Read koho II Yal Yau 33 Bible Online

II Yal Yau 33 - koho bible

II Yal Yau 33

¹Manase tơl jơt bàr nam tòm tŭ khai gơs bơtau at bồ mơ khai at bồ pram jơt pram nam tòm Jerusalem.

²Khai lơh bơta iơh bơsak di đap mat Yàng Jehôwa, lơh jat ală broă cù kìr ală làng bol mơ Yàng Jehôwa neh bơtrơh tơlik di đap cau Israel.

³Bơh khai bơt wơl ală tiah jơnhoa mơ bèp khai la Ejekia neh sòr tơrlah; khai kung bơt bơtào ală cơnòng duh khoai Baal in mơ bơtào ală jrong duh khoai Asera in, duh khoai jơh ală sơmañ hơđang trồ, mơ duh khoai bol gơ.

⁴Khai bơt bơtào ală cơnòng duh khoai tòm hìu duh khoai Yàng Jehôwa dê la tiah mơ Yàng Jehôwa neh đơs lah: “Sơnđan Añ pal ơm tòm Jerusalem sùm sùm.”

⁵Tòm jơh bàr nơm ƀlàng jơng hìu duh khoai Yàng Jehôwa dê, khai bơt ală cơnòng duh khoai jơh ală sơmañ in.

⁶Khai ơn ală kòn klau khai dê lơh gơs phan ơn duh khoai tòm ồs tòm Thòng Ben Hinôm, juh proh, sền dà, mơ hòi lùp ală cau gru cau bơjơu. Khai lơh oă bơta iơh bơsak di đap mat Yàng Jehôwa, bơrcek Kơnràñ gơjrañ.

⁷Khai ai ală rùp pac sềr khai neh lơh mơ ơn tòm hìu duh khoai Yàng Tom Trồ dê la hìu mơ Yàng Tom Trồ neh đơs mơ Dabit bal mơ kòn klau khai dê la Salômôn lah: “Tòm hìu duh khoai do mơ tòm Jerusalem mơ Añ neh sac rwah bơh digùl jơh ală jơi bơtiàn Israel, Añ rơp ơn Sơnđan Añ gam sùm sùm.

⁸Añ rơp ò tai lơh jơng cau Israel dê lik lòt bơh di ù tiah mơ Añ neh ai ală ồng pàng bol mê in, dilah bol khai kơrhia lơh jat jơh ală bơta mơ Añ neh sồr bol khai bơh ală bơta boh lam, ală jơnau lơh nền mơ ală bơta sồr lam neh kơnòm di Môise ai bol mê in.”

⁹Mơya Manase neh lam Juda mơ làng bol Jerusalem lòt tìs nrah, tian gơs bol khai neh lơh oă bơta iơh bơsak rlau mơ ală làng bol mơ Yàng Jehôwa neh tơnroh di đap ală cau Israel.

¹⁰Yàng Jehôwa neh đơs mơ Manase mơ làng bol khai dê, mơya bol khai ò ơn tồr iat.

¹¹Behơ̆ Yàng Jehôwa neh cèng tus ală cau at bồ mpồl ling bơtau Asiri dê, bol khai kup jàm Manase, ơn dô nơm gai kwĕ di muh khai, kơt khai mơ che sreng kòng mơ cèng khai tus hơ Babilôn.

¹²Tòm bơta bòl glar kalke khai dê, khai jòi jat bơta nđàc sơngit Jehôwa Yàng Tom Trồ khai dê mơ jơh nùs tơnliah să khai di đap Yàng Tom Trồ ală ồng pàng khai dê.

¹³Mơ tòm tŭ khai hòi dan mơ Kơnràñ, Yàng Jehôwa gơs nùs rngoh rngac nđàc sơngit di khai mơ iat jơnau khai rac dan; behơ̆ Kơnràñ cèng khai rê wơl hơ Jerusalem mơ hơ lơgar khai at bồ. Gen Manase đal git Yàng Jehôwa la Yàng Tom Trồ.

