Read koho II Yal Yau 32 Bible Online

II Yal Yau 32 - koho bible

II Yal Yau 32

¹Tơnơ̆ mơ jơh ală bơta mơ Ejekia neh lơh dô bă dòn song, Sancerip bơtau Asiri neh lòt tus brồ lơh Juda mơ khai lơh sàl tòmdră mơ ală ƀòn dờng kơ̆ cê, kơlôi lah geh pha tòmpìt ai ală ƀòn dờng hơ̆ să tòm khai in.

²Tòm tŭ Ejekia gŏ Sancerip neh tus mơ lơh nền kòñ tòmlơh mơ Jerusalem,

³khai bơyai mơ ală cau kwang duh broă khai dê mơ ală cau at bồ mpồl ling jak tòmlơh khai dê, bơt wơl ală croh dà đah bơdìh ƀòn dờng, mơ bol hơ̆ dong kòl khai.

⁴Dô mpồl dờng oă làng bol neh pơjum bal, mơ bol khai bơt jơh ală croh dà tòm làm jơh lơgar. Bol khai đơs lah: “Ñchi bơh tài lòi ală cau bơtau Asiri tus mơ jòi bàn oă dà taih?”

⁵Gen khai rơndap broă lơh dô bă kràñ cê nàng bơt wơl jơh ală pơnah dơrñang ƀòn dờng neh tơrlah mơ bơt ală theng kơp gàr hơđang gơ. Khai bơt dô nơm dơrñang tai đah bơdìh dơrñang neh gơs hơ̆, mơ lơh kơ̆ rlau tai ală theng kơp gàr Ƀòn Dờng Dabit dê. Khai kung lơh gơs oă ngan phan tòmlơh mơ ală khèl.

⁶Khai pồ bơtào ală cau kwang ling hơđang làng bol, mơ hòi pơjum bol khai di đap khai tòm ƀlàng jơnum làng bol di mpồng ƀòn dờng mơ chồl nùs bol khai mơ ală jơnau do:

⁷“Gơs tĕ pràn kơldang mơ khin cha. Bañ rngòt hala gơplơ̆ nùs tài bơh cau bơtau Asiri mơ mpồl ling dờng khai dê, bơh gơs dô Bơtau ơm bal mơ bol he dờng rlau mơ cau ơm mơ khai.

⁸Ơm bal mơ khai mìng la dô nơm tơwòr tê poac să lơm, mơya bol he gơs Jehôwa Yàng Tom Trồ bol he dê ơm bal mơ bol he nàng dong kòl mơ tòmlơh bol he in.” Mơ làng bol geh nùs dòn kơnòm di ală jơnau Ejekia bơtau Juda neh đơs.

⁹Tơnơ̆ mơ hơ̆, tòm tŭ Sancerip bơtau Asiri mơ jơh ală mpồl ling khai dê ơm gơrwàng gùt dar Lakis, khai sồr ală cau kwang duh broă khai dê lòt tus hơ Jerusalem mơ đơs ală jơnau do mơ Ejekia bơtau Juda mơ jơh làng bol Juda ơm tềng hơ̆ lah:

¹⁰“Sancerip bơtau Asiri đơs be do: Bol mê dòn kơnòm di bơta lơi mơ kư̆ ơm tòm Jerusalem tòm tŭ kòl gơrwàng gùt dar taih?

¹¹Ò di la Ejekia neh tề lam bol mê lòt tìs, mơ jào bol mê tòm bơta chơt bơh bơta jơgloh rung mơ tơhìr, tòm tŭ khai đơs mơ bol mê lah: ‘Jehôwa Yàng Tom Trồ bol he dê rơp dong bol he bơh di tê bơtau Asiri’ hơ̆ sơl ơ?

¹²Ò di să tòm Ejekia do neh tă sang cơnòng duh khoai yàng do bơh ală tiah jơnhoa, mơ sồr Juda mơ Jerusalem lah: ‘Bol mê pal duh khoai di đap dô nơm cơnòng duh khoai mơ bol mê chu kơlhô hơđang gơ ơ?’

¹³Bol mê ò git bơta mơ añ mơ ală ồng pàng añ jê neh lơh di jơh ală làng bol tòm ală lơgar ndai ò ơ? Gơs tŭ lơi ală yàng ală làng bol hơ̆ dê rgơi dong tă lơgar bol khai dê klàs bơh di tê añ sơl ơ?

¹⁴Yàng lơi tòm jơh ală yàng ală làng bol mơ ală ồng pàng añ jê neh tơnroh neh rgơi dong tă làng bol khai dê klàs bơh di añ taih? Behơ̆ gen mbe Yàng bol mê dê rgơi dong tă bol mê klàs bơh di tê añ taih?

¹⁵Gen tàng tŭ do, bañ lòi Ejekia đơs blac mơ pơrlồm bol mê behơ̆. Bañ dòn jơnau khai, bơh ò gơs yàng lơi hala làng bol lơi, lơgar lơi neh rgơi dong tă làng bol khai dê klàs bơh di tê añ hala klàs bơh di tê ală ồng pàng añ jê. Gen tơ ài lah Yàng Tom Trồ bol mê dê mbe rgơi dong tă bol mê klàs bơh di tê añ!”

