Read koho II Yal Yau 34 Bible Online

II Yal Yau 34 - koho bible

II Yal Yau 34

¹Jôsia neh tơl phàm nam tòm tŭ khai sơntòm at bồ, mơ khai at bồ pe jơt dùl nam tòm Jerusalem.

²Khai lơh bơta di niam di đap mat Yàng Jehôwa mơ lòt jat ală gùng dà ồng pàng khai dê la Dabit, ò pleh đah ma hala đah kiau.

³Tòm nam dơ̆ phàm rài at bồ khai dê, tòm tŭ khai gam pơnu, khai sơntòm jòi jat Yàng Tom Trồ ồng pàng khai dê la Dabit. Tòm nam dơ̆ jơt bàr khai sơntòm lơh sàng goh Juda mơ Jerusalem bơh di ală tiah jơnhoa duh khoai, ală jrong duh khoai Asera, ală rùp ràk pac sềr mơ ală rùp tŏ duh khoai.

⁴Di đap mat bơtau bol khai sòr tơrlah ală cơnòng duh khoai ală Baal dê; khai koh rpot rpet cơnòng chu kơlhô ơm hơđang bol gơ, mơ jan bơcah ală jrong duh khoai Asera, ală rùp ràk mơ ală rùp duh khoai. Khai jan bơcah jơh ală phan hơ̆ mơ rsìh hơđang ală bơtô ƀồc ală cau neh ơn phan duh khoai bol gơ.

⁵Khai chu ală ntìng ală cau gơnoar ơn phan duh khoai hơđang ală cơnòng duh khoai bol khai dê; behơ̆ khai lơh Juda mơ Jerusalem in gơs sàng goh.

⁶Tòm ală ƀòn dờng Manase, Epraim mơ Simeôn, tus di Neptali, mơ tòm ală gơnru tơrlah tơrling gùt dar bol gơ,

⁷Khai sòr tơrlah ală cơnòng duh khoai mơ ală jrong duh khoai Asera dê mơ jan bơcah ală rùp ràk lề lac gơlik be kơmbuh, mơ koh rpot rpet jơh ală cơnòng chu kơlhô tòm làm jơh Israel. Lồc behơ̆ khai rê wơl hơ Jerusalem.

⁸Tòm nam dơ̆ jơt phàm rài at bồ Jôsia dê, tòm tŭ khai lơh sàng goh lơgar mơ hìu duh khoai, khai sồr Saphan kòn klau Ajalia mơ Maaseya cau kwang at bồ ƀòn dờng bal mơ Jôa kòn klau Jôaca la cau cih sră yal broă, rcang niam wơl hìu duh khoai Jehôwa Yàng Tom Trồ dê.

⁹Bol khai lòt tus hơ Hilkia cau gơnoar dờng ơn phan duh khoai mơ ai khai in jền priă neh ơn tòm hìu duh khoai Yàng Tom Trồ dê, gơs cau Lebi la ală cau kơp mpồng neh dòp ai bơh di cau Manase, Epraim mơ jơh dô mpồl cau Israel gam wơl mơ bơh di jơh làng bol Juda, Benjamin, mơ ală cau ơm tòm Jerusalem.

¹⁰Gen bol khai jào jền priă hơ̆ ală cau in neh geh pồ bơtào sền gàr broă lơh hìu duh khoai Yàng Jehôwa dê. Ală cau do tơm jền tơngai ală cau lơh broă rcang niam wơl hìu duh khoai.

¹¹Bol khai kung ai jền priă ală cau chài lơh chi mơ chài bơt lŭ nàng blơi lŭ neh phàt rau mơ ală ròc mơ ală mpàn chi nàng bơt ală hìu mơ ală cau bơtau Juda neh sang lòi tơrlah tơrling.

¹²Ală cau hơ̆ lơh broă dô bă dòn song ngan. At bồ hơđang bol khai gen gơs Jahat mơ Ôbadia la ală kòn sau Lebi bơh di mpồl Merari, mơ Sacari mơ Mesulam, kòn sau bơh di mpồl Kôhat. Jơh ală cau Lebi chài rgơi pĕ mơ rơs ală bơta kơñi,

¹³bol khai geh jào broă at bồ ală cau lơh broă mơ sền gàr jơh ală cau lơh ală broă. Gơs cau ƀà tòm ală cau Lebi la ală cau gơnoar cih, cau bơto bơta boh lam mơ cau kơp mpồng.

¹⁴Tòm tŭ bol khai cèng tơlik jền priă neh geh cèng tơmut tòm hìu duh khoai Yàng Jehôwa dê, gen Hilkia cau gơnoar ơn phan duh khoai jòi bàn dap Sră Bơta Boh Lam Yàng Jehôwa dê neh ai gan di Môise.

¹⁵Hilkia đơs mơ Saphan cau gơnoar cih lah: “Añ neh jòi bàn dap Sră Bơta Boh lam tòm hìu duh khoai Yàng Jehôwa dê.” Khai ai dap sră hơ̆ Saphan in.

¹⁶Gen Saphan cèng dap sră hơ̆ tus hơ cau bơtau mơ yal wơl cau bơtau in lah: “Ală cau kwang duh broă bơtau neh lơh jơh ală bơta mơ bơtau neh sồr bol khai lơh.

¹⁷Bol khai neh ngui jền bơh di hìu duh khoai Yàng Jehôwa dê nàng jào ală cau sền gàr broă lơh mơ tơm ală cau lơh broă in.”

