Read koho II Yal Yau 31 Bible Online

II Yal Yau 31 - koho bible

II Yal Yau 31

¹Tòm tŭ neh sir jơh ală bơta hơ̆, ală cau Israel neh ơm tềng hơ̆ lik lòt tus hơ ală ƀòn dờng Juda dê, pòng bơcah ală pơnai lŭ mơ koh tòmpừ ală jrong duh khoai Asera dê. Bol khai sòr tơrlah ală tiah jơnhoa mơ ală cơnòng duh khoai tòm lam jơh Juda, Benjamin, Epraim mơ Manase. Tian gơs bol khai neh tơnroh jơh hir, gen jơh ală cau Israel rê wơl hơ ală ƀòn dờng tòm bol khai dê, jơh ală rê hơ sre brê tòm bol khai dê.

²Ejekia bơtào ală mpồl ală cau gơnoar ơn phan duh khoai mơ ală cau Lebi tòm ală mpồl, kòp nă jat be broă tòm bol khai dê la cau gơnoar ơn phan duh khoai hala cau Lebi nàng ơn ală phan ơn chu pơrguc mơ ală phan ơn bơta ring lơngai, nàng duh broă di mpồng sàl Yàng Jehôwa dê mơ nàng ưnngài mơ jòng ro.

³Cau bơtau ai bơh phan mơna khai dê mơ ơn ală phan ơn chu pơrguc àng drim mơ mho, mơ ală phan ơn chu pơrguc tòm ală ngai Saƀat, ală ngai Kơnhai Dùl Lik, mơ ală ngai pơjum sa neh lơh nền be neh cih tòm bơta boh lam Yàng Jehôwa dê.

⁴Khai ai gơnoar sồr làng bol ơm tòm Jerusalem pal ơn pơnah gơrê bal mơ ală cau gơnoar ơn phan duh khoai mơ ală cau Lebi, tồ bol khai rgơi ơn is să tòm bol khai dê bơta boh lam Yàng Jehôwa in.

⁵Tòm tŭ jơnau gơnoar sồr neh geh yal tơlik làm jơh, gen cau Israel ơn oă ngan ală kòi bồ sơnam bol khai dê, tơrnòm pa, mơñà, dà lơwe, bal mơ jơh ală phan tơnggơs bơh di ală ƀlàng sre. Bol khai cèng tus oă ngan, phan ơn dô pơnah jơt mơ jơh ală phan ndai tai.

⁶Ală cau Israel mơ Juda ơm tòm ală ƀòn dờng Juda dê kung cèng tus phan ơn dô pơnah jơt bơh di ală phan sàng goh neh ơn Jehôwa Yàng Tom Trồ bol khai in, mơ bol khai dap ală phan hơ̆ gơs ală gơnru dờng.

⁷Tòm kơnhai dơ̆ pe bol khai sơntòm rơndap ală phan hơ̆ gơs ală gơnru mơ lơh sir gơtòm kơnhai poh.

⁸Tòm tŭ Ejekia tus bal mơ ală cau kwang duh broă khai dê mơ sền gŏ ală gơnru hơ̆, bol khai jòng ro Yàng mơ ai lơngai Israel in la làng bol Kơnràñ dê.

⁹Ejekia lùp ală cau gơnoar ơn phan duh khoai mơ ală cau Lebi bơh ală gơnru hơ̆;

¹⁰mơ Ajaria cau gơnoar lam bồ ơn phan duh khoai, bơh di hìu nhă Jadôk, ho wơl lah: “Bơh di tŭ làng bol rơp sơntòm ơn phan ơn bol khai dê hìu duh khoai Yàng Jehôwa in, bol hi gơs tơl phan nàng sa, mơ gam tơngkah nàng prap lòi, tài bơh Yàng Jehôwa neh ai lơngai làng bol Kơnràñ in, mơ jơh ală phan do la phan gam tơngkah wơl.”

