Read koho Ejra 10 Bible Online

Ejra 10 - koho bible

Ejra 10

¹Tòm tŭ Ejra hòi dan mơ yal glài, ñìm rac mơ tơmbic să di đap hìu Yàng Tom Trồ dê, gơs dô mpồl gal ngan cau Israel, cau klau, cau ùr mơ cau kơnòm dềt, pơjum bal gùt dar khai, bol khai kung ñìm rac sràt bơtang ngan.

²Sekania kòn klau Jehiel, kòn sau mpồl Elam dê, đơs mơ Ejra lah: “Bol hi neh tìs glài ò dòn song mơ Yàng Tom Trồ bol hi dê, bơh neh bau mơ ală cau ùr bơdìh bơh di ală làng bol ơm tòm lơgar, mơya bulah behơ̆, tŭ do gơs bơta gơn kơnòm Israel in tòm bơta ò ring nùs bơh bơta do.

³Behơ̆ tŭ do, lòi tĕ bol hi bơtào dô bơta ho bal mơ Yàng Tom Trồ bol hi dê, nàng sang jơh ală bau ùr hơ̆ bal mơ ală kòn bol khai dê, jat be jơnau bơyai cau tòm bol hi mơ ală cau rơm să rngòt di bơta sồr lam Yàng Tom Trồ bol he dê. Lơh tĕ bơta hơ̆ jat be bơta boh lam.

⁴Lơh tĕ, bơh hơ̆ la broă tòm ồng dê, mơ bol hi rơp ơm bal mơ ồng, lơh tĕ pràn kơldang mơ lơh tĕ bơta hơ̆.”

⁵Gen Ejra ñă ntào mơ bơtào mơ ală cau lam bồ ală cau gơnoar ơn phan duh khoai, ală cau Lebi mơ jơh làng bol Israel srat să ho nền lơh jat jơnau neh đơs hơ̆. Behơ̆ bol khai srat să.

⁶Gen Ejra lik bơh di đap hìu Yàng Tom Trồ dê, mơ mut tòm ơdŭ ơm Jôhanan kòn klau Eliasip, la tiah khai neh ơm tòm mang. Khai ò sa piang lă, ò hùc dà tài bơh khai moat jrùng ñìm rac bơh bơta ò dòn song ală cau kong kup cèng lơh dĭ dê.

⁷Bol khai yal dô jơnau tơnggit làm jơh Juda mơ Jerusalem sồr jơh ală cau neh kong kup cèng pal tus pơjum tòm Jerusalem.

⁸Mơ dilah cau lơi ò bài tus tòm pe ngai, jat gơnoar sồr ală cau kwang mơ ală cau kwang kra dê, gen jơh ală phan mơna sre brê khai dê rơp kong tă bơh di khai mơ să tòm cau hơ̆ rơp kong bơtrơh tơlik bơh di mpồl ală cau kong kup cèng.

⁹Gen jơh làng bol Juda mơ cau Benjamin neh pơjum bal tòm Jerusalem tòm pe ngai; hơ̆ la tòm ngai bàr jơt, kơnhai dơ̆ sin; gen jơh làng bol neh nggui tòm ƀlàng dờng di đap hìu Yàng Tom Trồ dê, rngòt rơm să tài bơh bơta neh gơlik gơs hơ̆ mơ trồ mìu.

¹⁰Gen Ejra cau gơnoar ơn phan duh khoai ñă ntào mơ đơs mơ bol khai lah: “Bol mê neh tìs glài mơ neh bau mơ ală cau ùr làng bơdìh, mơ neh bơtơl bơta tìs glài Israel dê.

¹¹Tŭ do yal glài tĕ di đap Yàng Jehôwa la Yàng Tom Trồ ală ồng pàng bol mê dê, mơ lơh jat tĕ nùs kòñ Kơnràñ dê. Cah is tĕ să tòm bol mê bơh di ală làng bol ơm gùt dar bol mê mơ bơh di ală bau ùr làng bol bơdìh bol mê dê.”

¹²Gen jơh ală mpồl jơnum ho wơl dô jơnau driau dờng lah: “Ngan behơ̆! Bol hi pal lơh jat be jơnau ồng neh đơs.”

¹³Mơya làng bol gen oă, mơ tŭ do la kơnhai mìu; behơ̆ bol hi ò rgơi ntào tòm ƀlàng be do, broă do ò rgơi lơh sir tòm dô ngai hala bàr ngai, bơh oă cau tòm bol hi neh tìs glài tòm bơta do.

¹⁴Dan lòi tĕ ală cau kwang at bồ bol hi dê lơh ala jơh mpồl jơnum. Gen lòi tĕ kòp nă cau tòm ală ƀòn dờng bol hi neh bau mơ dô nă cau ùr làng bơdìh lòt tus di di tơngai lơh nền bal mơ ală cau kwang at bồ mơ ală cau kwang cahrña kòp ƀòn dờng dê, jơl tus di tŭ bơta gơjrañ dờng Yàng Tom Trồ bol hi dê pleh bơh bol hi.

