Read koho II Yal Yau 6 Bible Online

II Yal Yau 6 - koho bible

II Yal Yau 6

¹Gen Salômôn đơs: “Yàng Jehôwa neh đơs lah Kơnràñ rơp ơm tòm dô puk mhwal jù;

²Añ neh bơt dô nơm hìu duh khoai geh yò tơngguh Kơnràñ in, dô bă tiah Yàng in ơm gam sùm sùm.”

³Gen bơtau wơlke mơ ai lơngai jơh mpồl làng bol Israel in, tòm tŭ jơh mpồl jơnum Israel ntào tềng hơ̆.

⁴Gen khai đơs lah: “Pal jòng ro Jehôwa Yàng Tom Trồ Israel dê, bơh tê Kơnràñ neh lơh gơlik wil tơl jơnau ho bơh bơr Kơnràñ dê, mơ Dabit bèp añ jê, lah:

⁵‘Bơh di ngai Añ neh cèng làng bol Añ jê lik bơh lơgar Ejiptơ, Añ neh ò sac rwah dô nơm ƀòn dờng lơi tòm ală jơi bơtiàn Israel dê nàng bơt dô nơm hìu tồ Sơnđan Añ in ơm tềng hơ̆, mơ Añ kung ò sac cau lơi nàng gơs cau at bồ hơđang làng bol Israel Añ jê.

⁶Mơya Añ neh sac rwah Jerusalem nàng Sơnđan Añ jê rgơi ơm tềng hơ̆, mơ Añ neh sac rwah Dabit nàng at bồ làng bol Israel Añ jê.’

⁷Bèp añ, Dabit neh gơs nùs kòñ bơt dô nơm hìu Sơnđan Yàng Jehôwa in, la Yàng Tom Trồ Israel dê.

⁸Mơya Yàng Jehôwa neh đơs mơ Dabit bèp añ lah: ‘Mê neh lơh niam, gơs nùs kòñ bơt dô nơm hìu Sơnđan Añ in.

⁹Bulah behơ̆, mê rơp ò bơt hìu, mơya la kòn klau mê dê, la cau neh deh bơh mê rơp bơt hìu duh khoai Sơnđan Añ in.’

¹⁰Tŭ do Yàng Jehôwa neh lơh gơlik wil tơl jơnau Kơnràñ neh ho. Añ neh pơrdòn sơbàn Dabit bèp añ, mơ nggui hơđang sơbàn Israel dê, be Yàng Jehôwa neh ho, mơ añ neh bơt hìu duh khoai Sơnđan Yàng Jehôwa in, Yàng Tom Trồ Israel dê.

¹¹Tềng hơ̆ añ neh ơn Đài Ho Bal mơ tòm hơ̆ gơs bơta ho bal Yàng Jehôwa dê mơ Kơnràñ neh bơtào mơ làng bol Israel.”

¹²Gen Salômôn ntào di đap cơnòng duh khoai Yàng Jehôwa dê di đap jơh mpồl jơnum Israel dê mơ pò bàr đah tê khai dê.

¹³Salômôn neh lơh dô nơm tiah ntào mơ kòng, jòng pram tal, ơnàng pram tal mơ jơnhoa pe tal, mơ ơn gơ digùl ƀlàng đah bơdìh; mơ khai ntào hơđang tiah hơ̆. Gen khai cùn gơltang di đap jơh mpồl jơnum Israel dê mơ pò bàr đah tê hơ trồ.

¹⁴Khai đơs lah: “Ơ Jehôwa Yàng Tom Trồ Israel dê, ò gơs yàng lơi be Yàng; hơđang trồ hala tòm ù, neh prap gàr bơta ho bal tòm bơta kòñ gơboh kơ̆ dơn gơwèt mơ ală cau duh broă Kơnràñ dê, la cau lòt di đap Yàng dô bă jơh nùs.

¹⁵Yàng neh prap gàr jơnau Kơnràñ neh ho mơ Dabit bèp añ jê. Ngan, bơr Kơnràñ neh ho mơ tê Kơnràñ neh lơh gơlik wil tơl tòm ngai do.

¹⁶Gen tàng, ơ Jehôwa Yàng Tom Trồ Israel dê, dan prap gàr dĭ gơna Kơnràñ in la Dabit bèp añ jê ală jơnau Kơnràñ neh ho mơ khai, mơ đơs lah: ‘Mê rơp ò tŭ lơi siơ̆u dô nă cau geh pơrdòn di đap Añ nàng nggui hơđang sơbàn Israel dê, mìng dilah ală kòn sau mê dê git kơrhia tòm jơh gùng dà bol khai dê, mơ lòt tòm bơta boh lam be mê neh lòt di đap Añ.’