¹¹Ejekia ai jơnau gơnoar sồr bơt ală đam jàr tòm hìu duh khoai Yàng Jehôwa dê, mơ bol khai neh rcang gơs behơ̆.

¹²Gen bol khai dòn song cèng tơmut ală phan ơn, ală phan pơnah jơt mơ ală phan ơn is sàng goh. Kônania la dô nă cau Lebi, gơs broă tòm sền gàr ală phan hơ̆, mơ Simei oh khai dê la cau gơnoar oh tòm broă hơ̆.

¹³Mơ Jehiel, Ajajia, Nahat, Asahel, Jerimôt, Jôjabat, Eliel, Ismakia, Mahat mơ Benayah la ală cau dong gàr hơđơm gơnoar Simei mơ oh khai dê, geh pồ bơtào Ejekia mơ Ajaria la cau kwang gơs broă tòm tòm hìu duh khoai Yàng Tom Trồ dê.

¹⁴Kôre kòn klau Imma cau Lebi, la cau kơp gàr Mpồng Dờng đah mattơngai lik, gơs broă tòm sền gàr ală phan jat nùs cau kòñ ơn Yàng Tom Trồ in, tòmpà ală phan neh ơn Yàng Jehôwa in bal mơ ală phan ơn is sàng goh rlau jơh.

¹⁵Eden, Miniamin, Jesua, Semaya, Amariah mơ Sekania dong kòl khai dô bă dòn song tòm ală ƀòn dờng ală cau gơnoar ơn phan duh khoai dê, tòmpà ală pơnah ală cau gơnoar ơn phan duh khoai in la oh mi bol khai dê, jat ală mpồl bol khai dê, cau kra mơ cau pơnu ndròm bal, kòp ală mpồl.

¹⁶Rlau mơ ală cau geh cih sơnđan tòm sră cih jat jơi bơtiàn, bol khai tòmpà ală cau klau bơh pe nam hala dờng rlau, la jơh ală cau geh mut tòm hìu duh khoai Yàng Jehôwa dê nàng lơh broă pal càng kòp ngai, jat broă tòm neh jào bol khai in mơ jat ală mpồl bol khai dê.

¹⁷Mơ bol khai tòmpà ală cau gơnoar ơn phan duh khoai in neh geh cih sơnđan mat jat hìu nhă bol khai dê tòm ală sră cih sơnđan jơi bơtiàn dê, mơ kung lơh behơ̆ mơ ală cau Lebi gơs bàr jơt nam hala dờng rlau, jat broă neh jào bol khai in mơ jat ală mpồl bol khai dê.

¹⁸Bol khai neh geh kòp tơmut bal jơh ală kòn dềt, ală bau ùr, ală kòn klau mơ ală kòn ùr tòm jơh dô mpồl jơnum làng bol neh geh cih sơnđan tòm ală sră cih sơnđan mat jơi bơtiàn do. Bơh bol khai dòn song tòm bơta ơn is sàng goh să tòm bol khai dê.

¹⁹Đah pơnah ală cau gơnoar ơn phan duh khoai la ală kòn sau Arôn neh ơm tòm ală ù tiah gơs ƀlàng sre gơrê bal mơ ală ƀòn dờng, la ală cau geh cih tềl sơnđan mat nàng tòmpà ală pơnah kòp nă cau klau in digùl bol khai, mơ jơh ală cau Lebi neh geh cih sơnđan mat tòm jơi bơtiàn dê.

²⁰Hơ̆ la bơta Ejekia neh lơh tòm làm jơh Juda, khai neh lơh bơta di niam mơ dòn song di đap Jehôwa Yàng Tom Trồ khai dê.

²¹Tòm jơh ală broă khai neh lơh, bơh bơta duh broă tòm hìu duh khoai Yàng Tom Trồ dê mơ tòm bơta lơh jat bơta boh lam mơ ală jơnau gơnoar sồr, khai jòi jat Yàng Tom Trồ khai dê mơ lơh broă jơh nùs. Mơ behơ̆ khai geh bơtoah bơtoài.