Read koho II Yal Yau 35 Bible Online

II Yal Yau 35 - koho bible

II Yal Yau 35

¹Jôsia prap gàr bơta pơjum sa ngai wèr Lòt Gan Yàng Jehôwa dê tòm Jerusalem, bol khai hàl belàt kòn ngai wèr Lòt Gan tòm ngai jơt poan kơnhai dùl.

²Khai pồ bơtào ală cau gơnoar ơn phan duh khoai nàng lơh broă bol khai dê mơ chồl nùs bol khai tòm bơta duh broă tòm hìu duh khoai Yàng Jehôwa dê.

³Khai đơs mơ ală cau Lebi la ală cau bơto sồr jơh cau Israel mơ la ală cau geh ơn is sàng goh Yàng Jehôwa in lah: “Ơn tĕ Đài Bơta Ho Bal sàng goh tòm hìu duh khoai mơ Salômôn kòn klau Dabit bơtau Israel neh lơh, bol mê ò càng tùng hơđang pơnì bol mê dê tai. Tŭ do duh tĕ broă Jehôwa Yàng Tom Trồ bol mê dê mơ Israel làng bol Kơnràñ dê.

⁴Rcang sir tĕ ală jơi bơtiàn jat ală hìu nhă tòm kòp mpồl bol mê dê, jat be ală jơnau neh geh cih bơh Dabit bơtau Israel dê mơ bơh Salômôn kòn klau khai dê.

⁵Ntào tĕ di tiah sàng goh jat be ală mpồl jơi bơtiàn ală hìu nhă oh mi bol mê dê tòm làng bol, gen lòi tĕ gơs ală cau Lebi jat mpồl kòp ală jơi bơtiàn hìu nhă dê.

⁶Hàl tĕ ală belàt kòn ngai wèr Lòt Gan, ơn is tĕ sàng goh să tòm bol mê dê mơ rcang ală belàt kòn ală oh mi gơp bơtiàn bol mê in, lơh tĕ jat be jơnau Yàng Jehôwa neh kơnòm di Môise.”

⁷Gen Jôsia tòmpà làng bol in, be ală phan ơn pơdơng ngai pơjum sa lòt gan ală cau neh gơs mat tềng hơ̆ in, ală belàt mơ ală kòn belàt bơh di mpồl belàt la pe jơt rbô nơm, mơ pe rbô nơm kơnrồ dam, jơh ală phan hơ̆ la bơh di ală phan tòm bơtau dê.

⁸Ală cau kwang at bồ tòmpà jat nùs kòñ mơ ai làng bol in, ală cau gơnoar ơn phan duh khoai in mơ ală cau Lebi in, Hilkia, Sacari mơ Jehiel la cau at bồ ală cau kwang tòm hìu duh khoai Yàng Tom Trồ dê, ai ală cau gơnoar ơn phan duh khoai in phan ơn pơdơng ngai pơjum sa lòt gan in bàr rbô prau rhiang nơm belàt mơ kòn belàt mơ pe rhiang nơm kơnrồ dam.

⁹Kung behơ̆ sơl, Kônania bal mơ ală oh mi khai dê la Semayah mơ Nethanel, mơ Hasabia, Jeiel mơ Jôjabat la ală cau lam bồ cau Lebi dê, ai ală cau Lebi in ală phan ơn duh khoai ngai pơjum sa lòt gan la pram rbô nơm belàt mơ kòn belàt, mơ pram rhiang nơm kơnrồ dam.

¹⁰Tòm tŭ bơta pơjum sa neh rcang sir rau, mơ ală cau gơnoar ơn phan duh khoai neh ntào tòm tiah bol khai dê, bal mơ ală cau Lebi jat ală mpồl bol khai dê, jat be jơnau gơnoar sồr cau bơtau dê.

¹¹Bol khai neh hàl belàt kòn bơta pơjum sa lòt gan, mơ ală cau gơnoar ơn phan duh khoai neh rsìh mhàm neh ai bol khai in, tòm tŭ ală cau Lebi klò gơltau ală phan poan jơng.

¹²Bol khai ơn is ală phan ơn chu pơrguc nàng bol khai tòmpà gơ jat ală mpồl jơi bơtiàn ală hìu nhă tòm làng bol, nàng ơn Yàng Jehôwa in, be neh cih tòm Sră Môise dê. Bol khai kung lơh tòm toh behơ̆ mơ ală kơnrồ dam.

¹³Bol khai buh ală belàt ngai pơjum Lòt Gan hơđang ồs jat be neh lơh nền, mơ gơm ală phan ơn sàng goh tòm ală gri, ală crah mơ ală glah mơ cèng mhar tus hơ jơh làng bol in.