¹⁷Gen tàng, ơ Jehôwa Yàng Tom Trồ Israel dê, dan lòi jơnau Kơnràñ neh ho mơ Dabit cau duh broă Kơnràñ dê geh dòp nền cê ngan.

¹⁸Mơya ngan la Yàng Tom Trồ rơp ơm tòm ù mơ kòn mơnus sơl ơ? Bulah ală tap trồ, mơ ală tap trồ jơnhoa rlau jơh ò rgơi nàng prap Kơnràñ, tơ ài lah hìu duh khoai dềt rlau jơh do mơ añ neh bơt!

¹⁹Ơ Jehôwa Yàng Tom Trồ añ jê, dan Kơnràñ wèt sền jơnau hòi dan mơ rac dan cau duh broă Kơnràñ dê. Dan ai tồr iat jơnau hòi driau mơ rac dan cau duh broă Kơnràñ dê hòi dan mơ Kơnràñ.

²⁰Dan mat Yàng pò ngai mơ mang wèt hơ hìu duh khoai do, tềng hơ̆ la tiah mơ Kơnràñ neh ho ơn sơnđan Kơnràñ dê. Dan Yàng iat jơnau cau duh broă Kơnràñ dê hòi dan wèt hơ tiah do.

²¹Dan Kơnràñ iat ală jơnau rac dan cau duh broă Kơnràñ dê mơ làng bol Israel Kơnràñ dê tòm tŭ bol khai hòi dan wèt hơ tiah do. Dan iat bơh đang trồ, la tiah ơm sùm Kơnràñ dê, dan iat mơ toh glài.

²²Dilah gơs cau tìs glài tòmdră di cau lơi ndai mơ khai pal ai jơnau srat să, mơ khai tus srat să di đap cơnòng duh khoai Kơnràñ dê tòm hìu duh khoai do,

²³gen dan Kơnràñ iat bơh đang trồ mơ lơh broă, mơ cahrña ală cau duh broă Kơnràñ dê, tơm wơl cau tìs glài in mơ cèng bơta bol khai neh lơh hơđang bồ bol khai dê. Dan dong tò cau song ring in, wèt sền di bol khai jat bơta song ring bol khai dê.

²⁴Tòm tŭ làng bol Israel Kơnràñ dê tìs glài tòmdră mơ Yàng, kong alah di đap dô nă cau sò tơm, mơya bol khai wèt wơl hơ Yàng, dòp git sơnđan Kơnràñ dê, hòi dan rac dan mơ Kơnràñ tòm hìu do,

²⁵gen dan Kơnràñ ơm iat bơh hơđang trồ mơ toh bơta tồi glài làng bol Israel Kơnràñ dê mơ cèng brê bol khai wơl hơ lơgar mơ Kơnràñ neh ai bol khai mơ ală ồng pàng bol khai in.

²⁶Tòm tŭ ală tap trồ kal wơl mơ ò gơs mìu, tài bơh bol khai neh tìs glài tòmdră mơ Kơnràñ, mơ bol khai hòi dan wèt hơ tiah do, dòp git sơnđan Kơnràñ dê mơ pơrlac sang tồi glài bol khai dê, tài bơh Kơnràñ neh lơh glài bol khai,

²⁷gen dan Kơnràñ ơm iat bơh hơđang trồ mơ toh bơta tồi glài ală cau duh broă Kơnràñ dê mơ làng bol Israel Kơnràñ dê, tòm tŭ Yàng bơto bol khai gùng niam, tòm hơ̆ bol khai pal lòt; mơ tơndùh mìu hơđang lơgar mơ Kơnràñ neh ai làng bol Kơnràñ in lơh gơs phan jơtài.

²⁸Dilah gơs bơta jơgloh rung hala bơta kòp jê pluh plàng tòm lơgar, ro jrùh chi che, but bơsềt bơh dà tŭ, srah nting hala tu; dilah ală cau sò tơm gơrwàng bol khai bơh bơta lơh pơnring lơi tòm lơgar; bulah gơs bơta jê sồt, bulah gơs bơta kòp jê lơi;

²⁹bulah bơta hòi dan lơi, bulah bơta rac dan lơi bơh dô nă cau hala bơh jơh mpồl làng bol Israel Kơnràñ dê, jơh tơl nă đal git ală bơta bòl glar jê sồt kòp nă dê, mơ bơh hơ̆ bol khai pò bàr đah tê wèt hơ hìu duh khoai do;

³⁰gen dan Kơnràñ iat bơh hơđang trồ la tiah ơm sùm Kơnràñ dê, mơ toh glài mơ tơm wơl ală cau Yàng git nùs bol khai, jat be ală gùng dà bol khai dê, tài bơh mìng Yàng git tòm nùs kòn mơnus dê,

³¹behơ̆ sồng bol khai rngòt di Kơnràñ mơ lòt tòm ală gùng dà Kơnràñ dê tòm jơh ală ngai bol khai kis tòm lơgar mơ Kơnràñ neh ai ală ồng pàng bol hi in.

