Read koho II Yal Yau 5 Bible Online

II Yal Yau 5 - koho bible

II Yal Yau 5

¹Hơ̆ la jơh ală broă mơ Salômôn lơh hìu duh khoai Yàng Jehôwa in neh sir rau. Salômôn cèng tơmut ală phan mơ Dabit bèp khai neh ơn Yàng in, hơ̆ la priă mơ màh bal mơ jơh ală phan ngui ndai, mơ khai ơn ală phan hơ̆ tòm ală đam jàr hìu Yàng Tom Trồ dê.

²Gen Salômôn hòi pơjum ală cau kwang kra tòm Jerusalem, jơh ală cau at bồ ală jơi bơtiàn mơ hìu nhă Israel tòm Jerusalem nàng cèng Đài Ho Bal Yàng Jehôwa dê bơh ƀòn dờng Dabit dê, hơ̆ la Siôn.

³Mơ jơh ală làng bol Israel neh pơjum bal di đap bơtau tòm bơta pơjum sa tòm kơnhai dơ̆ poh.

⁴Mơ jơh ală cau kwang kra Israel dê neh tus, mơ cau Lebi tùng Đài Bơta Ho Bal.

⁵Behơ̆ bol khai cèng Đài Ho Bal mơ Sàl Tòm Mat mơ jơh ală phan ngui sàng goh tòm Sàl hơ̆. Ală cau gơnoar ơn phan duh khoai la cau Lebi tùng ală phan hơ̆.

⁶Bơtau Salômôn bal mơ mpồl jơnum Israel neh pơjum di đap bơtau, ơm di đap Đài Ho Bal, ơn phan duh khoai oă ngan belàt mơ kơnrồ tian gơs ò rgơi cih wơl hala kòp khà.

⁷Gen ală cau gơnoar ơn phan duh khoai cèng Đài Ho Bal Yàng Jehôwa dê ơn di tiah gơ dê tòm Tiah Sàng Goh Ngan, hơđơm ală pơnđar ceruƀim dê.

⁸Ală ceruƀim lì ală pơnđar gơ dê hơđang tiah ơn Đài Ho Bal mơ behơ̆ tàng ceruƀim jơm hơđang Đài Ho Bal mơ ală mơng tùng gơ dê.

⁹Ală mơng do jòng ngan gen tàng di tiah lồi ală mơng tùng hơ̆ mpòl bơh di tiah sàng goh đah hơđap tòm dơlam hìu duh khoai, mơya bol khai ò rgơi gŏ bơh đah bơdìh; bol gơ gam tềng hơ̆ tus di ngai do.

¹⁰Ò gơs phan lơi ndai tòm Đài Ho Bal rlau mơ bàr pang mpàn lŭ mơ Môise neh ơn tòm hơ̆ tòm tŭ ơm tòm Hôrep, la tiah Yàng Jehôwa neh lơh dô bơta ho bal mơ cau Israel tơnơ̆ mơ tŭ bol khai neh lik bơh di Ejiptơ.

¹¹Tòm tŭ ală cau gơnoar ơn phan duh khoai lik bơh Tiah Sàng Goh. Bơh ală cau gơnoar ơn phan duh khoai ơm tềng hơ̆ la cau neh ơn is sàng goh, ò di sền cah is di mpồl bol khai dê,

¹²mơ jơh ală cau gơrê bal mơ cau Lebi đơs chò, la Asap, Heman, Jeduthun mơ ală kòn klau mơ gơp bơtiàn bol khai dê, soh ào bài che dơmài lơbơn, gen ơm đah mattơngai lik cơnòng duh khoai dê, tur cing dềt mơ rơs ală kơñi che bal mơ dô rhiang bàr jơt nă cau gơnoar ơn phan duh khoai uh kơlwòk.

¹³Hơ̆ la broă tòm ală cau uh kơlwòk mơ ală cau đơs chò nàng lơh bol khai in gơs dô bă bal nàng jòng ro mơ ưnngài Yàng Jehôwa, mơ tòm tŭ ală bơta đơs chò geh đơs, bal mơ ală kơlwòk, mơ ală cing mơ ală kơñi ndai, jòng ro Yàng Jehôwa lah; “Bơh Kơnràñ la niam, bơta kòñ gơboh kơ̆ dơn Kơnràñ dê gam sùm sùm.” Gen hìu duh khoai Yàng Jehôwa dê geh bềng mhwal,

¹⁴tian gơs ală cau gơnoar ơn phan duh khoai ò rgơi ntào duh broă, tài bơh gơs mhwal; bơh bơta gơklŏ Yàng Jehôwa dê bềng hìu duh khoai Yàng Tom Trồ dê.