Read koho Nehemi 6 Bible Online

Nehemi 6 - koho bible

Nehemi 6

¹Tòm tŭ Sanbalat, Tôbiah, Gesem cau Arap, mơ ală cau sò tơm ndai bol hi dê git añ neh bơt wơl dơrñang rau, gơ ò gam tiah tơrlah tai. (Bulah tus di tŭ hơ̆ añ òhềt ơn ală mpồng di ală mpồng).

²Gen Sanbalat mơ Gesem pơyoa jơnau mơ añ lah: “Tus tĕ pơjum mơ bol hi tòm dô nơm ƀòn tòm ƀlàng ring Ônô.”

³Mơya bol khai kòñ lơh iơh di añ. Añ sồr cau kong sồr lòt đơs mơ khai lah: “Añ kòl lơh broă dờng màng, añ ò rgơi mù. Ñchi bơh tài broă lơh pal ơm dơh wơl, tòm tŭ hơ̆ añ sang broă nàng mù tus hơ bol mê taih?”

⁴Bol khai pơyoa añ in tòm poan dơ̆ kung jơnau hơ̆, ai añ ho wơl bol khai kung ndròm behơ̆ sơl.

⁵Kung behơ̆, tòm dơ̆ pram Sanbalat sồr cau duh broă khai dê tus hơ añ, bal mơ dô pang sră pơyoa ò lềr at tòm tê khai dê.

⁶Tòm sră pơyoa hơ̆ neh cih lah: “Tòm ală làng bol cau kơno yal, mơ Gesem kung bơh bơta hơ̆: Mê mơ ală cau Juda kòñ pơrlơ̆ dră, tài bơh hơ̆ tàng mê bơt wơl dơrñang; mơ jat be jơnau geh yal la mê kòñ lơh gơs bơtau bol khai dê.

⁷Mê kung neh bơtào ală cau gơnoar hwơr neh bơto yal tòm Jerusalem bơh mê, ‘la gơs dô nă cau bơtau tòm lơgar Juda!’ Tŭ do cau rơp yal bơtau in jat be ală jơnau hơ̆. Gen tàng tus tĕ nàng bol he tòmbơyai bal.”

⁸Gen añ pơyoa jơnau tus hơ khai, mơ đơs lah: “Ò gơs cau lơi lơh bơta mê đơs, mơya să tòm mê tơlik is jơnau hơ̆.”

⁹Tài bơh bol khai kòñ tơrngòt bol hi mơ kơlôi lah: “Bol khai rơp ò lơh broă tai mơ broă hơ̆ rơp ò lơh sir.” Mơya tŭ do, Ơ Yàng Tom Trồ, dan lơh tê añ jê pràn kơldang!

¹⁰Dô ngai ne, tòm tŭ añ lòt tus hơ hìu Semaya, kòn klau Delaya, sau Mehetabel, ơm krơ̆ să tòm hìu khai dê, khai đơs lah: “Bol he tòmtìp bal tòm hìu Yàng Tom Trồ dê, tòm dơlam hìu duh khoai, bol he til jơh ală mpồng hìu duh khoai dê, tài bơh bol khai rơp tus nàng tơnchơt mê; ngan, mang do bol khai rơp tus tơnchơt mê.”

¹¹Gen añ đơs lah: “Dô nă cau be añ do rơp dô ơ? Dô nă cau be añ rơp mut tòm hìu duh khoai nàng gàr bơta kis ơ? Añ rơp ò mut!”

¹²Añ đal git mơ gŏ Yàng Tom Trồ ò sồr khai tòm jơh ală bơta, mơya khai đơs jơnau tòmdră di añ, tài bơh Tôbiah mơ Sanbalat neh ơpah khai.

¹³Cau neh ơpah khai nàng lơh añ in rngòt mơ lơh añ in tìs glài, nàng bol khai gơs bơta đơs iơh di añ, lơh añ in ƀàssìl.

¹⁴Ơ Yàng Tom Trồ añ, dan kah tĕ Sanbalat mơ Tôbiah jat be ală broă bol khai neh lơh, kung kah Nôdia cau gơnoar hwơr ùr bal mơ ală cau gơnoar hwơr ndai neh kòñ lơh añ in rngòt.

¹⁵Behơ̆, dơrñang neh sir tòm ngai bàr jơt pram kơnhai Elul cau bơt wơl sir dơrñang, tòm pram jơt bàr ngai.

¹⁶Dơ̆ ală cau sò tơm bol hi dê kơno bơta hơ̆, gen jơh ală làng bol gùt dar bol hi rngòt mơ gơplơ̆ nùs; tài bơh bol khai git lah broă do neh geh bơtào kơ̆ bơh bơta dong kòl Yàng Tom Trồ bol hi dê.

¹⁷Mơ tai tòm ală ngai hơ̆ ală cau dờng màng Juda dê neh pơyoa oă sră pơyoa hơ Tôbiah, mơ Tôbiah neh pơyoa sră ho wơl bol khai.

¹⁸Oă cau tòm làng bol Juda srat să tòmho mơ Tôbiah, tài bơh khai la bơrtơu Sekania kòn klau Arah mơ kòn klau Jehôhanan neh bau mơ kòn ùr Mesulam kòn klau Berekia.

¹⁹Bol khai kung đơs ală broă niam bơh Tôbiah di đap añ, mơ bol khai yal wơl Tôbiah in ală jơnau añ đơs. Mơ Tôbiah pơyoa ală sră nàng pơhìn añ.