³²Kung behơ̆ sơl, tòm tŭ cau làng bol bơdìh ò gơrê bal mơ làng bol Israel Kơnràñ dê, mơya neh tus bơh lơgar ngài tài bơh sơnđan dờng Kơnràñ dê, tê gơnoar pràn mơ tơwòr tê pò tơlik Kơnràñ dê; tòm tŭ khai tus mơ hòi dan wèt hơ hìu duh khoai do,

³³gen dan Kơnràñ ơm iat bơh hơđang trồ la tiah ơm sùm Kơnràñ dê, mơ lơh gơlik gơs bơta làng bol bơdìh neh dan mơ Kơnràñ, tồ jơh ală làng bol tòm plai ù rgơi git sơnđan Kơnràñ dê mơ rngòt di Kơnràñ kung be làng bol Israel Yàng dê neh lơh, mơ nàng bol khai rgơi git la sơnđan Kơnràñ dê neh geh hòi dan rac dan tòm hìu do mơ añ neh bơt.

³⁴Dilah làng bol Kơnràñ dê lik lòt tòm tiah tòmlơh tòmdră mơ ală cau sò tơm bol khai dê, tiah lơi Kơnràñ sồr bol khai lòt, mơ bol khai hòi dan mơ Kơnràñ wèt hơ ƀòn dờng do mơ Kơnràñ neh sac rwah, hơ hìu mơ añ neh bơt sơnđan Kơnràñ in,

³⁵gen bơh hơđang trồ dan Kơnràñ iat jơnau hòi dan mơ rac dan bol khai dê mơ dong tò bol khai.

³⁶Dilah bol khai tìs glài tòmdră mơ Kơnràñ, bơh ò gơs cau lơi ò tìs glài, mơ Kơnràñ gơhào gơjrañ di bol khai, mơ jào bol khai tòm tê cau sò tơm bol khai dê mơ kup cèng lơh dĭ tòm dô nơm lơgar ngài hala rềp;

³⁷mơ dilah bol khai kơlôi sơnơng tòm nùs, tòm lơgar mơ bol khai neh kong kup cèng gơs dĭ, git gơjrañ sang glài mơ rac dan mơ Kơnràñ tòm lơgar mơ bol khai neh kong kup cèng lơh dĭ mơ đơs lah: ‘Bol hi neh tìs glài mơ neh lơh bơta tìs; mơ neh lơh bơta iơh bơsak;’

³⁸dilah bol khai jơh nùs jơh hwềng soàn git gơjrañ sang glài tòm lơgar bol khai neh kong kup cèng gơs dĭ mơ hòi dan wèt hơ lơgar mơ Kơnràñ neh ai ală ồng pàng bol khai in, ƀòn dờng mơ Kơnràñ neh sac rwah, hơ hìu duh khoai mơ añ neh bơt sơnđan Kơnràñ in;

³⁹gen bơh hơđang trồ la tiah ơm sùm Kơnràñ dê, dan Kơnràñ ơm iat jơnau hòi dan mơ rac dan bol khai dê mơ dong tò bol khai, mơ dan Kơnràñ toh glài ală cau neh tìs glài tòmdră mơ Kơnràñ.

⁴⁰Tŭ do, ơ Yàng Tom Trồ añ jê, dan lòi mat Yàng pò mơ tồr Yàng ơm iat jơnau añ hòi dan bơh tiah do.

⁴¹Ơ Jehôwa Yàng Tom Trồ, dan guh Lòt tus hơ tiah ơm rlô Kơnràñ dê, Kơnràñ mơ Đài Bơta Ho Bal gơnoar pràn Kơnràñ dê. Ơ Jehôwa Yàng Tom Trồ, dan ală cau gơnoar ơn phan duh khoai Kơnràñ dê geh tơnsoh bơh bơta dong klàs, mơ ală cau dòn song Kơnràñ dê hòn chò tòm bơta lơbơn niam Kơnràñ dê.

⁴²Ơ Jehôwa Yàng Tom Trồ, dan bañ sang lòi cau geh bong mơñà Kơnràñ dê. Dan kah wơl bơta kòñ gơboh kơ̆ dơn mơ Dabit cau duh broă Kơnràñ dê.”