Read koho II Yal Yau 36 Bible Online

II Yal Yau 36 - koho bible

II Yal Yau 36

¹Mơ làng bol tòm lơgar ai Jôaca kòn klau Jôsia mơ bơtào khai gơs bơtau pơrdòn bèp khai at bồ tòm Jerusalem.

²Jôaca neh bàr jơt pe nam tòm tŭ sơntòm at bồ, mơ khai at bồ pe kơnhai tòm Jerusalem.

³Gen bơtau Ejiptơ dê tă tơlik khai bơh Jerusalem mơ sồr Juda pal dap dia dô rhiang talơng priă mơ dô talơng màh.

⁴Bơtau Ejiptơ bơtào oh khai la Eliakim lơh bơtau at bồ hơđang Juda mơ Jerusalem, mơ tòmgơl sơnđan khai la Jehôyakim. Mơya Nekô kup bi Eliakim la Jôaca mơ cèng khai tus hơ Ejiptơ.

⁵Jehôyakim neh bàr jơt pram nam tòm tŭ khai sơntòm at bồ; mơ khai at bồ jơt dùl nam tòm Jerusalem. Khai lơh bơta iơh bơsak di đap mat Jehôwa Yàng Tom Trồ khai dê.

⁶Nebukatnessar bơtau Babilôn brồ lơh khai kup cap khai mơ che sreng kòng mơ cèng khai tus hơ Babilôn.

⁷Nebukatnessar kung tă cèng tus hơ Babilôn ală phan ngui tòm hìu duh khoai Yàng Jehôwa dê mơ ơn ală phan ngui hơ̆ tòm gơlang khai dê tòm Babilôn.

⁸Ală bơta ndai tòm rài at bồ Jehôyakim dê, ală bơta cù kìr khai neh lơh mơ jơh bơta jòi bàn bơta tòmdră mơ khai, neh geh cih tòm ală sră ală cau bơtau Israel mơ Juda dê. Mơ Jehôyakin kòn klau khai pơrdòn sơbàn khai dê.

⁹Jehôyakin neh jơt phàm nam tòm tŭ khai sơntòm at bồ, mơ khai at bồ pe kơnhai mơ jơt ngai tòm Jerusalem. Khai lơh bơta iơh bơsak di đap mat Yàng Jehôwa.

¹⁰Tòm kơnhai bơkào chi che bơtau Nebukatnessar sồr cau kup khai cèng tus hơ Babilôn, bal mơ ală phan ngui kas màng bơh di hìu duh khoai Yàng Jehôwa dê, mơ bơtào wa khai la Jedekia gơs bơtau at bồ hơđang Juda mơ Jerusalem.

¹¹Jedekia neh bàr jơt dùl nam tòm tŭ khai sơntòm at bồ, mơ khai at bồ jơt dùl nam tòm Jerusalem.

¹²Khai lơh bơta iơh bơsak di đap mat Jehôwa Yàng Tom Trồ khai dê mơ ò tơnliah să di đap Jeremi cau gơnoar hwơr la cau neh đơs jơnau Yàng Jehôwa dê.

¹³Khai kung tòmdră mơ bơtau Nebukatnessar la bơtau neh sồr khai srat să ho nền tòm sơnđan Yàng Tom Trồ dê. Khai kơldang bồ mơ kơldang nùs ò bài rê wơl hơ Yàng Jehôwa la Yàng Tom Trồ Israel dê.

¹⁴Jơh ală cau lam bồ ală cau gơnoar ơn phan duh khoai dê mơ làng bol kung gơlik ò dòn song dô bă lin rlau jơh, lơh jat ală bơta òs mòng cù kìr ală làng bol dê mơ lơh ƀơ̆ ƀơl hìu duh khoai Yàng Jehôwa dê mơ Kơnràñ neh ơn is sàng goh tòm Jerusalem.

¹⁵Jehôwa Yàng Tom Trồ ală ồng pàng bol khai dê neh kong ơt di bol khai mơ kơnòm di ală cau kong sồr Kơnràñ dê, tài bơh Kơnràñ kòñ nđàc hơđang làng bol Kơnràñ dê, mơ hơđang tiah ơm sùm Kơnràñ dê.

¹⁶Mơya bol khai ñŏ tơnhial di ală cau kong sồr Kơnràñ dê, sền òsơp di ală jơnau Kơnràñ dê, mơ bơtat bơtròh ală cau gơnoar hwơr Kơnràñ dê, tian gơs bơta gơjrañ dờng Yàng Jehôwa dê gơhào khuh dờng ngan tòmdră mơ làng bol Kơnràñ dê mơ ò gơs gùng lơi rgơi dong.

¹⁷Gen tàng Kơnràñ cèng bơtau Babilôn guh tòmdră mơ bol khai, khai ai đào sreh tơnchơt ală cau pơnu bol khai dê, tòm hìu sàng goh bol khai dê, mơ ò nđàc sơngit di cau pơnu hala cau ơruh, cau kra hala cau ryŭ ryơm; mơ Kơnràñ jào jơh ală phan hơ̆ tòm tê Nebukatnessar.

¹⁸Jơh ală phan ngui tòm hìu duh khoai Yàng Tom Trồ dê, dờng mơ dềt, mơ ală phan màng tòm hìu duh khoai Yàng Jehôwa dê mơ ală phan màng cau bơtau dê mơ ală cau kwang duh broă khai dê, cèng jơh ală phan hơ̆ hơ Babilôn.

¹⁹Bol khai ai ồs chu hìu duh khoai Yàng Tom Trồ dê mơ lơh tơrlah dơrñang ƀòn dờng Jerusalem dê; chu jơh ală gơlang bơtau mơ tơnroh jơh ală phan kas màng.

²⁰Khai cèng pơrdô hơ Babilôn ală cau neh klàs bơh đào, mơ bol khai gơlik gơs ală cau duh broă khai in mơ ală kòn klau khai in, jơl tus di tŭ lơgar Persia geh bơtào kơ̆.

²¹Nàng gơlik di ngan be jơnau Yàng Jehôwa neh kơnòm dê bơr Jeremi, jơl tus di ù geh bơtào wơl ală nam Saƀat gơ dê. Jơh ală nam neh lòi srau, ù geh prap gàr ngai Saƀat jơl tus wil tơl poh jơt sơnam.

²²Tòm nam sơnròp Sirus bơtau Persia dê, nàng lơh gơlik gơs di ngan be jơnau Yàng Jehôwa neh đơs bơh bơr Jeremi, Yàng Jehôwa chồl hwềng nùs Sirus bơtau Persia, gen tàng khai neh pơyoa dô jơnau yal tơlik gơnoar sồr làm jơh lơgar in lah:

²³“Sirus bơtau Persia đơs be do: ‘Yàng Jehôwa la Yàng Tom Trồ hơđang trồ, neh ai añ in jơh ală lơgar tòm plai ù mơ Kơnràñ neh pồ bơtào añ nàng bơt bơtào dô nơm hìu duh khoai Kơnràñ in tòm Jerusalem tòm Juda. Cau lơi digùl bol mê la làng bol Kơnràñ dê, gen guh tĕ hơ Jerusalem, mơ dan Jehôwa Yàng Tom Trồ khai dê ơm bal mơ khai!’”