¹⁵Mìng Jônathan kòn klau Asael mơ Jajejah kòn klau Tikbah tòmdră mơ bơta hơ̆, gơs Mesullam mơ Saphethai cau Lebi dô nùs bal mơ bol khai.

¹⁶Behơ̆ ală cau neh kong kup cèng lơh jat bơta lơh nền hơ̆. Ejra cau gơnoar ơn phan duh khoai sac rwah ală cau klau at bồ ală hìu nhă, kòp hìu nhă dô nă, mơ jơh tơl nă bol khai geh pồ bơtào jat sơnđan bol khai dê. Tòm ngai dùl kơnhai jơt, bol khai rơp sơntòm lùp sơwì bơh ală bơta neh gơlik gơs hơ̆,

¹⁷di ngai dùl kơnhai dùl bol khai neh tus mơ lơh sir gơwèt mơ jơh ală cau klau neh bau mơ cau ùr làng bol bơdìh.

¹⁸Digùl ală kòn sau ală cau gơnoar ơn phan duh khoai dê, ală cau tơnơ̆ do neh bau mơ cau ùr làng bơdìh: Bơh di ală kòn sau mpồl Jôsua kòn klau Jôjadak mơ ală oh mi khai dê: Maaseyah, Eliejer, Jarip mơ Gedalia.

¹⁹(Jơh tơl nă bol khai pò tê srat să ho nền la rơp bơtrơh ală bau ùr bol khai dê, mơ bơh tồi glài bol khai dê gen kòp nă ơn dô nơm be dam kup bơh mpồl lơh gơs phan ơn tơwài glài.)

²⁰Bơh di ală kòn sau mpồl Immer: Hanani mơ Jebadia.

²¹Bơh di ală kòn sau mpồl Harim: Maaseyah, Eli, Semayah, Jehiel, mơ Ujia.

²²Bơh di ală kòn sau mpồl Pasur: Eliôenai, Maaseyah, Ismael, Nethanel, Jôjabat mơ Elasah.

²³Digùl ală cau Lebi: Jôjabat Simei, Kelayah (hơ̆ la Kelita), Pethahiah, Juda mơ Eliejer.

²⁴Bơh di ală cau đơs chò: Eliasip. Bơh di ală cau kơp mpồng: Sallum, Telem mơ Uria.

²⁵Mơ di ală cau Israel: Bơh di ală kòn sau mpồl Parôs gơs: Ramiah, Ijiah, Malkijah, Mijamin, Eleajar, Hasabia, mơ Benayah.

²⁶Bơh di ală kòn sau mpồl Elam: Mattaniah, Sacari, Jehiel, Apdi, Jerimôt mơ Elijah.

²⁷Bơh di ală kòn sau mpồl Jatu: Eliôenai, Mattaniah, Jeremôt, Jabad mơ Ajija.

²⁸Bơh di ală kòn sau mpồl Bebai: Jehôhanan, Hanania, Japbai mơ Atlai.

²⁹Bơh di ală kòn sau mpồl Bani: Mesullam, Malluc, Adaiah, Jasup, Seal mơ Jeremôt.

³⁰Bơh di ală kòn sau mpồl Pahat Môap: Atna, Kelal, Benayah, Maaseyah, Mattaniah, Bejalel, Binnui mơ Manase.

³¹Bơh di ală kòn sau mpồl Harim: Eliejer, Isijah, Malkijah, Semayah, Simeôn,

³²Benjamin, Malluc, mơ Semariah.

³³Bơh di ală kòn sau mpồl Hasum: Mattenai, Mattattah, Jabat, Eliphelet, Jeremi, Manase, mơ Simei.

³⁴Bơh di ală kòn sau mpồl Bani: Maadai, Amram, Uel,

³⁵Benayah, Bedeyah, mơ Keluhi,

³⁶Baniah, Meremôt, Eliasip,

³⁷Mattaniah, Mattenai, mơ Jaasu.

³⁸Bơh di ală kòn sau mpồl Binnui: Simei,

³⁹Selemia, Nathan, Adayah,

⁴⁰Maknadebai, Sasai, Sarai,

⁴¹Ajarel, Selemia, Semariah,

⁴²Sallum, Amariah mơ Jôsep.

⁴³Bơh di ală kòn sau mpồl Nebô: Jeiel, Mattithia, Jabat, Jebina, Jadai, Jôel mơ Benayah.

⁴⁴Jơh ală cau hơ̆ neh bau mơ cau ùr làng bơdìh, mơ bol khai sang ală bau ùr hơ̆ bal mơ ală kòn bol khai dê.