¹⁸Gen Saphan cau gơnoar cih yal tơnggit cau bơtau in lah: “Hilkia cau gơnoar ơn phan duh khoai neh ai añ in dô dap sră.” Mơ Saphan sền sră hơ̆ di đap mat cau bơtau.

¹⁹Tòm tŭ cau bơtau neh kơno jơnau Yàng Jehôwa dê, khai crè ală ào jrùh khai dê.

²⁰Khai ai ală jơnau gơnoar sồr Hilkia, Ahikam kòn klau Saphan, Apdôn kòn klau Mika, Saphan cau gơnoar cih mơ Asaja cau kwang ơm rềp di bơtau mơ đơs lah:

²¹“Lòt tĕ hòi lùp Yàng Jehôwa añ in mơ làng bol gam wơl tòm Israel mơ Juda in bơh jơnau neh cih tòm dap sră neh jòi bàn do. Bơta gơjrañ dờng Yàng Jehôwa dê rơp dùh hơđang bol he tài bơh ală ồng pàng bol he dê ò prap gàr jơnau Yàng Jehôwa dê, bol khai ò lơh jat tòm toh be jơh ală jơnau neh cih tòm dap sră do.”

²²Hilkia mơ ală cau mơ bơtau neh sồr lòt bal mơ khai lik lòt nàng đơs mơ cau gơnoar hwơr ùr Hulda la bau ùr Salum kòn klau Tôkhat, sau Hasrah, la cau kơp gàr ơdŭ prap ală ào jrùh. Cau gơnoar hwơr ùr do ơm tòm Jerusalem, tòm kơnhwàl dơ̆ bàr.

²³Khai đơs mơ bol hơ̆ lah: “Yàng Jehôwa la Yàng Tom Trồ Israel dê đơs be do: Yal tĕ mơ cau neh sồr bol mê tus hơ añ lah:

²⁴Do la jơnau đơs Yàng Jehôwa dê: ‘Añ rơp đùh bơta rung rài hơđang tiah do mơ hơđang làng bol gơ dê, hơ̆ la jơh ală jơnau srat sơntơm neh cih tòm dap sră do mơ neh geh sền di đap mat cau bơtau Juda dê.

²⁵Tài bơh bol khai neh sang lòi Añ mơ neh chu kơlhô ală yàng ndai in mơ neh bơrcek Añ gơjrañ bơh jơh ală bơta tê bol khai neh lơh, gen bơta gơjrañ Añ jê rơp dùh hơđang tiah do mơ rơp ò rài ò.’

²⁶Yal tĕ cau bơtau Juda in la cau neh sồr bol mê lòt tus hòi lùp Yàng Jehôwa lah, do la jơnau Jehôwa la Yàng Tom Trồ Israel dê neh đơs bơh ală jơnau mơ mê neh kơno,

²⁷‘Tài bơh nùs mê neh rcang sir nàng lơh jat mơ mê neh tơnliah să tòm mê di đap Yàng Tom Trồ tòm tŭ mê neh kơno ală jơnau Kơnràñ neh đơs tòmdră mơ tiah do mơ làng bol gơ dê, mơ tài bơh mê neh tơnliah să tòm mê di đap Añ mơ neh crè ào jrùh mê dê mơ ñìm di đap mat Añ, Añ neh kơno jơnau mê dê, Yàng Jehôwa đơs behơ̆.

²⁸Tŭ do Añ rơp cèng tơrgòm mê rê bal mơ ală ồng pàng mê dê, mơ mê rơp geh tơp lơngap lơngai. Mat mê rơp ò gŏ jơh ală bơta rung rài mơ Añ rơp dùh hơđang tiah do mơ ală cau ơm tềng do.’” Behơ̆ bol khai rê yal wơl mơ cau bơtau jơnau ho wơl cau gơnoar hwơr ùr dê.

²⁹Gen cau bơtau hòi pơjum jơh ală cau kwang kra Juda mơ Jerusalem dê.

³⁰Khai guh hơ hìu duh khoai Yàng Jehôwa dê bal mơ ală cau Juda, làng bol Jerusalem, ală cau gơnoar ơn phan duh khoai mơ ală cau Lebi, hơ̆ la jơh làng bol bơh cau dềt rlau jơh tus di cau dờng rlau jơh. Khai sền bol khai in iat jơh ală jơnau tòm dap sră bơta Ho Bal neh jòi bàn tòm hìu duh khoai Yàng Jehôwa dê.

³¹Cau bơtau ntào di tiah khai dê mơ lơh pa wơl jơnau ho bal khai dê di đap Yàng Jehôwa, hơ̆ la lòt jat Yàng Jehôwa, jơh nùs jơh hwềng prap gàr ală jơnau sồr, ală bơta sồr lam mơ ală bơta lơh nền Kơnràñ dê, mơ dòn bơr lơh jat ală jơnau tòm bơta ho bal neh cih tòm dap sră do.

³²Gen khai sồr kòp nă cau tòm Jerusalem mơ Benjamin ho pơgon să tòm bol mê dê lơh jat bơta hơ̆, làng bol Jerusalem lơh tòm toh be bơta ho bal Yàng Tom Trồ dê la Yàng Tom Trồ ală ồng pàng bol khai dê.

³³Jôsia tă sang jơh ală rùp ràk cù kìr bơh tòm làm jơh ù tiah gơrê bal mơ Israel, mơ khai sồr jơh ală cau gơs mat tòm Israel duh broă Jehôwa Yàng Tom Trồ bol khai dê. Jơh rài kis bol khai dê ò sang lòi mơ kư̆ lòt jat Jehôwa la Yàng Tom Trồ ală ồng pàng bol khai dê.