¹⁴Tơnơ̆ mơ hơ̆ khai bơt wơl dơrñang đah bơdìh dơrñang Ƀòn Dờng Dabit dê, đah mattơngai mut croh dà Gihôn tòm thòng, tus di mpồng dờng sơnđan la Mpồng Ka mơ gùt dar mơnơm dềt Ôphel; khai kung bơt jòng jơnhoa rlau tai. Khai ơn ală cau at bồ mpồl ling tòm jơh ală ƀòn dờng kơ̆ cê tòm Juda.

¹⁵Khai tă sang ală yàng làng bol bơdìh dê mơ tă tơlik ală rùp duh khoai bơh di hìu duh khoai Yàng Jehôwa dê, bal mơ jơh ală cơnòng duh khoai mơ khai neh bơt hơđang mơnơm hìu duh khoai Yàng Jehôwa dê tòm Jerusalem; mơ khai sang bol gơ hơ bơdìh ƀòn dờng dê.

¹⁶Lồc behơ̆ khai rcang niam wơl cơnòng duh khoai Yàng Jehôwa dê mơ ơn ală phan ơn ring lơngai mơ ală phan ơn ưnngài hơđang cơnòng hơ̆, mơ sồr cau Juda duh broă Jehôwa la Yàng Tom Trồ Israel dê.

¹⁷Bulah behơ̆, làng bol gam pơnjat ơn phan duh khoai hơđang ală tiah jơnhoa, mơya mìng ơn Yàng Jehôwa Yàng Tom Trồ bol khai in lơm.

¹⁸Ală broă ndai tòm rài at bồ Manase dê, bal mơ jơnau khai hòi dan mơ Yàng Tom Trồ khai dê mơ ală jơnau ală cau gơnoar git lài neh ai sơnđan Jehôwa Yàng Tom Trồ Israel dê mơ đơs mơ khai, ală bơta hơ̆ neh cih tòm ală sră yal broă kòp nam ală cau bơtau Israel dê.

¹⁹Jơnau hòi dan khai dê mơ mbe Yàng Tom Trồ neh dòp jơnau khai rac dan, kung be jơh ală bơta tồi glài ò dòn song khai dê, mơ ală tiah jơnhoa duh khoai mơ khai neh bơt mơ bơtào ală jrong duh khoai mơ ală rùp ràk Asera lài mơ tŭ khai tơnliah să tòm khai dê, jơh ală bơta hơ̆ neh geh cih tòm sră yal broă ală cau gơnoar git lài dê.

²⁰Manase bic lơhă bal mơ ală ồng pàng khai dê mơ geh tơp tòm gơlang khai dê. Mơ Ammôn kòn klau khai dê gơs bơtau at bồ pơrdòn sơbàn khai dê.

²¹Ammôn tơl bàr jơt bàr nam tòm tŭ khai sơntòm at bồ, khai at bồ tòm Jerusalem bàr nam.

²²Khai lơh bơta iơh bơsak di đap mat Yàng Jehôwa be Manase bèp khai neh lơh. Ammôn duh khoai mơ ơn ală phan duh khoai ală rùp ràk in mơ Manase neh lơh gơs, mơ duh broă bol gơ.

²³Mơya khai ò tơnliah să khai di đap Yàng Jehôwa kung be bèp khai neh lơh; mơya tòm bơta do Ammôn sơlo tìs glài bơtơl tai.

²⁴Ală cau duh broă Ammôn dê bơyai rơndap òm tòmdră mơ khai mơ tơnchơt khai tòm gơlang khai dê.

²⁵Mơya làng bol tòm lơgar tơnchơt jơh ală cau neh bơyai òm tòmdră mơ bơtau Ammôn, mơ bol khai pồ bơtào Jôsia kòn klau khai dê gơs bơtau pơrdòn khai.