Read koho Nehemi 3 Bible Online

Nehemi 3 - koho bible

Nehemi 3

¹Gen Eliasip cau gơnoar dờng ơn phan duh khoai bal mơ ală oh mi khai dê la cau gơnoar ơn phan duh khoai sơntòm bơt wơl Mpồng Belàt. Bol khai ơn is sàng goh gơ mơ ơn ală mpồng di tiah gơ dê. Bol khai ơn is sàng goh gơ sơlo ngài tus hơ Theng Mea, mơ sơlo ngài tus hơ theng Hananel.

²Ală cau klau ƀòn Jerikô bơt di gah Eliasip, mơ di gah cau Jerikô gơs Jakur kòn klau Imri bơt.

³Ală kòn klau Hassena dê bơt wơl Mpồng Ka, bol khai ơn ròc gơ dê mơ yồng ală mpồng, ơn gai mpồng mơ ală kai gơ dê.

⁴Tơnơ̆ mơ bol khai gơs Meremôt kòn Uria, sau Hakôs bơt wơl. Tơnơ̆ mơ Mesulam kòn klau Berekia sau Mesejabel bơt wơl. Mơ Jadôk kòn klau Baana bơt wơl di gah Mesulam.

⁵Di gah mpồl Jadôk gen cau bơh ƀòn Tekôa bơt wơl, mơya ală cau màng ryŭ bol khai dê ò bài duh broă ală cau tòm bol khai dê.

⁶Jôyada kòn klau Pasea mơ Mesulam kòn klau Besôdeya bơt wơl Mpồng Yau. Bol khai ơn ròc gơ mơ yồng ală mpồng mơ kơrnal mpồng mơ ală kai gơ dê.

⁷Melatia cau Gabaôn mơ Jadôn cau Merônôt bal mơ ală cau klau Gabaôn mơ Mispa lơh broă di gah Jôada mơ Mesulam, ơm hơđơm gơnoar cau kwang at bồ kơnhwàl Đah Ne Hiòng.

⁸Di gah bol khai gơs Usiel kòn klau Harhaya la cau chài lơh màh bơt wơl. Di gah khai Hanania cau chài lơh mơñà ƀô bơlhu bơt wơl. Bol khai bơt wơl sơlo ngài tus hơ Dơrñang Ơnàng.

⁹Di gah bol khai la Rephaja kòn klau Hur dê, cau kwang at bồ kơnhwàl Jerusalem dê bơt wơl.

¹⁰Di gah bol khai la Jedayah kòn klau Harumap bơt wơl di đap hìu tòm khai dê, mơ di gah khai la Hattus kòn klau Hasapneyah bơt wơl.

¹¹Malkiyah kòn klau Harim mơ Hassup kòn klau Pahat Môap bơt wơl pơnah ndai mơ Theng Bơnhă.

¹²Di gah khai la Salum kòn klau Halohes, cau at bồ nggùl kơnhwàl Jerusalem bơt wơl, khai mơ ală kòn ùr khai dê.

¹³Hanun mơ ală cau ơm tòm Janoa bơt wơl Mpồng Thòng. Bol khai bơt wơl mơ yồng ală mpồng gơ, kơrnal mơ kai kal gơ dê, mơ bơt wơl dô rbô tal dơrñang ơnàng tus hơ Mpồng È.

¹⁴Malkija kòn klau Rekap cau at bồ kơnhwàl Bethakerem bơt wơl Mpồng È. Khai yồng ală mpồng mơ ơn ală kơrnal mơ ală kai gơ dê.

¹⁵Salum kòn klau Kolhojeh cau at bồ kơnhwàl Mispa bơt wơl Mpồng Dà Cat, khai bơt wơl mơ tìm gơyồng ală mpồng gơ, ơn kơrnal mơ ală kai gơ dê. Khai kung bơt dơrñang Tơnau Sela di gah suơn cau bơtau dê, sơlo ngài tus hơ ală kơnă ntùng mù hơ ƀòn Dabit dê.