¹⁶Ală cau kwang duh broă Sancerip gam đơs oă rlau tai tòmdră mơ Jehôwa Yàng Tom Trồ mơ tòmdră mơ Ejekia cau duh broă Kơnràñ dê.

¹⁷Cau bơtau kung cih ală sră pơyoa srat sơntơm Jehôwa Yàng Tom Trồ Israel dê mơ đơs ală jơnau do tòmdră mơ Kơnràñ: “Kung be ală yàng ală làng bol ală lơgar ndai dê ò dong tă làng bol bol khai dê klàs bơh di tê añ, gen kung behơ̆ sơl Yàng Tom Trồ Ejekia dê rơp ò dong tă làng bol khai dê klàs bơh di tê añ.”

¹⁸Bol khai driau dờng tòm jơnau cau Juda mơ làng bol Jerusalem ơm hơđang dơrñang ƀòn nàng pơhìn bol khai mơ lơh bol khai in rngòt rngơt tồ tòmpìt ai ƀòn dờng.

¹⁹Bol khai đơs bơh Yàng Tom Trồ Jerusalem dê kung be bol khai neh đơs bơh ală yàng ală làng bol ndai tòm plai ù la broă lơh tê kòn mơnus dê.

²⁰Bơtau Ejekia mơ cau gơnoar hwơr Esai kòn klau Amôs ai jơnau dờng hòi dan guh tus hơđang trồ bơh bơta do.

²¹Mơ Yàng Jehôwa sồr dô nă cau gơnrơh tơnroh jơh ală cau ling bal mơ ală cau at bồ mơ cau kwang duh broă bơtau tòm tiah sàl bơtau Asiri dê. Behơ̆ khai ruc wơl mơ rê hơ lơgar khai dê tòm bơta ƀàssìl ƀàsso. Mơ tòm tŭ khai mut tòm hìu duh khoai yàng khai dê, dô nă tòm ală kòn klau khai dê ai đào sreh tơnchơt khai.

²²Behơ̆ Yàng Jehôwa dong tă Ejekia mơ làng bol Jerusalem klàs bơh di tê Sancerip bơtau Asiri mơ klàs bơh di tê jơh ală cau ndai. Kơnràñ ai khai in bơta ring lơngai tòm jơh ală đah.

²³Oă cau cèng ală phan ơn tus hơ Jerusalem nàng ơn Yàng Jehôwa in mơ oă phan màng ai gòi Ejekia bơtau Juda in. Behơ̆ bơtau geh yò tơngguh di đap jơh ală làng bol bơh di tŭ hơ̆.

²⁴Tòm ală ngai hơ̆, Ejekia kòl kòp jê kơnjơ̆ mơ mòr chơt. Khai hòi dan mơ Yàng Jehôwa, Kơnràñ ho wơl khai in mơ ai khai in dô nơm tềl.

²⁵Mơya Ejekia ò lơh di pal jat be bơta lơbơn niam mơ Yàng Tom Trồ neh lơh gơwèt mơ khai, gen tàng bơta gơjrañ dờng Yàng Jehôwa dê tus hơđang khai mơ hơđang Juda mơ Jerusalem.

²⁶Gen Ejekia tơnliah să bơh bơta pơnhừ să tòm nùs khai dê, làng bol Jerusalem kung lơh behơ̆, gen tàng bơta gơjrañ dờng Yàng Jehôwa dê neh ò tus hơđang bol khai tòm rài Ejekia dê.

²⁷Ejekia gơlik pas sơm mơ geh jòng ro ngan, mơ khai bơt ală đam jàr nàng prap priă màh mơ ală lŭ màng, ală sơnơm ƀô bơlhu, ală khèl mơ tơl ală phan kas màng.

²⁸Khai kung bơt ală đam nàng prap kòi mbo, tơrnòm mơ mơñà; mơ khai bơt ală wàng ală jơi phan poan jơng in, mơ mpồl belàt in sơl.

²⁹Khai kung bơt ală ƀòn dờng să tòm khai in mơ geh oă ngan mpồl belàt mơ kơnrồ, bơh Yàng Tom Trồ neh ai khai in bơta pas sơm oă ngan.

³⁰Hơ̆ la Ejekia neh bơt dà đah đang croh Gihôn mơ wàs gùng dà hòr tus đah mattơngai mut Ƀòn Dờng Dabit dê. Khai geh bơtoah bơtoài tòm jơh ală broă khai lơh.

³¹Kung behơ̆ bơh bơta gơs mpồl cau kong sồr bơh ală cau at bồ Babilôn dê, tus nàng lùp khai bơh tềl krơi neh gơlik gơs tòm lơgar, Yàng Tom Trồ sang lòi khai nàng lòng khai mơ nàng git jơh ală bơta tòm nùs khai dê.

³²Ală broă ndai tòm rài at bồ Ejekia dê mơ ală bơta di niam khai neh lơh gen neh geh cih tòm bơta gơtơnggŏ cau gơnoar hwơr Esai kòn klau Amôs dê tòm sră ală cau bơtau Juda mơ Israel dê.

³³Ejekia bic lơhă bal mơ ală ồng pàng khai dê mơ geh tơp hơđang dòr la tiah bơtô ƀồc ală kòn sau Dabit dê. Jơh Juda mơ làng bol Jerusalem jòng ro khai tòm tŭ khai chơt. Mơ Manase kòn klau khai gơs bơtau pơrdòn sơbàn khai dê.