Read koho II Yal Yau 4 Bible Online

II Yal Yau 4 - koho bible

II Yal Yau 4

¹Khai lơh dô nơm cơnòng duh khoai mơ kòng bàr jơt tal jòng, bàr jơt tal ơnàng, mơ jơt tal jơnhoa.

²Khai lơh dô nơm tơnau dà; gơ wil gùt dar la jơt tal, pram tal jrô. Gùt dar gơ la pe jơt tal.

³Hơđơm bơr gơ gơs rùp kơnrồ dam gùt dar, dô nơm kòp jơt tal. Ală kơnrồ dam neh tŏ tòm bàr sèng gơđềt bal mơ tơnau dà.

⁴Tơnau dà geh ơn hơđang jơt bàr nơm kơnrồ dam, pe nơm wèt mat hơ đah đang, pe nơm wèt mat hơ đah mattơngai mut, pe nơm wèt mat hơ đah đơm, mơ pe nơm wèt mat hơ đah mattơngai lik. Tơnau dà ơn hơđang bol gơ, mơ đah pơnah ngkòi bol gơ dê gen gơwèt hơ klŏ digùl.

⁵Gơ lơut dô nđàm, mơ bơr gơ gơlơh kung be bơr dô nơm mơngàn dà, be dô nơm bơkào gun gơlì. Gơ ơn pe rbô thao ƀàk dà.

⁶Khai kung lơh jơt bòng dà nàng rào mơ ơn pram nơm đah đơm mơ pram nơm đah đang. Ală phan pal ngui tòm phan ơn chu pơrguc pal geh rào goh tòm ală bòng dà hơ̆, mơya bòng dà ne lòi rào goh ală cau gơnoar ơn phan duh khoai.

⁷Khai lơh jơt nơm jơng đèng mơ màh jat sơnoa rnoas gơ dê mơ ơn gơtòm hìu duh khoai, pram nơm đah đơm mơ pram nơm đah đang.

⁸Khai lơh jơt nơm cơnòng mơ ơn gơtòm hìu duh khoai, pram nơm đah đơm mơ pram nơm đah đang. Mơ khai kung lơh dô rhiang nơm mơngàn màh nàng ơn dà rsìh.

⁹Khai lơh ƀlàng dơlam ală cau gơnoar ơn phan duh khoai in, mơ ƀlàng dờng đah bơdìh sơl; ală mpồng ƀlàng geh ƀềp mơ kòng.

¹⁰Khai ơn bòng dà đah đơm, di mum đah đơm mơ đah mattơngai lik.

¹¹Khai kung lơh jơt nơm gri mơ ală cơnhŏ dờng mơ ală mơngàn ơn dà rsìh. Behơ̆ Huram lơh sir ală broă mơ khai neh lơh bơtau Salômôn in tòm hìu duh khoai Yàng Tom Trồ dê, hơ̆ la:

¹²bàr nơm jrong; bàr nơm bồ hơđang jrong gơs rùp be mơngàn; bàr nơm bơtơng gòm hơđang bàr nơm bồ jrong gơs rùp kung be mơngàn;

¹³poan rhiang nai plai lừu top tòm bàr nơm bơtơng, kòp nơm bơtơng gơs bàr sèng plai lừu bơka hơđang bồ jrong gơs rùp be mơngàn;

¹⁴ală jơng gòl tơnau dà bal mơ ală tơnau dà gơ dê;

¹⁵Tơnau dà mơ jơt bàr nơm kơnrồ hơđơm gơ;

¹⁶ală gri, ală gơbìa, ală cơnhŏ sề mơ jơh ală phan ngui ndai gơrê bal mơ hơ̆, mơ Huram Abi neh lơh Bơtau Salômôn in tòm hìu duh khoai Yàng Jehôwa dê la mơ kòng tho goh.

¹⁷Tòm ƀlàng ring Jordan dê bơtau sồr cau tŏ ală phan hơ̆ mơ ù kơnàng digùl Sukôt mơ Jereda.

¹⁸Salômôn neh lơh jơh ală phan do mơ kòng la oă ngan, gen tàng kòng neh ngui ò git nền la nđò.

¹⁹Salômôn kung neh lơh ală phan ngui tòm hìu duh khoai, hơ̆ la: cơnòng duh khoai mơ màh; ală cơnòng ơn piang lă pràng di đap mat Yàng;

²⁰ală jơng đèng mơ màh ngan bal mơ ală đèng gơ dê, mơ màh goh nàng chu di đap tiah sàng goh tòm dơlam be neh rơndap;

²¹ală bơkào, ală đèng, mơ ală chi kơtrơi lơh mơ màh goh rlau jơh;

²²ală kơtrơi koh brài đèng, cơnhŏ chŏ dà poac, ală gri ơn ồs chu kơlhô, lơh mơ màh ngan, bơh mpồng mut tòm hìu duh khoai dê: ală mpồng tòm dơlam tus hơ Tiah Sàng Goh Ngan dê mơ ală mpồng ơdŭ dờng hìu duh khoai dê lơh mơ màh.