Read koho II Yal Yau 9 Bible Online

II Yal Yau 9 - koho bible

II Yal Yau 9

¹Tòm tŭ bơtau ùr Seba kơno bơh bơta tiơng pơnro Salômôn dê, khai lòt hơ Jerusalem nàng lòng Salômôn mơ ală sèng lùp kalke, gơs dô mpồl gal ngan, mơ ală làkđa pơdiang ală sơnơm ƀô bơlhu, mơ oă ngan màh mơ lŭ màng. Tòm tŭ khai tus hơ Salômôn gen tòmbơhbơr mơ khai bơh jơh ală bơta neh gơs tòm dơngoh khai dê.

²Salômôn ho wơl jơh ală sèng lùp khai dê; ò gơs sèng lơi la ndơp ndơr mơ Salômôn ò rgơi yal tơlik khai in.

³Tòm tŭ bơtau ùr Seba sền gŏ bơta jak chài Salômôn dê, gơlang khai neh bơt,

⁴ală phan sa hơđang cơnòng sa, tiah nggui ală cau kwang khai dê, bơta gơs mat ală cau duh broă khai dê mơ ală phan soh bol khai dê, ală cau duh broă tòm ală ơdŭ mơ ală phan soh bol khai dê, mơ ală phan ơn chu pơrguc mơ khai neh ơn tòm hìu duh khoai Yàng Jehôwa dê, gen khai ai lơh crih crài ngan mơ gơdô nùs.

⁵Behơ̆ khai đơs mơ bơtau lah: “Jơnau cau yal mơ añ neh kơno tòm lơgar tòm añ jê bơh ală bơta mơ bơtau neh lơh gơlik gơs mơ bơh bơta jak chài bơtau dê la ngan.

⁶Mơya añ ò dòn ală bơta cau yal jơl tus di tŭ añ tus mơ sền gŏ mơ mat tòm añ jê. Tian gơs òhềt tus nggùl bơh bơta jak chài dờng ơnàng bơtau dê mơ cau neh yal añ in; bơtau lin rlau mơ ală bơta añ neh kơno.

⁷Lơngai ngan ală làng bol bơtau dê! Lơngai ngan ală cau duh broă bơtau dê la ală cau òs ơm di đap bơtau mơ kơno bơta jak chài bơtau dê!

⁸Pal jòng ro Jehôwa Yàng Tom Trồ bơtau dê, Kơnràñ niam nùs bơh bơtau mơ ơn bơtau hơđang sơbàn Kơnràñ dê nàng gơs bơtau bơh Jehôwa Yàng Tom Trồ bơtau dê. Tài bơh Yàng Tom Trồ bơtau dê kòñ gơboh Israel mơ neh kòñ bơt bơtào bol khai gam sùm sùm, Kơnràñ neh bơtào bơtau at bồ hơđang bol khai nàng lơh bơta song ngan mơ song ring.”

⁹Gen khai ai bơtau in dô rhiang bàr jơt talơng màh, oă ngan sơnơm ƀô bơlhu mơ lŭ màng. Bơh òhềt gơs ală sơnơm ƀô bơlhu ndròm be sơnơm ƀô bơlhu mơ bơtau ùr Seba neh ai bơtau Salômôn in.

¹⁰(Rlau mơ hơ̆ ală dĭ gơna Hiram dê mơ ală dĭ gơna Salômôn dê, la ală cau neh cèng brê màh bơh di Ôphir, cèng brê mpàn chi kas màng mơ ală lŭ màng.

¹¹Bơtau ngui mpàn chi kas màng hơ̆ nàng lơh ală kơnă ntùng tòm hìu duh khoai Yàng Jehôwa dê, mơ tòm gơlang bơtau dê, mơ kung ngui lơh gơs ală kơñi pĕ kơñi rơs ală cau jak pĕ mơ rơs kơñi in. Ò tŭ lơi gŏ gơs mpàn chi behơ̆ tòm Juda.)

¹²Bơtau Salômôn ai bơtau ùr Seba in jơh ală bơta lơi khai kòñ dan, oă rlau mơ ală phan mò cèng ai bơtau Salômôn in. Gen mò lik rê hơ lơgar tòm khai dê bal mơ ală dĭ gơna khai dê.

