Ò Gơs Kañ tòm kơnhai bàr.

¹⁴Bol khai tă ală cơnòng duh khoai tòm Jerusalem mơ ală cơnòng chu kơlhô mơ sang ală cơnòng hơ̆ tòm Thòng Kidrôn.

¹⁵Bol khai hàl belàt kòn ơn tòm ngai wèr Lòt Gan tòm ngai dơ̆ jơt poan kơnhai dơ̆ bàr. Ală cau gơnoar ơn phan duh khoai mơ ală cau Lebi ƀàssìl mơ bol khai ơn să he sàng goh mơ cèng ală phan ơn chu pơrguc tus tòm hìu duh khoai Yàng Jehôwa dê.

¹⁶Bol khai lơh jat broă tòm be òs bol khai dê jat be neh cih tòm Sră Bơta Boh Lam Môise cau Yàng Tom Trồ dê. Ală cau gơnoar ơn phan duh khoai rsìh mhàm mơ cau Lebi neh cèng tus bol khai in.

¹⁷Tài bơh gơs oă cau tòm mpồl làng bol ò gŏ lơh sàng goh să tòm bol khai dê, gen ală cau Lebi pal hàl ală belàt kòn ơn tòm ngai wèr Lòt Gan ala jơh ală cau ò sàng goh in, nàng lơh sàng goh bol khai Yàng Jehôwa in.

¹⁸Bulah gơs oă cau tòm làng bol neh tus bơh di ală mpồl Epraim, Manase, Issaka mơ Jebulun ò lơh sàng goh să tòm bol khai dê, bulah behơ̆ bol khai neh sa phan sa ngai wèr Lòt Gan, ò prap gàr tòm toh jat be jơnau gơnoar sồr. Mơya Ejekia neh hòi dan bol khai in mơ đơs lah: “Dan Yàng Jehôwa la Bơtau lơbơn niam rơp toh glài jơh tơl nă cau

¹⁹neh wèt nùs jòi jat Yàng Tom Trồ, la Jehôwa Yàng Tom Trồ ală ồng pàng bol khai dê, bulah khai ò geh sàng goh jat be bơta boh lam bơh bơta lơh sàng goh dê.”

²⁰Yàng Jehôwa neh dòp jơnau Ejekia mơ neh sơmbòi làng bol in.

²¹Ală cau Israel gơs mat tòm Jerusalem neh prap gàr bơta pơjum sa ngai wèr Piang Lă Ò Gơs Kañ tòm poh ngai hòn chò dờng ngan, tòm tŭ ală cau Lebi mơ ală cau gơnoar ơn phan duh khoai đơs chò Yàng Jehôwa in kòp ngai, dô bă bal mơ ntas ală kơñi jòng ro Yàng Jehôwa.

²²Ejekia đơs jơnau chồl nùs jơh ală cau Lebi neh yal tơlik bơta git jak niam bơh bơta duh broă Yàng Jehôwa. Behơ̆ làng bol sa phan sa bơta pơjum sa ngai wèr dê tòm poh ngai, ơn phan duh khoai bơta ring lơngai mơ bơta ưnngài Jehôwa Yàng Tom Trồ ală ồng pàng bol khai dê.

²³Gen jơh dô mpồl jơnum dô nùs bal prap gàr bơta pơjum sa ngai wèr tòm poh ngai ndai tai; behơ̆ tòm poh ngai tai bol khai pơjum sa dô bă hòn chò ngan.

²⁴Ejekia bơtau Juda ai mpồl jơnum in dô rbô nơm kơnrồ dam mơ poh rbô nơm belàt ơn phan pơdơng, mơ ală cau kwang cau bơtau dê ai mpồl jơnum in dô rbô kơnrồ dam mơ jơt rbô belàt. Dô ntum khà dờng ală cau gơnoar ơn phan duh khoai ơn is sàng goh să tòm bol khai dê.

²⁵Jơh dô mpồl jơnum Juda dê, ală cau gơnoar ơn phan duh khoai mơ ală cau Lebi mơ jơh mpồl jơnum neh tus bơh Israel, bal mơ ală cau làng bơdìh neh tus bơh Israel mơ ală cau ơm tòm Juda hòn chò ngan.

²⁶Gơs bơta hòn chò dờng tòm Jerusalem, bơh di ngai Salômôn kòn klau Dabit bơtau Israel dê, òhềt gơs bơta lơi neh gơs be bơta hơ̆ tòm Jerusalem.

²⁷Gen ală cau gơnoar ơn phan duh khoai mơ ală cau Lebi ñă ntào ai lơngai làng bol in, mơ sap đơs bol khai dê geh kơno; jơnau hòi dan bol khai dê neh tus hơđang trồ la tiah ơm sàng goh Kơnràñ dê.