¹⁴Tơnơ̆ mơ tŭ bol khai neh lơh bơta rcang lài să tòm bol khai in mơ ală cau gơnoar ơn phan duh khoai in, tài bơh ală cau gơnoar ơn phan duh khoai la ală kòn sau Arôn dê, neh geh pơnah tòm phan ơn chu pơrguc mơ ală pơnah dơngi jơl tus di trồ mang. Behơ̆ ală cau Lebi neh lơh bơta rcang lài să tòm bol khai in mơ ală cau gơnoar ơn phan duh khoai jat jơi Arôn in.

¹⁵Ală cau jak lip kơñi la ală kòn sau Asap neh ơm di tiah lơh nền bơh Dabit, Asap, Heman mơ Jeduthun la cau gơnoar git lài bơtau dê. Ală cau kơp mpồng tòm kòp nơm mpồng, bol khai ò càng ơm dơh wơl broă bol khai dê, bơh ală oh mi Lebi bol khai dê neh rcang lài bol khai in rau.

¹⁶Behơ̆ jơh ală bơta pơjum duh khoai Yàng Jehôwa neh geh rcang sir tòm ngai hơ̆, nàng prap gàr bơta pơjum sa Lòt Gan mơ ơn ală phan ơn chu pơrguc hơđang cơnòng duh khoai Yàng Jehôwa dê, jat be gơnoar sồr bơtau Jôsia dê.

¹⁷Ală cau Israel gơs mat neh prap gàr pơjum sa Lòt Gan tòm tŭ hơ̆, mơ bơta pơjum sa Piang lă ò gơs kañ tòm poh ngai.

¹⁸Òhềt tŭ lơi gơs bơta pơjum sa lòt gan geh prap gàr tòm toh behơ̆ tòm Israel, bơh di ală ngai cau gơnoar hwơr Samuel dê; mơ ò gơs dô nă bơtau lơi Israel dê neh prap gàr dô ngai pơjum sa wèr Lòt Gan kung be Jôsia neh prap gàr mơ bơh ală cau gơnoar ơn phan duh khoai, ală cau Lebi mơ jơh Juda mơ Israel la ală cau neh gơs mat mơ bơh làng bol ơm tòm Jerusalem.

¹⁹Tòm nam dơ̆ jơt phàm rài at bồ Jôsia dê neh geh prap gàr bơta pơjum sa lòt do.

²⁰Tơnơ̆ mơ jơh ală bơta hơ̆, tòm tŭ Jôsia neh rơndap tap sèng wơl hìu duh khoai rau, gen Nekô bơtau Ejiptơ guh tòmlơh tòm Karkemis hơđang hiòng Ơphrat, mơ Jôsia lik lòt tòmlơh mơ khai.

²¹Mơya Nekô sồr ală cau kong sồr lòt mơ đơs mơ khai lah: “Ơ cau bơtau Juda, ñchi bơta añ neh lơh gơwèt mơ mê taih. Añ ò di lòt tus tòmdră mơ mê ngai do, mơya tòmdră mơ hìu cau sò tơm di añ tòm bơta tòmlơh; mơ Yàng Tom Trồ neh sồr añ lòt lơh mhar; ơm dơh tĕ bañ tòmdră mơ Yàng Tom Trồ la Bơtau ơm bal mơ añ, behơ̆ nàng Kơnràñ rơp ò tơnroh mê!”

²²Mơya Jôsia ò bài pleh ngài bơh khai, soh mơ ồi ào lơh be cau ndai nàng tòmlơh mơ Nekô. Khai ò bài iat jơnau Nekô neh tus bơh di bơr Yàng Tom Trồ dê, mơya mut tòm bơta tòmlơh mơ khai tòm ƀlàng ring Megidô dê.

²³Ală cau ling ngui àtak pañ bơtau Jôsia, mơ khai đơs mơ ală cau kwang duh broă khai dê lah: “Tơlik tĕ añ hơ tiah ngài, bơh añ neh sồt kơnjơ̆ ngan.”

²⁴Behơ̆ ală cau duh broă khai tơlik khai bơh di rơndeh tòmlơh khai dê, mơ ơn khai hơđang dô nơm rơndeh tòmlơh ndai mơ cèng khai tus hơ Jerusalem mơ khai chơt tềng hơ̆. Cau tơp khai tòm bơtô ƀồc ală ồng pàng khai dê, jơh Juda mơ Jerusalem rac ròc ñìm ƀồc khai.

²⁵Jeremi cih ală jơnau ñìm rac Jôsia in, mơ jơl tus di ngai do, jơh ală cau klau mơ cau ùr jak đơs chò gam đơs ală jơnau ñìm rac hơ̆ nàng kah wơl Jôsia. Ală bơta hơ̆ neh gơlik gơs dô bơta òs yau tòm Israel mơ neh geh cih tòm ală jơnau Ñìm rac.

²⁶Ală bơta ndai tòm rài at bồ Jôsia dê mơ bơta dòn song khai dê, jat bơta neh cih tòm sră bơta boh lam Yàng Jehôwa dê,

²⁷jơh ală broă khai lơh, bơh sơnròp tus di lồi dut, neh geh cih tòm sră ală cau bơtau Israel mơ Juda dê.