¹³Kơr màh neh cèng tus Salômôn in tòm dô nam la prau rhiang prau jơt prau talơng màh,

¹⁴rlau mơ màh hơ̆ gam gơs màh bơh ală cau kă bro cèng tus. Jơh ală cau bơtau Arap mơ ală cau kwang dờng at bồ tòm lơgar kung cèng màh mơ priă Salômôn in.

¹⁵Bơtau Salômôn lơh gơs bàr rhiang nơm khèl dờng mơ màh klơn lơho; kòp nơm gơs prau rhiang sieklơ màh klơn lơho.

¹⁶Khai kung lơh gơs pe rhiang nơm khèl dềt mơ màh klơn lơho, kòp nơm gơs pe rhiang sieklơ màh klơn lơho. Bơtau ơn gơtòm Gơlang Brê Liban.

¹⁷Gen bơtau lơh gơs dô nơm sơbàn dờng mơ bla rwas ƀềp màh ngan.

¹⁸Sơbàn gơs prau kơnă mơ dô nơm kơrnòl ơn jơng mơ màh gơđềt mơ sơbàn, mơ kòp tiah nggui la tiah ơn tê, mơ bàr nơm klìu triă ntào di gah tiah ơn tê.

¹⁹Kung gơs jơt bàr nơm klìu triă ntào hơđang prau kơnă ntùng, dô nơm di bồ gah do mơ dô nơm di bồ gah ne kòp kơnă. Ò gơs lơgar lơi ndai neh lơh gơs ndròm behơ̆.

²⁰Jơh ală mơngàn jơrlŭ bơtau Salômôn dê la mơ màh, mơ jơh ală phan ngui ndai tòm Gơlang Brê liban lơh mơ màh goh, priă ò geh sền dờng màng tòm rài Salômôn dê.

²¹Bơh ală ơhò bơtau lòt tus hơ Tarsi bal mơ ală dĭ gơna Hiram dê; pe nam dô dơ̆ gơs ală ơhò Tarsi òs cèng màh, priă, bla rwas, dồ mơ brà.

²²Behơ̆ Salômôn lin rlau mơ jơh ală bơtau hơđang plai ù bơh bơta pas sơm mơ jak chài.

²³Jơh ală cau bơtau hơđang ù jòi tìp mat mơ Salômôn nàng iat bơta jak chài khai dê mơ Yàng Tom Trồ neh ơn tòm nùs khai.

²⁴Kòp nă tòm bol khai cèng phan pà mơ màh, priă, ală ào jrùh, ală phan tòmlơh, ală sơnơm ƀô bơlhu, ală ơseh mơ ală alàng oă ngan kòp nam.

²⁵Salômôn gơs poan rbô wàng ơseh mơ rơndeh lòs tòmlơh, mơ jơt bàr rbô nơm ơseh, khai ơn tòm ală ƀòn dờng ơn rơndeh lòs tòmlơh, mơ kung ơn bal mơ khai tòm Jerusalem.

²⁶Khai at bồ hơđang jơh ală cau bơtau bơh Hiòng Ơphrat tus hơ lơgar Philistin, mơ tus di nhàr lơgar Ejiptơ dê.

²⁷Cau bơtau neh lơh priă in gơlik be òs tòm Jerusalem kung be lŭ, mơ chi pơnàng gơs oă ngan kung be tòm chi sơr tòm Sephela.

²⁸Ală ơseh neh geh rwat Salômôn in bơh Ejiptơ mơ bơh di jơh ală lơgar ndai.

²⁹Ală broă ndai tòm rài at bồ Salômôn dê, bơh sơnròp tus di lồi dut, ò di neh geh cih tòm ală sră yal broă cau gơnoar hwơr Nathan dê, tòm jơnau đơs hwơr Ahija cau Silô dê, mơ tòm ală bơta gơtơnggŏ cau git lài Itdô dê bơh Jerôbôam kòn klau Nebat dê ò ơ?

³⁰Salômôn at bồ tòm Jerusalem hơđang Israel tòm poan jơt nam.

³¹Salômôn neh bic mơ ală ồng pàng khai dê mơ geh tơp tòm ƀòn dờng Dabit bèp khai dê. Mơ Rôbôam kòn klau khai dê pơrdòn sơbàn bơtau khai in.