Read koho Nehemi 4 Bible Online

Nehemi 4 - koho bible

Nehemi 4

¹Tòm tŭ Sanbalat kơno bol hi ơm bơt wơl dơrñang ƀòn, gen khai gơhào gơjrañ oă ngan mơ dơñŏ tơnhial di cau Juda.

²Mơ đơs di đap ală cau lơh gơs dô mpồl bal mơ khai mơ di đap mpồl ling Samari dê lah: “Ñchi ală cau Juda òsô ò soàn hơ̆ ơm lơh taih? Bol khai rơp bơt wơl ală bơta sơl ơ? Bol khai rơp ơn phan duh khoai ơ? Bol khai rơp lơh sir tòm dô ngai ơ? Bol khai rơp ai ală lŭ gam wơl tòm gơnru thul ơmul hơ̆ mơ ai dô nơm lŭ neh ồs sa hơ̆ nàng lơh ơ?”

³Tôbiah cau Ammôn ơm di gah khai đơs lah: “Lŭ dơrñang hơ̆ bol khai ơm bơt, dilah dô nơm pì hào hơđang gơ gen rơp lơh tơrlơm jơh.”

⁴Ơ Yàng Tom Trồ dan iat, bơh bol hi gơkòl cau sền òsơp; tơnwèt bơta dơñŏ tơnhial bol khai dê dùh wơl hơđang bồ bol khai mơ ai cau phà kơñau bol khai tòm dô nơm lơgar bol khai ơm jàm.

⁵Dan bañ jơm bơta iơh bơsak bol khai dê, dan bañ lòi glài bol khai dê jùt bơh di đap mat Yàng; bơh khai neh đơs jơnau bơtat bơtròh di đap mat ală cau bơt bơtào.

⁶Behơ̆ bol hi bơt wơl dơrñang mơ jơh ală dơrñang neh tơrbŏ bal jơnhoa tus di nggùl; bơh làng bol neh lơh broă dô nùs dô bă bal.

⁷Mơya tòm tŭ Sanbalat, Tôbiah, ală cau Arap, ală cau Ammôn mơ ală cau Asdôt kơno broă bơt wơl dơrñang neh ntoat tơngguh mơ ală tiah tơrlah neh mòr bơt wơl wil tơl, gen bol khai gơhào gơjrañ oă ngan,

⁸mơ jơh tơl nă bol khai bơtào kai gơrmơ̆i bal nàng lòt tòmlơh tòmdră mơ Jerusalem mơ lơh oă bơta sơlồng sơlàng tềng hơ̆.

⁹Behơ̆ bol hi hòi dan mơ Yàng Tom Trồ bol hi dê, mơ bơtào cau sền gàr nàng rcang kơp gàr tòmdră mơ bol khai ngai mơ mang.

¹⁰Mơya ală cau Juda đơs lah: “Bơta pràn ală cau ơnòng kơnjơ̆ neh jơh, mơ gam gơs oă gơnru tơrlah tơrling, gen tàng bol hi ò rgơi lơh broă hơđang dơrñang.”

¹¹Ală cau sò tơm bol hi đơs lah: “Bol khai rơp ò git mơ ò gŏ bơta lơi lài mơ tŭ bol he tus hơđang bol khai, mơ tơnchơt bol khai gen broă lơh rơp dơh wơl.”

¹²Mơya ală cau Juda ơm rềp mơ bol khai, tus yal bol hi in jơt dơ̆ lah: “Ală cau sò tơm rơp guh tus bơh di jơh ală tiah bol khai ơm nàng tòmdră mơ bol he.”

¹³Behơ̆ tòm ală tiah liah rlau jơh di pah bơh ngkòi dơrñang dê, tòm ală tiah ƀlàng añ ơn ală làng bol jat ală hìu nhă bol khai dê bal mơ đào, tà mơ srào bol khai dê.

¹⁴Tơnơ̆ mơ tŭ añ neh sền ală bơta rau, añ ñă ntào mơ đơs mơ ală cau màng ryŭ, mơ jơh ală cau kwang, mơ jơh ală cau gam wơl lah: “Bañ rngòt di bol khai, kah tĕ Yàng Jehôwa la Bơtau dờng mơ pal rngòt, mơ tòmlơh tĕ ală oh mi bol mê in, ală kòn klau ală kòn ùr, ală bau ùr mơ ală hìu nhă bol mê in.”

¹⁵Tòm tŭ ală cau sò tơm bol hi dê git bol hi neh git kai gơrmơ̆i bol khai dê, mơ Yàng Tom Trồ neh lơh roh gơprah kai gơrmơ̆i bol khai dê, gen jơh tơl nă bol hi rê wơl hơ dơrñang, kòp nă lơh wơl broă tòm he.

¹⁶Bơh di ngai hơ̆ nggùl ală cau lơh broă añ jê lơh broă bơt bơtào, ai nggùl gam wơl gen at tà, khèl, srào mơ ào lòs. Ală cau kwang ơm bơh ngkòi jơh ală hìu nhă làng bol Juda dê,

¹⁷la ală cau ơm bơt dơrñang. Ală cau àñ ơnòng lơh broă kơnjơ̆, àñ tui mơ dô đah tê, mơ dô đah tê ne at dô nơm phan tòmlơh.

¹⁸Kòp nă cau bơt bơtào neh gơs đào triau di but khai dê tòm tŭ khai lơh broă.

¹⁹Cau uh kơlwòk ơm di gah añ. Añ đơs mơ ală cau dờng màng mơ ală kwang bàng, mơ jơh tơl nă làng bol lah: “Broă la dờng mơ ơnàng làm bă tiah, ai bol he gen ơm ngài di gơp hơđang dơrñang.

²⁰Pơjum tơrgòm tĕ mơ bol hi tiah lơi bol mê kơno ntas kơlwòk. Yàng Tom Trồ bol he dê rơp tòmlơh bol he in.”

²¹Behơ̆ bol hi lơh broă bòl glar, mơ nggùl tòm bol khai at tà bơh tŭ àng drim jơl tus di tŭ sơmañ lik.

²²Tŭ hơ̆ añ kung đơs mơ bol khai lah: “Lòi tĕ kòp nă cau bal mơ cau lơh broă khai dê bic mang tòm Jerusalem, nàng bol khai sền gàr bol he tòm trồ mang mơ lơh broă tòm trồ ngai.”

²³Gen tàng bulah añ hala oh mi añ, hala ală cau lơh broă añ jê, hala ală ling sền gàr jat añ, ò gơs cau lơi hồ phan soh he dê; kòp nă at phan tòmlơh tòm tê ma he dê.