Read koho II Yal Yau 8 Bible Online

II Yal Yau 8 - koho bible

II Yal Yau 8

¹Neh lồi bàr jơt nam tòm tŭ tơngai Salômôn neh bơt hìu duh khoai Yàng Jehôwa dê mơ gơlang khai in,

²Salômôn bơt bơtào wơl ală ƀòn mơ Hiram neh ai khai in, mơ ai ală cau Israel in ơm tềng hơ̆.

³Salômôn lòt tus lơh Hamat Jôbah mơ tòmpìt gơ.

⁴Khai bơt Tatmor tòm ƀlàng ngềt ngơt mơ jơh ală ƀòn dờng ngui nàng lơh đam jàr prap phan mơ khai neh bơt tòm Hamat.

⁵Khai kung bơt Bet Hôrôn Hơđang mơ Bet Hôrôn Hơđơm, ală ƀòn dờng kơ̆ cê, ală dơrñang, ală mpồng ƀòn, mơ ală kơrnal,

⁶mơ Baalat kung be jơh ală ƀòn dờng ngui nàng prap phan Salômôn dê, mơ jơh ală ƀòn dờng nàng ơn ală rơndeh lòs tòmlơh khai dê mơ ală ơseh khai dê, jơh ală bơta khai kòñ bơt tòm Jerusalem, tòm Liban mơ tòm làm jơh lơgar khai at bồ.

⁷Jơh ală làng bol gam wơl bơh di cau Hetit, Amôr, Pheris, Hibit mơ Jebusit, ală làng bol do ò gơrê mơ cau Israel,

⁸bơh ală kòn sau bol khai dê gam wơl tòm lơgar, la ală cau mơ cau Israel neh ò tơnroh; Salômôn kup ală cau do duh broă bòl glar gam tus di ngai do.

⁹Mơya Salômôn ò kup cau Israel lơh dĭ duh broă khai in; bol khai la ală cau ling, ală cau kwang dờng khai dê, ală cau at bồ ală cau ling at rơndeh lòs tòmlơh mơ ală cau ling hào ơseh.

¹⁰Bol khai la ală cau kwang at bồ duh broă Salômôn dê, bàr rhiang pram jơt nă gơs gơnoar hơđang làng bol.

¹¹Salômôn neh cèng kòn ùr Pharaôn bơh di ƀòn Dờng Dabit tus hơ gơlang mơ khai neh bơt bau ùr khai in, bơh khai đơs lah: “Bau ùr añ rơp ò ơm tòm gơlang Dabit bơtau Israel dê, tài bơh ală tiah mơ Đài Bơta Ho Bal neh tus la tiah sàng goh.”

¹²Gen Salômôn ơn ală phan ơn chu pơrguc Yàng Jehôwa in hơđang cơnòng duh khoai Yàng Jehôwa dê mơ khai neh bơt di đap ƀlàng jơng gùng hìu duh khoai dê,

¹³jat bơta pal càng kòp ngai, ơn phan pơdơng jat be bơta boh lam Môise dê bơh ală ngai Saƀat, ală ngai Dùl Lik mơ tòm pe bơta pơjum sa kòp nam la bơta pơjum sa Piang lă ò gơs kañ, bơta pơjum sa Ală Poh mơ bơta pơjum sa Sàl Ing.

¹⁴Jat be bơta lơh nền Dabit bèp khai dê, khai pồ bơtào ală bơnòr cau gơnoar ơn phan duh khoai jat broă tòm bol khai dê, mơ ală cau Lebi nàng lam bồ bơta jòng ro mơ gơnoar broă ală cau gơnoar ơn phan duh khoai jat be broă pal lơh kòp ngai, mơ ală mpồl cau kơp gàr ală mpồng jat kòp mpồl bol khai dê tòm kòp nơm mpồng, tài bơh hơ̆ la bơta mơ Dabit cau Yàng Tom Trồ dê neh ai jơnau sồr.

¹⁵Bol khai ò sang lòi ală gơnoar sồr bơtau dê neh ai ală cau gơnoar ơn phan duh khoai in hala neh ai ală cau Lebi in tòm jơh ală bơta, bal mơ ală broă bơh ală đam jàr dê.

¹⁶Jơh ală broă Salômôn dê neh lơh sir, bơh di ngai mơnàng hìu duh khoai Yàng Jehôwa dê sơntòm bơt jơl tus di tŭ hìu duh khoai Yàng Jehôwa dê neh bơt sir.

¹⁷Gen Salômôn lòt hơ Ejiôn Geber mơ Elôt rò gah dàlềng tòm ù tiah Edôm dê.

¹⁸Hiram pơyoa khai in ală ơhò mơ ală cau at ơhò la ală cau git gùng tòm dàlềng. Ală cau do bal mơ ală dĭ gơna Salômôn dê hào ơhò lòt tus Ôphir mơ pơdiang poan rhiang pram jơt talơng màh mơ cèng gơ bơtau Salômôn in.