¹⁶Tơnơ̆ khai la Nehemi kòn klau Asbuk cau kwang at bồ kơnhwàl Bet Jur bơt wơl. Khai bơt wơl dơrñang bơh tiah tòm toh mat mơ bơtô ƀồc Dabit dê, ngài jơl tus hơ tơnau cau neh tò mơ hìu ală cau ling jak tòmlơh dê.

¹⁷Tơnơ̆ mơ khai la ală cau Lebi bơt: Rehum kòn klau Bani; di gah khai la Hasabia cau kwang at bồ nggùl kơnhwàl Keilah bơt wơl kơnhwàl khai dê.

¹⁸Di gah khai ală oh mi khai dê bơt wơl. Binnui kòn klau Henadat cau at bồ digùl kơnhwàl Keilah.

¹⁹Di gah khai la Ejer kòn klau Jôsua cau kwang at bồ Mispa bơt wơl dô pơnah ndai di đap kơh guh hơ hìu ơn phan tòmlơh di mum ƀòn.

²⁰Di gah khai la Baruk kòn klau Japbai bơt wơl dô pơnah ndai, bơh di mum jơl tus hơ mpồng hìu Eliasip cau gơnoar dờng lam bồ ơn phan duh khoai dê.

²¹Di gah Baruk gen Meremôt kòn klau Uria sau Hakkôs bơt wơl dô pơnah bơh mpồng hìu Eliasip jơl tus di lồi hìu hơ̆.

²²Di gah cau gơnoar ơn phan duh khoai, la ală cau ơm gơrwàng gùt dar, bơt wơl.

²³Di gah bol khai la Benjamin mơ Hasup bơt wơl di đap hìu tòm bol khai dê.

²⁴Di gah bol khai Binnui kòn klau Henadat bơt wơl pơnah ndai, bơh di hìu Ajaria tus di mum ƀòn.

²⁵Palal kòn klau Ujai bơt wơl di đap mum mơ theng kơp gàr đah hơđang hìu bơtau dê di di tiah ƀlàng jơng hìu tiah kơp gàr.

²⁶Di gah khai la Pedaia kòn klau Parôs bơt wơl bal mơ ală cau duh broă tòm hìu duh khoai ơm hơđang Ôphel bơt wơl guh tus di tiah tòm toh mat mơ Mpồng Dà đah mattơngai lik theng kơp gàr.

²⁷Di gah bol khai la cau Tekôa bơt wơl pơnah ndai tòm toh mat theng dờng kơp gàr, sơlo ngài tus hơ dơrñang Ôphel dê.

²⁸Hơđang Mpồng Ơseh la ală cau gơnoar ơn phan duh khoai bơt wơl kòp nă di đap hìu tòm khai dê.

²⁹Tơnơ̆ mơ bol khai la Jadôk kòn klau Imme bơt wơl di đap hìu tòm khai. Tơnơ̆ mơ khai la Semayah kòn klau Sekania, cau kơp gàr Mpồng Mattơngai Lik bơt wơl.

³⁰Tơnơ̆ khai gen Hanania kòn klau Selemia mơ Hanun kòn klau dơ̆ prau Jalap dê bơt wơl pơnah ndai. Tơnơ̆ khai la Mesulam kòn klau Berekia bơt wơl di đap hìu dờng ơm khai dê.

³¹Tơnơ̆ khai la Malkija dô nă tòm mpồl cau chài lơh màh, bơt wơl sơlo ngài tus hơ hìu ală cau duh broă hìu duh khoai dê mơ ală cau kă bro, tòm toh mat mơ Mpồng Miphơkat, mơ tus hơ ơdŭ đah hơđang mum ƀòn dê.

³²Digùl ơdŭ đah hơđang mum ƀòn dê mơ Mpồng Belàt la ală cau chài tiar màh, ală cau kă bro bơt wơl.